ފެށުނު އަހަރުގެ ފުރަތަމަ ހަތަރު ދުވަހު 22،000 އަށް ވުރެ ގިނަ ފަތުރުވެރިންނަށް ރާއްޖޭން މަރުހަބާ ކިޔާފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ޓޫރިޒަމް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު، މިއަހަރުގެ ފުރަތަމަ ހަތަރު ދުވަހު ރާއްޖެ އައި ފަތުރުވެރިންގެ ޖުމްލަ އަދަދު 22،297 އަށް އަރަ އެވެ.
މިއީ މިދިޔަ އަހަރާ އަޅާބަލާއިރު ހަތް ޕަސަންޓުގެ އިތުރުވުމެކެވެ. މިދިޔަ އަހަރުގެ ފުރަތަމަ ހަތަރު ދުވަހު ރާއްޖެއަށް އައިސްފައިވަނީ 20،842 ޓޫރިސްޓުންނެވެ.
މިއަހަރުގެ އެހާތަނަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ރަޝިއާ އިންނެވެ. އެ ގައުމުން 4،402 ޓޫރިސްޓުން ޒިޔާރަތްކޮށްފައިވާއިރު، ދެވަނައިގައި އޮތް އިޓަލީން އައީ 3،854 މީހުނެވެ. މިދިޔަ އަހަރު އެންމެ ގިނައިން ފަތުރުވެރިން އައި އިންޑިއާ އޮތީ ތިންވަނައިގަ އެވެ.
ޓޫރިސްޓު އެރައިވަލްއަށް މިއަހަރު ރަނގަޅު ފެށުމެއް ލިބިފައިވާއިރު، މިދިޔަ އަހަރު ސަރުކާރުން އަމާޒުކަނޑައެޅި 1.5 މިލިއަނަށް ވުރެ އިތުރަށް ފަތުރުވެރިން ރާއްޖޭގައި ޗުއްޓީ ހޭދަކޮށްފައިވެ އެވެ.
މިގޮތުން، މިދިޔަ އަހަރު ޖުމްލަ 1،675،294 ޓޫރިސްޓުން އައި ކަމަށް ސަރުކާރުން ބުނެ އެވެ.
މިއީ ކޮވިޑުގެ ހާލަތުގެ ކުރިން 2019 ވަނަ އަހަރު ޒިޔާރަތްކުރި 1.7 ޓޫރިސްޓުންގެ އަދަދާާ ދާދި އެއްވަރުގެ އަދަދެކެވެ.
ކޮވިޑުގެ ހާލަތު އެންމެ ގޯސް ވެގެން ރާއްޖޭގެ ބޯޑަރު ތިން މަހަށް ވުރެ ގިނަ ދުވަހަށް ބަންދު ކުރި، 2020 ވަނަ އަހަރު އައިސްފައި ވަނީ 555،494 ޓޫރިސްޓުން ނެވެ. ޖެހިގެން އައި 2021 ވަނަ އަހަރު އައިސްފައި ވަނީ 1.3 މިލިއަން ޓޫރިސްޓުންނެވެ.
