މިއާމީ، ޔުނައިޓެޑް ސްޓޭޓްސް (ޑިސެމްބަރު 17) - އިނގިރޭސި ޕްރިމިއާ ލީގުގައި އާދިއްތަ ދުވަހުގެރޭ، މެންޗެސްޓާ ސިޓީ ދަނޑުގައި މެންޗެސްޓާ ޔުނައިޓެޑުން މޮޅުވި މެޗަށް ފަހު، އެ ޓީމުގެ ދެ ކުޅުންތެރިން ކަމަށްވާ މާކަސް ރެޝްފޯޑް އާއި އަލެހަންދްރޯ ގާނާޗޯ އަށް އެ ކްލަބްގެ ލެޖެންޑް، ޑޭވިޑް ބެކަމް ނުސީދާ ރައްދެއް ދީފި އެވެ.
ފަހު ތިން މިނިޓް ތެރޭ ޖެހި، ދެ ގޯލާ އެކު، ޔުނައިޓެޑުން ވަނީ ފަހަތުން އަރައި ސިޓީ ދަނޑުގައި އެ ޓީމު އަތުން 2-1 އިން މޮޅުވެފަ އެވެ. މި މެޗަށް ޔުނައިޓެޑްގެ ކޯޗު ރުބެން އަމޮރިމް ނެގި ސްކޮޑުން ރެޝްފޯޑާއި ގާނާޗޯ އަށް ފުރުސަތެއް ނުލިބުނެވެ. އެކަމާ ގުޅޭގޮތުން ކުރި ސުވާލަށް ދިން ޖަވާބުގައި އަމޮރިމް ބުނީ، އޭނާ ބޭނުންވާ ކަންކަން ޓްރެއިނިން އާއި މަސައްކަތުގެ ރޭޓުން ނުފެންނަ ކުޅުންތެރިންނަށް ފުރުސަތު ދޭން އުނދަގޫވާނެ ކަމަށެވެ.
ސިޓީ މެޗަށް ފަހު، ބެކަމް، ސޯޝަލް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ، ޔުނައިޓެޑް އަލުން އާރާސްތު ކުރުމުގެ މަސައްކަތް ރަނގަޅަށް ފަށަން ޖެހޭ ކަމަށާއި ބޮޑު މޮޅެއް މި ހޯދި ޔުނައިޓެޑްގެ ޖޯޒީގައި ކުޅެން އެ ކްލަބަށް ޓަކައި މަސައްކަތްކުރަން ބޭނުންވާ ކުޅުންތެރިންނާ އެކު ކަމަށެވެ.
ސިޓީ އާއި ޔުނައިޓެޑްގެ މެޗު އެނަލިސްޓުންގެ ގޮތުގައި މަސައްކަތްކުރި ޔުނައިޓެޑްގެ ކުރީގެ ދެ ކުޅުންތެރިން ކަމަށްވާ ރޯއީ ކީން އާއި ގެރީ ނެވިލް ވެސް ވަނީ ރެޝްފޯޑާއި ގާނާޗޯ އަށް މި މެޗުގެ ސްކޮޑުން ފުރުސަތު ނުދިނުމުގެ ފަހަތުގައި ކަންތައްތަކެއް ހިނގާފައިވާނެ ކަމަށް ބުނެފަ އެވެ.
ޔުނައިޓެޑްގެ ކޯޗު، އަމޮރިމް އެ ކްލަބްގެ ކަންކަން ބަދަލުކުރަން ކުރާ މަސައްކަތުގައި ވިއްކާލާނެ ކުޅުންތެރިންގެ ލިސްޓެއް އެކުލަވާލާފައިވާ ކަމަށް މީޑިއާގައި އަޑުފެތުރިފައިވާއިރު، އެ ލިސްޓުގައި ރެޝްފޯޑާއި ގާނާޗޯގެ ނަން ހިމެނޭ ކަމަށް ވެސް ރިޕޯޓްތައް ބުނެ އެވެ.
