މެލްބަން (ޖެނުއަރީ 22) - މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ ތިން ވަނަ ބުރުގައި، އަނިޔާގައި ހުރެ ކުޅުނު މެޗުން ވެސް، ނޮވަކް ޖޮކޮވިޗް މޮޅުވިއިރު، އެންޑީ މަރީ މުބާރާތުން ކަޓައިފި އެވެ.
މުބާރާތުގެ ހަތަރު ވަނަ ބުރުން، ޖޮކޮވިޗަށް ފުރުސަތު ލިބުނީ ރޭ ކުޅުނު ތިން ވަނަ ބުރުގެ މެޗުން ބަލްގޭރިއާގެ ގްރިގޯ ޑިމިޓްރޯވް އަތުން 7-6، (9-7)، 6-3، 6-4 އިން މޮޅުވެގެންނެވެ. ސްޕެއިންގެ ރޮބާޓޯ ބައުޓިސްޓާ އަތުން، ތިން ވަނަ ބުރުގެ މެޗުގައި މަރީ ބަލިވީ 6-1، 6-7، (7-9)6-3، 6-4 އިންނެވެ.
ސްކޮޓްލެންޑަށް އުފަން، މަރީ، 35، ދެ ވަނަ ބުުރުގެ މެޗުން މޮޅުވިތާ، 39 ގަޑިއިރު ފަހުން، ތިން ވަނަ ބުރުގެ މެޗުގައި ކުޅެން ޖެހުމުން، ކޮންމެ ވެސް ވަރަަކަށް ވަރުބަލިވުމުގެ މައްސަލަތައް މެޗުގެ ފަހުކޮޅުގައި ދިމާވި އެވެ. ބައުޓިސްޓާ އަތުން ބަލިވުމާ އެކު، 2017 ވަނަ އަހަރުގެ ވިމްބަލްޑަން ފަހުން، ގްރޭންޑް ސްލޭމް ޓެނިސް މުބާރާތެއްގެ ހަތަރު ވަނަ ބުރަށް ފުރަތަމަ ފަހަރަށް ދަތުރުކުރުމަށް ކުރި އުންމީދު ހާސިލްނުވީ އެވެ.
ބައުޓިސްޓާ އަތުން ބަލިވި މެޗަށް ފަހު އެންޑީ މަރީ ސަޕޯޓަރުންނަށް ޝުކުރު އަދާކުރަނީ.
"ޓާގެޓަށް ނުދިޔަ ކަމުގައި ވިޔަސް މާޔޫސްކަމެއް ނެތް، އަހަރެން މި ދަނީ މި ކޯޓުގައި ވެސް މޮޅުވާން ކުރެވުނުހާ މަސައްކަތް ކޮށްފައި،" 2019 ވަނަ އަހަރު އުނަގަނޑުގެ ސީރިއަސް އޮޕަރޭޝަނެއް ކުރުމަށް ފަހު ވެސް ޕްރޮފެޝަނަލް ޓެނިސް އިން ކުރިއަށްދިއުމަށް ހިތްވަރު ދައްކަމުން އަންނަ މަރީ ބުންޏެވެ.
"ކުރެވޭނީ މަސައްކަތް، މެޗުގެ ނަތީޖާ އަކީ ކޮންޓްރޯލުން ބޭރުގައިވާ ކަމެއް، އަހަރެން ކުރެވުނު މަސައްކަތާ މެދު ފަހުރުވެރިވަން،"
މުބާރާތުގެ ޗެމްޕިއަންކަން ނުވަ ފަހަރަށް ހޯދާފައިވާ ޖޮކޮވިޗް، ތިން ވަނަ ބުރުގައި ޑިމިޓްރޯވް އަތުން މޮޅުވި މެޗު ތިން ގަޑިއިރަށް ދިގުލައިދިޔަ އެވެ. އެއީ މި މެޗުގައި ޖޮކޮވިޗްގެ ފަލަމަސްގަނޑަށް ލިބުނު އަނިޔާގެ ސަބަބުން، އޭނާ ފަރުވާ ހޯދަން ޖެހުމާ ގުޅިގެންނެވެ.
ރޭގެ މެޗުގެ ތެރެއިން ޖޮކޮވިޗް، މެޑިކަލް ޓައިމްއައުޓް ނަގައިގެން ފަރުވާ ހޯދަނީ.
"ކޮންމެ ޕޮއިންޓެއް ވެސް ވަރަށް ހިތްވަރުން މި ހޯދުނީ، ޔަގީނުން ވެސް އަހަރެން ފިޒިކަލީ މި ހުރި ހާލަތެއް ބުނަން އެނގޭނީ ޓެސްޓްތަކެއް ހެދުމަށް ފަހު ޑޮކްޓަރުންނަށް. މިއީ ވަރަށް އާދަޔާހިލާފު މެޗެއް، ތިން ސެޓު މިދިޔައީ ތިން ގަޑިއިރުން، އެއީ ވަރަށް ވަގުތު،" އެއް އަހަރުގެ ބްރޭކަކަށް ފަހު، އޮސްޓްރޭލިއަން އޯޕަންގައި ވާދަކުރަމުން އަންނަ ޖޮކޮވިޗް ބުންޏެވެ.
ޖޮކޮވިޗް، 35، ގެ ފަލަމަސްގަނޑަށް މި ފަހަރުގެ، އޮސްޓްރޭލިއަން އޯޕަންގެ ކުރިން އަނިޔާވި އެވެ. ރިޕޯޓްތައް ބުނާގޮތުން، ޖޮކޮވިޗް، މި މުބާރާތުގައި މި ކުޅެނީ އަނިޔާއިން އެއްކޮށް ރިކަވާނުވެ އެވެ. ކުރިއަށްހުރި މެޗުތަކުގައި ވެސް ޖޮކޮވިޗަށް އެ އަނިޔާގެ އުނދަގޫތައް ކުރިމަތިވާނެ ކަމަށް ބެލެވެ އެވެ.
މުބާރާތުގެ ހަތަރު ވަނަ ބުރުގައި ޖޮކޮވިޗް ކުޅޭނީ އޮސްޓްރޭލިއާގެ އަލެކްސް ޑި މިނޯއާ ދެކޮޅަށެވެ.
