ހާރިޖީ ވަޒީރު އަބްދުﷲ ޝާހިދުގެ އިސްތިއުފާއަށް ގޮވާލާ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުން މިނިސްޓަރުގެ ގެ ކައިރީގައި މިރޭ މުޒާހަރާ ކުރަން ފަށައިފި އެވެ.
ޕީޕީއެމްގެ ތަރުޖަމާނު ހީނާ ވަލީދު "އަދަދު" ނޫހާ ވާހަކަ ދައްކަވަމުން ވިދާޅުވީ، މިރޭގެ މުޒާހަރާއަކީ މި ސަރުކާރުގެ ވައްކަމާއި ކޮރަޕްޝަނުގެ އަމަލުތަކާ އިދިކޮޅުން ކުރަމުންދާ ސިލްސިލާ މުޒާހަރާތަކުގެ ތެރެއިން މުޒާހަރާއެއް ކަމަށެވެ.
"ކޮރަޕްޓު މީހުންނަށް، މި ސަރުކާރުގައި ވައްކަން ކުރަމުންދާ މީހުންނަށް އަމާޒުކޮށް ހިންގަމުންދާ މުޒާހަރާތަކެއް މިއީ،" ހީނާ ވިދާޅުވި އެވެ.
ސޯސަންމަގުގައި ހުންނަ ޝާހިދުގެ ގެ ކުރިމައްޗަށް އެއްވެ، މުޒާހަރާގެ ބައިވެރިން ދަނީ ޝާހިދުގެ އިތުރުން ރައީސް އިބްރާހިމް މުހައްމަދު ސޯލިހާއި ސަރުކާރުގެ ގިނަ ވަޒީރުންގެ އިސްތިއުފާއަށް ގޮވާލަމުންނެވެ.
މައުލޫމާތު ލިބޭ ގޮތުގައި ފުލުހުން އަންނަނީ މިހާރު މުޒާހަރާގެ ބައިވެރިން އެ ސަރަހައްދުން ދުރަށް ޖެއްސުމަށް މަސައްކަތް ކުރަމުންނެވެ. މިހާތަނަށް މި މުޒާހަރާއިން އެއްވެސް މީހަކު ހައްޔަރުކޮށްފައިވާ ކަމަށް މައުލޫމާތު ލިބިފައެއް ނުވެ އެވެ.
ނަމަވެސް މާލޭގައި މުޒާހަރާ ކުރުން މި ސަރުކާރުން އޮތީ މަނާކޮށްފަ އެވެ. އަދި މީގެ ކުރިން އިދިކޮޅުން ބޭއްވި ވަރަށް ގިނަ މުޒާހަރާތައް ބާރުގެ ބޭނުންކޮށްގެން ރޫޅާލުމަށްފަހު މީހުން ވެސް ހައްޔަރުކޮށްފައިވެ އެވެ.
