މިއަހަރުގެ މިހާތަނަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދު މިދިޔަ ދެ އަހަރަށް ވުރެ އިތުރުވެއްޖެ އެވެ.
މިމަހުގެ 11 ވަނަ ދުވަހާ ހަމައަށް ރާއްޖެއަށް ޖުމްލަ 59،071 ފަތުރުވެރިން ޒިޔާރަތް ކޮށްފައިވެ އެވެ. އެއީ މިދިޔަ އަހަރުގެ މި މުއްދަތުގައި ރާއްޖެ ޒިޔާރަތް ކުރި ފަތުރުވެރިންގެ އަދަދަށް ވުރެ 14 ޕަސެންޓު އިތުރު އަދަދެކެވެ.
ޓޫރިޒަމް މިނިސްޓަރީން އާންމުކޮށްފައިވާ ތަފާސް ހިސާބުތަކަށް ބަލާއިރު، މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައި ވަނީ ރަޝިއާއިންނެވެ. އެގައުމުން 10،697 ފަތުރުވެރިން ރާއްޖެއަށް ޒިޔާރަތް ކޮށްފައިވެ އެވެ. ރަޝިއާ އަކީ މިދިޔަ އަހަރު ދެވަނައަށް ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރި ގައުމެވެ.
މިއަހަރުގެ ފުރަތަމަ އެގާރަ ދުވަހު ރާއްޖެއަށް 33 އެއާލައިނަކުން ދަތުރުތައް ކޮށްފައިވެ އެވެ. އޭގެތެރޭގައި ޗައިނާއިން ރާއްޖެއަށް ދަތުރުތައް ފެށުމަށް ހަމަޖެހިފައިވާ ބައެއް އެއާލައިންތައް އަދި ނުހިމެނެ އެވެ. ޗައިނާއަކީ ކޮވިޑުގެ ކުރިން ރާއްޖެއަށް އެއް ގައުމަކުން އެންމެ ގިނަ ފަތުރުވެރިން ޒިޔާރަތް ކުރާ ގައުމެވެ.
މިދިޔަ ދެ އަހަރަށް ވުރެ ގިނަ އަދަދަކަށް މިއަހަރުގެ މިހާތަނަށް ރާއްޖެއަށް ފަތުރުވެރިން ޒިޔާރަތް ކޮށްފައި ވާއިރު، މިދިޔަ ހޮނިހިރު ދުވަހަކީ ވެލާނާ އިންޓަނޭޝަލް އެއާޕޯޓުގެ ތާރީހުގައި އެންމެ ގިނަ އެއާ ޓުރެފިކް މޫވްމަންޓު ރިކޯޑު ކުރެވުނު ދުވަސް ވެސްމެ އެވެ.
ކޮންމެ އަހަރަކު ވެސް ވިލާތުގެ ގައުމުތަކުން ރާއްޖެއަށް އެންމެ ގިނަ ފަތުރުވެރިން އަންނަނީ މިދުވަސްވަރެވެ.
