މެލްބަން (ޖެނުއަރީ 23) - މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ އަންހެން ސިންގަލްސް ބައިން، ދުނިޔޭގެ ރޭންކިން އެއް ވަނަ ޕޮލެންޑްގެ އީގާ ސްވިއަޓެކް, މުބާރާތުގެ ގަދަ 16 ބުރުން ކަޓައިފި އެވެ.
އޮސްޓްރޭލިއަން އޯޕަންގެ ހަތަރު ވަނަ ބުރުގައި ސްވިއަޓެކް ނުކުތީ ވިމްބަލްޑަން ޗެމްޕިއަން، ކަޒަކްސްތާންގެ އެލީނާ ރީބަކީނާއާ ދެކޮޅަށެވެ. މި މެޗުން އެލީނާ މޮޅުވީ 6-4، 6-4 އިންނެވެ.
ގިނަ ބަޔަކު އުންމީދުކުރީ މި މެޗުން ސްވިއަޓެކް މޮޅުވެ، ކުއާޓާ ފައިނަލުގައި އެމެެރިކާގެ ޒުވާން ކުޅުންތެރިޔާ، ކޮކޯ ގޯފްއާ ކުޅެން ޖެހޭނެ ކަމަށެވެ. އެކަމަކު، ސްވިއަޓެކް އެކޭ އެއްގޮތަށް ގޯފް ވެސް ވަނީ ހަތަރު ވަނަ ބުރުން ކަޓައިފަ އެވެ. ގޯފް ކެޓީ ލަޓްވިއާގެ ޖެލީނާ އޮސްޓަޕެންކޯ އަތުން 7-5، 6-3 އިން ބަލިވުމުންނެވެ.
ގޯފް (ވ) އާއި އޮސްޓަޕެންކޯ މެޗަށް ފަހު ސަލާމްކުރަނީ: ދެ ކުޅުންތެރިންނަކީ ވެސް ޒުވާން އުމުރުގައި ތަފާތު ދެއްކި ކުޅުންތެރިން.
ސްވިއަޓެކް ބުނީ ބަލިވި އެންމެ ބޮޑު ސަބަބަކީ މާ ބޮޑަށް މެޗު ޔަގީންކުރެވި ކުރަން ނުޖެހޭ ކަންތައްތަކެއް މެޗުގެ ތެރެއިން ކުރެވުން ކަމަށެވެ. އަމިއްލަ އަށް ޕްރެޝަރަށް ވެއްޓުމަކީ ކުޅުންތެރިއަކަށް މެޗެއްގެ ތެރެއިން ހެދޭނެ އެންމެ ބޮޑު ގޯސްކަމަކާއި މި ފަހަރު އޮސްޓްރޭލިއަން އޯޕަންގައި ދިމާވީ އެ ގޮތަށް ކަމަށް ސްވިއަޓެކް ވަނީ ބުނެފަ އެވެ.
މިދިޔަ އަހަރު ވިމްބަލްޑަން ކާމިޔާބުކުރިއިރު، ދެއްކި ފަދަ ހިތްވަރެއް މި ފަހަރުގެ އޮސްޓްރޭލިއަން އޯޕަންގެ ބާކީ މެޗުތަކުގައި ދެއްކުމުގެ އަމާޒުގައި ހުރި ކަމަށް އެލީނާ ވަނީ ބުނެފަ އެވެ. އަދި ސްވިއަޓެކް އަތުން ލިބުނު މޮޅަކީ މުބާރާތުގައި ކޮންމެ ކުޅުންތެރިއަކާ ދެކޮޅަށް ކުޅެން ޖެހުނަސް ކޮންފިޑެންސެއްގެ ގޮތުގައި ބޭނުންކުރެވޭނެ ކަމެއް ކަމަށް އެލީނާ ދެކެ އެވެ.
ކުއާޓާގައި އެލީނާއާ ދެކޮޅަށް ކުޅޭ އޮސްޓަޕެންކޯ ވަނީ މީގެ ހަ އަހަރު ކުރިން ފްރެންޗް އޯޕަން ޓެނިސް މުބާރާތް ކާމިޔާބުކޮށްފަ އެވެ. އެކަމަކު، މިއީ 2018 ވަނަ އަހަރުގެ ވިމްބަލްޑަންގެ ފަހުން، ގްރޭންޑް ސްލޭމް ޓެނިސް މުބާރާތެއްގެ ކުއާޓާ ފައިނަލުގައި އޮސްޓަޕެންކޯ ކުޅޭ ފުރަތަމަ ފަހަރެވެ.
