ގއ. ވިލިނގިލީގައި އިމާރާތްކުރާ 50 ރޯ ހައުސްގެ ބިންގާ އެޅުމަށް އެ ރަށުގައި ރަސްމިއްޔާތެއް ބާއްވައިފި އެވެ.
އެ ރަސްމިއްޔާތުގައި ރޯ ހައުސްގެ ބިންގާ އަޅުއްވައިދެއްވީ ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން، ރައްޔިތުންގެ މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސައިން، އަދިި އެ ރަށު ކައުންސިލްގެ މެންބަރުންނެވެ.
ޑިޒައިން އެންޑް ބިލްޑް އުސޫލުން ރޯހައުސް އިމާރާތް ކުރުމުގެ މަސައްކަތް ހަވާލުކޮށްފައިވަނީ ދޮންބޭޒް ޕްރައިވެޓް ލިމިޓެޑްއާ އެވެ. ނުވަ މަސް ދުވަހުގެ ތެރޭގައި ނިންމާ ގޮތަށް ހަވާލުކުރި މި މަޝްރޫއުގެ އަގު 48 މިލިއަން ރުފިޔާއަށް އަރަ އެވެ.
މިދިޔަ އަހަރު ޖޫން މަހު މަސައްކަތް ހަވާލުކޮށް ގާއިމްކުރެވުނު މަޝްރޫއުގެ އެއްބަސްވުމުގެ ދަށުން ވިލިނގިލީގައި އިމާރާތް ކުރަނީ 700 އަކަފޫޓުގެ 50 ރޯ ހައުސް އެވެ.
އެއީ ދެ ފަންގިފިލާގެ ރޯހައުސްތަކެއް ކަމަށް ޕްލޭނިން މިނިސްޓްރީން ބުނެ އެވެ. ތިން ކޮޓަރާއި ތިން ފާހަނާ، ސިޓިން ރޫމް، ކާގެ އާއި ބަދިގެ، ލޯންޑްރީ އަދި ގުދަނެއް ހިމެނޭހެން، ކޮންމެ ބައެއްގައި ބެލްކަނީއެއް ވެސް ހުންނާނެ ކަމަށް ބުނެފައިވެ އެވެ.
