މީޑިއާ ނެޓު ހިންގާ ކުންފުންޏަށް 9.3 މިލިއަން ރުފިޔާ ދެއްކުމަށް ދައުލަތުގެ މީޑިއާ (ޕީއެސްްއެމް) ގެ މައްޗަށް ސިވިލް ކޯޓުން އިއްޔެ ހުކުމްކޮށްފި އެވެ.
އެ މައްސަލާގައި ދައުވާ ކޮށްފައި ވަނީ މީޑިއާނެޓާއެކު ޕީއެސްއެމްއިން ވެފައިވާ އެއްބަސްވުމެއްގެ ދަށުން ދީފައިވާ ހިދުމަތަށް ޕީއެސްއެމްއިން ފައިސާ ދައްކާފައި ނުވާތީ އެވެ.
ޕީއެސްއެމްއިން މީޑިއާނެޓަށް ދައްކަން ޖެހޭ ފަސްމިލިއަނަށްވުރެ ގިނަ ރުފިޔާ ނުދައްކާ އޮތުމުން އިންޓްރެސްޓު ރޭޓާއެކު އަރާފައިވާ މިންްވަރު އެއްފަހަރު މަތިންް ދައްކައި ހަލާސް ކުރުމަށާއި އަދި އެހިދުމަތް ދިނުން މެދުކަނޑާ ނުލާތީ އަރާ ފައިދާ މުއްދަތުގައި ދެއްކުމަށް ދައުވާކުރި ފަރާތުން އެދިފައިވެ އެވެ.
ޝަރީއަތް މަރުހަލާގައި ޕީއެސްއެމްއިން ވަނީ އިންޓްރެސްޓު ފައިސާއަކީ ދައްކަން ޖެހޭނެ ފައިސާއެއް ނޫން ކަމަށް ބުނެފަ އެވެ. އެހެން ނަމަވެސް އެ ފައިސާއަކީ ވެސް ދެފަރާތުން އެއްބަސްވެފައިވާ އެއްބަސްވުންތަކުގައި ފައިސާ ނުދައްކައިފި ހާލަތެއްގައި ދައްކަން ޖެހޭ ފައިސާގެ އިތުރުން އަރާ އަގު ކަމަށް ދެފަރާތުން އެއްބަސްވެފައިވާ ކަން އެނގެން އޮތް ކަމަށް ސިވިލް ކޯޓުން ކުރި ހުކުމުގައި ބުނެފައިވެ އެވެ.
ޕީއެސްއެމްގެ މައްޗަށް ހުކުމްކުރީ ޖުމްލަ 9،309،577.52ރ. ދެއްކުމަށެވެ. އެ 9.3 މިލިއަން ރުފިޔާ އެކީ އެއްފަހަރާ ނުދެއްކޭނެ ކަމަށާއި، ބައި ބަޔަށް ބަހާލައިގެން އެ ފައިސާ ދެއްކުމަށް ޕީއެސްއެމްއިންް އެދުނު ނަމަވެސް ސިވިލްކޯޓުން ހުކުމް ކުރީ މީޑިއާނެޓުން އެދޭ ގޮތަށް އެއް ފަހަރާ އެ ފައިސާ ދައްކާ ހަލާާސްކުރުމަށެވެ. އެ ފައިސާ ދެއްކުމަށް ދީފައިވަނީ އިއްްޔެއިން ފެށިގެން 30 ދުވަހުގެ މުއްދަތެކެވެ.
