ލޮސް އެންޖެލްސް، ޔުނައިޓެޑް ސްޓޭޓްސް (ޖޫން 6) - މަޝްހޫރު ފުޓްބޯޅަ ކުޅުންތެރިޔާ، ޑޭވިޑް ބެކަމްގެ ހިއްސާ އޮންނަ އެމެރިކާގެ ކްލަބް، އިންޓަ މިއާމީ އަށް ލިއޮނަލް މެސީ އާއި ކްރިސްޓިއާނޯ ރޮނާލްޑޯ އެކުގައި ކުޅުވަން ބެކަމް މަސައްކަތް ކުރަމުން އަންނަ ކަމަށް ރިޕޯޓްތައް ބުނެފި އެވެ.
މިދިޔަ އަހަރު މެސީ، 36، ވަނީ ދެ އަހަރާ ބައިގެ ކޮންޓްރެކްޓެއްގައި އިންޓަ މިއާމީ އަށް ސޮއިކޮށްފަ އެވެ. މެސީގެ އިތުރުން އިންޓަ މިއާމީ އަށް މި ވަގުތު ކުޅެމުން އަންނަ މަޝްހޫރު ކުޅުންތެރިންނަށް ބަލާއިރު، ކުރިން އޭނާއާ އެކު ބާސެލޯނާ އަށް ކުުޅުނު، ސްޕެއިނުގެ ޖޯޑީ އަލްބާ އާއި ސާޖިއޯ ބުސްކެޓްސް އަދި އުރުގުއޭގެ ފޯވާޑް، ލުއިޒް ސުއަރޭޒް ކުޅެމުން އަންނަނީ އިންޓަ މިއާމީ އަށެވެ.
ރިޕޯޓްތައް ބުނާގޮތުން، ބެކަމް މަސައްކަތް ކުރަމުން އަންނަނީ ސައުދީ އަރަބިއްޔާގެ ޕްރޮފެޝަނަލް ލީގުގެ އަލް ނަސްރު އަށް ކުޅެމުން އަންނަ ރޮނާލްޑޯ، 39, އިންޓަ މިއާމީ އަށް ގެންދާށެވެ.
އެކަމަކު، ސައުދީ މީޑިއާ ރިޕޯޓްތައް ބުނާގޮތުން، ރޮނާލްޑޯ ވަނީ އަންނަ ސީޒަނުގައި ވެސް އަލް ނަސްރަށް ކުޅެން ނިންމައިފަ އެވެ. އެއީ އެ ކްލަބާ އެކު ހަދާފައިވާ އެއްބަސްވުމުގެ މުއްދަތު ހަމަވުމުންނެވެ.
އިނގިރޭސި މީޑިއާ ރިޕޯޓްތައް ބުނާގޮތުން، ބެކަމް އަންނަނީ ރޮނާލްޑޯގެ އޭޖެންޓާ އެކު އަންނަ އަހަރު ޓްރާންސްފާއެއް ކުރިއަށްގެންދަން މަޝްވަރާ ކުރަމުންނެވެ.
