މަނީލޯންޑަރިން އާއި ރިޝްވަތު ނެގި ކަމުގެ ކުށަށް ބޮޑު ޖަލު ހުކުމެއް އެ ކޯލިޝަނުގެ ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް އިއްވާނެ ކަމަށް ބެލެވޭއިރު، އިދިކޮޅު ކޯލިޝަނުގެ ސިޔާސީ ކުރިމަގު އޮތީ ސުވާލު މާކެއްގެ ތެރޭގަ އެވެ.
އަންނަ ރިޔާސީ އިންތިހާބަށް އެ ކޯލިޝަނުގެ ރިޔާސީ ޓިކެޓު ޔާމީނަށް އަރުވާފައިވާއިރު، މި ހުކުމާއެކު ވާދަކުރުމުގެ ދޮރު އެމަނިކުފާނަށް މިވަގުތަށް ނަމަވެސް ބަންދުވީ އެވެ.
އެކަމަކު ޔާމީންގެ އަރިސް ބޭފުޅުން ތިއްބެވީ ވަރުގަދަ އަޒުމެއްގަ އެވެ. ޕާޓީގެ ލީޑަޝިޕުން މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުﷲ ވަރަށް ޖޯޝުގައި ހުންނަވައިގެން ވަރުގަދަ މެސެޖުތަކެއް ދެއްވި އެވެ.
އުއްމީދު ގެއްލުވާ ނުލާ ވާހަކަ އެވެ. މާޔޫސްނުވާން ސަޕޯޓަރުންނަށް ދެއްވި ހިތްވަރެވެ. މަތީ ކޯޓުތަކުން ޔާމީންގެ ހުކުމް ބާތިލުކުރާނެ ކަމުގެ އުއްމީދެވެ. އިންތިހާބުގައި އިދިކޮޅުން ޔާމީން ނޫން އެހެން ކެންޑިޑޭޓެއް ނުނުކުންނާނެ ކަމުގެ ޔަގީންކަމެވެ.
އެ ވާހަކަތަކުގެ ތެރެއިން، ތަފާތު އެހެން މެސެޖެއް ވެސް ދެއްވި އެވެ.
"އަޅުގަނޑުމެންނާއެކު އެއްވެސް މަޝްވަރާއެއް ކުރެވޭނީ ރައީސް ޔާމީނާއެކު."
"ސިޔާސީ އެއްވެސް ލީޑަރަކަށް ވެސް ސިޔާސީ އެއްވެސް ޕާޓީއަކަށްވެސް ޕީޕީއެމް/ޕީއެންސީ އާ ދައްކަންޖެހޭ އެއްވެސް ވާހަކައެއް ދެވަނަ ފަރާތަކާ ނުދެއްކޭނެ."
"ރައީސް ޔާމީން މޭޒު ކައިރީގައި ބައިންދަވައިގެން އެމަނިކުފާނާ ނޫނީ ނުކެރޭނެ ދައްކާކަށް."
އިންތިހާބަށް އެހެން ޕާޓީއަކާއެކު ކޯލިޝަނެއް ހެދުމުގެ އިޝާރާތެއް ވެސް މީގެ ކުރިން ލިބިފައިނުވާއިރު، އަބްދުއްރަހީމް އެ މެސެޖު ނިސްބަތް ކުރެއްވީ ކޮން ޕާޓީއަކާ ނޫނީ ކޮން ލީޑަރަކަށް ކަމީ ޝައުގުވެރި ސުވާލެކެވެ.
ކޯލިޝަނުގެ ތަޖުރިބާ "ހިތި" ކަމަށް ހުދު ޔާމީން ވެސް ދާދި ފަހުން ވިދާޅުވެފައިވާއިރު، ޕީޕީއެމް/ޕީއެންސީ އާ ނުވަތަ ސީދާ ޔާމީނާ މަޝްވަރާއެއް ކުރުމުގެ އިޝާރާތެއް މިފަހުން ދެއްވާފައިވަނީ ވެރިކަން ކުރާ މައި ޕާޓީ އެމްޑީޕީގެ ރައީސް އަދި ކުރީގެ މުހައްމަދު ނަޝީދު އެކަންޏެވެ.
އެއީ ނަޝީދުގެ އަމިއްލަ އިއުތިރާފުން ވެސް އެންމެ ބޭނުމެއްގަ އެވެ؛ ވެރިކަމުގެ ނިޒާމު ބަދަލުކުރުމާއި، ބޮޑުވަޒީރުކަމަށް ވަޑައިގަތުމަށް މަގުފަހި ކުރުމެވެ.
ރައީސް އިބްރާހިމް މުހައްމަދު ސޯލިހާ ދެކޮޅަށް އިންތިހާބަށް ނުކުންނަވަން އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނަޝީދު ގެންދަވަނީ ތައްޔާރުވަމުންނެވެ. އެމަނިކުފާނު، ރައީސް ސޯލިހަށް އިތުރު ފުރުސަތެއް ދެއްވަން ބޭނުންފުޅެއް ނުވެ އެވެ.
ނަޝީދުގެ އަމާޒަކީ، ރިޔާސީ އިންތިހާބެއް ބޭއްވުމުގެ ބަދަލުގައި އަންނަ އަހަރު ބަރުލަމާނީ ނިޒާމަށް ފެންނަ ނުފެންނަ ވޯޓެއް ނެގުމެވެ. އެއަށްފަހު ބޮޑުވަޒީރެއްގެ ގޮތުގައި އައްޔަނުވެ، ގައުމުގެ ވެރިކަމަށް ވަޑައިގެންނެވުމެވެ.
އެކަމަށްޓަކައި ޔާމީން އާއެކު މަސައްކަތް ކުރަން ވެސް ތައްޔާރަށް ހުންނެވި ކަމަށް ނަޝީދު މީގެ ކުރިން ވަނީ ވިދާޅުވެފަ އެވެ.
"އަޅުގަނޑު ދެކެނީ ރައީސް ޔާމީން އަޅުގަނޑާއެކު ރާއްޖެއަށް ބަރުލަމާނީ ނިޒާމެއް ގެނައުމަށް މަސައްކަތް ކުރައްވާނެ ކަމަށް، އަދި ފެންނަ ނުފެންނަ ވޯޓެއް ނަގާއިރެއްގައި އެމްޑީޕީ އާއި ޕީޕީއެމްއާއެކުގައި ތިބެގެން ވޯޓަށް ދެވޭނެ ކަމަށް،" 2021 ވަނަ އަހަރުގެ ޖުލައި މަހުގެ ތެރޭގައި ނަޝީދު ވިދާޅުވެފައިވެ އެވެ.
އެމްޑީޕީގެ ރިޔާސީ ޕްރައިމަރީ ކޮންމެ ގޮތަކަށް ފުރޮޅު ނަމަވެސް، ނިޒާމު ބަދަލުކުރުމުގެ ހުވަފެން ނަޝީދު ދޫކޮށްލައްވާނެ ކަމަށް ނުބެލެވެ އެވެ. އެކަން ހާސިލުކުރެއްވުމަށް ޓަކައި ޔާމީންގެ އެހީ ހޯއްދަވަން މަސައްކަތް ކުރެއްވުމުގެ ފުރުސަތު ބޮޑެވެ. އެ ދެ ރައީސުން ސިއްރިއްޔާތުގައި މިފަހުން ބައްދަލުކުރެއްވި ވާހަކަ އެއް ވެސް ތުންތުންމަތިން އަޑުއިވުނެވެ.
ސިޔާސީ މަސްރަހުގެ އޮއިވަރު އެނބުރެމުންދާ ނޫނީ އެނބުރިދާނެ ގޮތްތަކަށް ބަލާނަމަ، އަބްދުއްރަހީމް މިއަދު ދެއްވި މެސެޖު ރައްދުވަނީ ކޮން ބޭފުޅަކަށް ކަަމާމެދު އޮތް ސުވާލުގެ ޖަވާބު ވެސް ލިބޭނެ އެވެ.
