ވެރިކަން ކުރުމުގެ ނިޒާމު ބަދަލުކުރުމާ ގުޅޭ ވޯޓެއް ނެގުމާ މެދު ގޮތެއް ނިންމުން އޮތީ ކޯލިޝަންގެ އަތްމަތީގައި ކަމަށާއި ކޯލިޝަންގެ ބައިވެރިންގެ ރުހުން ނެތި އެފަދަ ކަމެއް ކުރެވެން ނެތް ކަމަށް ރައީސް އިބްރާހީމް މުހައްމަދު ސޯލިހް މިއަދު ވިދާޅުވެއްޖެ އެވެ.
ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކުރުމަށް މަސައްކަތް ކުރައްވަނީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދެވެ. ނަޝީދު ވިދާޅުވަމުން ގެންދަވާ ގޮތުގައި، އެ ކަމަށް ފެންނަ ނުފެންނަ ވޯޓެއް ނެގުމަކީ ރިޔާސީ އިންތިހާބުގައި ވެފައިވާ ވައުދެކެވެ.
މިހާރު ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ސޯލިހް ވިދާޅުވީ ކޯލިޝަންގެ މެނިފެސްޓޯގައި ނިޒާމު ކަނޑައެޅުމަށް ފެންނަ ނުފެންނަ ވޯޓެއް ނެގުމުގެ ވާހަކައެއް ނޯންނާނެ ކަމަށެވެ.
"އެ މެނިފެސްޓޯގައި ނޯންނާނެ މި ފަސް އަހަރު ތެރޭ ނިޒާމީ ވޯޓެއް ނަގާ ވާހަކައެއް، މެނިފެސްޓޯގައި ނެތް ކަމެއް ކުރަން ވެއްޖެނަމަ ދެން ކުރަން ޖެހޭނެ ކަމަކީ ކޯލިޝަންގެ ބައިވެރިންނާ އެކު މަޝްވަރާކުރުން. އެ ކަން ކުރަން ލަފާ ލިބިގެން އަޅުގަނޑަށް ކުރިއަށް ދެވޭނީ،" ރައީސް ވިދާޅުވި އެވެ.
ރައީސް އެހެން ވިދާޅުވިއިރު، އެމްޑީޕީގެ ކޮންގްރެސްއަށް ހުށަހެޅި "ޖަޒީރާ ރާއްޖެ" މެނިފެސްޓޯގައި ވެރިކަމުގެ ނިޒާމު ބަދަލުކުރާން ހިމަނާފައި އޮތެވެ. ފަހުން ކޯލިޝަންގެ މެނިފެސްޓޯ ލޯންޗުކުރިއިރު، އެ މެނިފެސްޓޯގައި ނިޒާމުގެ ވާހަކަ ވަނީ އުނިކޮށްފަ އެވެ.
ވެރިކަމުގެ ނިޒާމު ބަދަލުކުރުމަށް ނަޝީދު ވަކާލާތު ކުރައްވާއިރު، އަންނަ ރިޔާސީ އިންތިހާބުގައި ވާދަކުރާނެ އެމްޑީޕީގެ ކެންޑިޑޭޓް ކަނޑައެޅުމަށް ބާއްވާ އެ ޕާޓީގެ ރިޔާސީ ޕްރައިމަރީގައި ރައީސްގެ އިތުރަށް ނަޝީދު ވެސް ވާދަކުރައްވަ އެވެ.
މީގެކުރިން 2007 ވަނަ އަހަރު ވެރިކަމުގެ ނިޒާމާ ގުޅޭ ގޮތުން ނެގި ފެންނަ ނުފެންނަ ވޯޓުގައި ވެސް ނަޝީދު އަދި އެމްޑީޕީން ތާއީދުކުރީ ބަރުލަމާނީ ނިޒާމަކަށެވެ. ނަމަވެސް މިހާރު އެމްޑީޕީގައި އެ ކަމާ މެދު ހިޔާލުތަފާތުވުންތައް ވަރަށް ބޮޑަށް އެބަ އޮތެވެ. އެގޮތުން, ގިނަ ބަޔަކު ނިޒާމް ބަދަލުކުރަން ދެކޮޅު ހަދައި, ރައީސް ސޯލިހަށް ދެވަނަ ދައުރެއް ދޭން ވަނީ ތާއިދުކޮށްފަ އެވެ.
