ސައުތު އޭޝިއާގެ ބާސްކެޓްބޯޅަ ފެޑެރޭޝަން (ސާބާ) ރައީސް އަކަށް ރާއްޖޭގެ ބާސްކެޓްބޯޅަ އެސޯސިއޭޝަން (އެމްބީއޭ)ގެ ރައީސް، އަހުމަދު އާދަމް (އެޑަމް) އިންތިހާބުވެވަޑައިގެންފި އެވެ.
ބާސްކެޓްބޯޅައިގެ ސަރަހައްދީ ޖަމިއްޔާގެ ރައީސްކަމަށް އެޑަމް އިންތިހާބުވެވަޑައިގަތީ މިއަދު މެންދުރު އިންޑިއާގައި ކުރިއަށްދިޔަ ސާބާ ކޮންގްރެސްގަ އެވެ. ކޮންގްރެސްގައި ބައިވެރިވީ އިންޑިއާ، ރާއްޖެ، ނޭޕާލް، ސްރީ ލަންކާގެ އިތުރުން ބަންގްލަދޭޝް އިންނެވެ.
މި ކޮންގްރެސްގައި ދެކުނު އޭޝިއާގެ ބާސްކެޓްބޯޅައިގެ އެންމެ އިސް މަގާމަށް އެޑަމްގެ ނަން ހުށަހަޅާފައިވަނީ ބަންގްލަދޭޝް އިންނެވެ. ކޮންގްރެސްގައި ބައިވެރިވި ހުރިހާ ގައުމަކުންވަނީ ރައީސްކަމަށް އެޑަމް އަށް ތާއީދު އޮތްކަން ހާމަކޮށްފަ އެވެ.
ކުރިއަށް އޮތް ހަތަރު އަހަރަށް ސާބާގެ ރައީސަކަށް އެޑަމް ހޮވިއިރު، ޖެނެރަލް ސެކްރެޓަރީ އަށް ހޮވާފައިވަނީ އިންޑިއާގެ ޗަންދްރަމުކީ ޝަރުމާ އެވެ.
ބާސްކެޓްބޯޅަ އެސޯސިއޭޝަންގެ ރައީސްކަމާ 2019 ވަނަ އަހަރު ހަވާލުވެވަޑައިގެންނެވުމަށް ފަހު އެޑަމް އަންނަނީ ރާއްޖޭގެ ބާސްކެޓްބޯޅައަށް ހެޔޮ ބަދަލުތަކެއް ގެންނަމުންނެވެ. ކޮވިޑުގެ ސަބަބުން ކުޅިވަރުތައް ހުއްޓާލަން ޖެހުނު ދަނޑިވަޅުގައިވެސް ގިނަ ކުޅުންތެރިންތަކެއް ތަމްރީނު ވަމުންދިޔަކަން ފާހަގަކޮށްލަން ޖެހެ އެވެ.
އެ ގޮތުން ކޮވިޑަށް ފަހު އެންމެ އަވަަހަށް މުބާރާތްތަށް ފެށި އެއް ކުޅިވަރުގެ ތެރޭގައި ބާސްކެޓްބޯޅަ ފާހަގަކޮށްލެވެ އެވެ. އެެއީ ވެސް އެޑަމްގެ މޭސްތިރިކަމުގެ ދަށުން ހަރުދަނާކޮށް އެސޯސިއޭޝަން ހިންގުމުގައި ކުރި މަސައްކަތުގެ ނަތީޖާ އެވެ.
އަންހެން ބާސްކެޓް ކުރިއެރުވުމާއި، ޖޫނިއާ ޓީމުތައް ކުރިއެރުވުމުގައި ސަރަހައްދީ ގޮތުން ވެސް އެޑަމް ވަނީ މީގެ ކުރިން ގިނަ މަސައްކަތްތަކެއް ކުރައްވައިފަ އެވެ. އޭގެ ތެރޭގައި ދެމެހެއްޓެނިވި ގޮތެއްގައި ކުރިއަށް ނުގެންދެވޭ މުބާރާތްތައް އަލުން ފެށީވެސް އެޑަމް އިސްކޮށް ހުންނަވަ އެވެ. އޭގެ ތެރޭގައި މިދިޔަ އަހަރު އިންޑިއާގައި އޮތް 18 އަހަރުން ދަށުގެ ފީބާ އޭޝިއާ ކޮލިފައިންގެ ސަރަހައްދީ މުބާރާތާއި، މާލޭގައި ބޭއްވި އަންހެން ސާބާ ޗެމްޕިއަންޝިޕް ފާހަގަކޮށްލެވެ އެވެ. އަންހެން ސާބާ ޗެމްޕިއަންޝިޕް ބޭއްވީ ހަ އަހަރުގެ މެދު ކެނޑުމަކަށްފަހު އެވެ.
ސާބާގެ ރައީސްކަމުގެ މަގާމަށް އެޑަމް އިންތިހާބުވެވަޑައިގެންނެވުމާ އެކު ކުރިއަށް އޮތް އަހަރުތަކުގައި ރާއްޖޭގެ ބާސްކެޓްގެ ކުރިއެރުމަށް ގިނަ ފުރުސަތުތަކެއް ލިބޭނެ އެވެ. މިގޮތުން ގިނަ މުބާރާތްތައް ބޭއްވުމާއި ޓެކްނިކަލް އޮފިޝަލުންނަށް ފުރުސަތުތައް ހޯދައިދޭން މަސައްކަތް ކުރައްވާނެ ކަމަށް އެޑަމް ވިދާޅުވި އެވެ.
"މިއީ އަސްލު ރާއްޖޭގެ ބާސްކެޓަށް ލިބުނު ކުރިއެރުމެއްގެ ގޮތުގައި ދެކެނީ. ރާއްޖެ އަށް މި ގައުމުތަކުން އިތުބާރުކުރާކަން މި އެނގުނީ،" އިންޑިއާގައި ހުރެ ފޯނުން "އަދަދު" އަށް އެޑަމް ވިދާޅުވި އެވެ.
"މިއީ ހުރިހާ ގޮތަކުން ބަލާއިރުވެސް ރާއްޖޭގެ ބާސްކެޓްގެ ކުރިއެރުމަށް ގިނަ ފުރުސަތުތައް ހުޅުވޭނެ ކަމެއް. މި މަގާމުގައި ހުރެ އަޅުގަނޑު މަސައްކަތްކުރާނަން އިތުރަށް ރާއްޖޭގެ ބާސްކެޓަށް ބައިނަލްއަގްވާމީ ފުރުސަތުތައް ހޯދައިދޭން"
މޯލްޑިވްސް އޮލިމްޕިކް ކޮމިޓީގައި ވެސް މަސައްކަތް ކުރައްވަމުން އަންނަ އެޑަމް ސާބާގެ ރައީސްގެ މަގާމަށް އިންތިހާބުވިއިރު، މި އަހަރަކީ ގިނަ ހަރަކާތްތަކެއް ސާބާ އިން ކުރިއަށް ގެންދަން ރާވާފައި ހުރި އަހަރެކެވެ. އެ ގޮތުން ސާބާ އަންހެން އަދި ފިރިހެން ސީނިއާ މުބާރާތާއި، ޖޫނިއާ މުބާރާތްތަކެއް ވެސް ކުރިއަށް ގެންދަން އަންނަނީ މަސައްކަތް ކުރަމުންނެވެ.
