އިންޑިއާގެ އެފްކޮންސް ކުންފުނިން މާލެ އާއި ތިލަފުއްޓާއި ދެމެދު އަޅަމުންދާ ބުރިޖުގެ މަސައްކަތް ހުއްޓިފައިވާ ކަމަށް ބުނެ ފަތުރަމުންދާ ވާހަކަތައް ޕްލޭނިން މިނިސްޓްރީން ދޮގުކޮށްފި އެވެ.
ބައެއް މީޑިއާތަކުން މިގޮތަށް ރިޕޯޓު ކުރުމާއި ގުޅިގެން "އަދަދު" އިން ސުވާލުކުރުމުން ޕްލޭނިން މިނިސްޓްރީގެ ޕްރޮޖެކްޓް މެނޭޖިން ޑިޕާޓްމަންޓު ޔުނިޓުގެ މުހައްމަދު ޖިނާހު ވިދާޅުވީ ބުރިޖުގެ މަސައްކަތް ނުހުއްޓޭ ކަމަށާއި މިއަދުވެސް ބައެއް ސައިޓުތަކުގައި މަސައްކަތް ކުރަމުންދާ ކަމަށެވެ.
ސޯޝަލް މީޑިއާގައި އާންމުވެފައިވާ، މާލޭގައި ބުރިޖުގެ މަސައްކަތް ކުރާ ސައިޓު ހުސްކޮށް އޮތް މަންޒަރު ފެންނަ ވީޑިއޯ އާއި ގުޅިގެން ސުވާލުކުރުމުން ޖިނާހު ވިދާޅުވީ މި މަހުގެ 15 ވަނަ ދުވަހުގެ ރޭ ދަންވަރު ބުރިޖުގެ މަސައްކަތްކުރާ ބިދޭސީން ދިރިއުޅޭ ބްލޮކުގައި ހިނގި އަލިފާނުގެ ހާދިސާއާއި ގުޅިގެން ގެއްލުންވި މުވައްޒަފުން ލައްވާ މިވަގުތު އެފްކޮންސް އިން މަސައްކަތް ކުރަމުން ނުދާ ކަމަށެވެ.
މިކަމާއި ގުޅިގެން ބައެއް ސައިޓުތަކުގެ އެކި މަސައްކަތްތައް މިދުވަސްކޮޅު މަސައްކަތް ނުކުރި ނަމަވެސް ވީހާވެސް އަވަހަކަށް އެ މުވައްޒަފުންވެސް އެނބުރި މަސައްކަތަށް ނިކުންނާނެ ކަމަށް ވިދާޅުވި އެވެ.
ޖިނާހު އިތުރަށް ވިދާޅުވީ މާލެ ސައިޓުގައި ވެސް މިއަދު ބައެއް މަސައްކަތްތައް ކޮށްފައިވާ ކަމަށެވެ.
ގުޅީފަޅުގައި ހިނގި އަލިފާނުގެ ހާދިސާގައި އެފްކޮންސް މުވައްޒަފުންގެ އެކޮމޮޑޭޝަން ބްލޮކް އެއްކޮށްހެން އެނދި އިރު އެ ހާދިސާއަށްފަހު އެތަނުގައި ދިރިއުޅެމުންދިޔަ އެކަކު ގެއްލިގެން ފުލުހުން އަންނަނީ އޭނާ ހޯދުމުގެ މަސައްކަތް ކުރަމުންނެވެ. ހާދިސާގައި އެކިވަރުގެ އަނިޔާވެގެން 78 މީހަކު ހޮސްޕިޓަލްތަކަށް ގެންގޮސް ފަރުވާދީފައިވެ އެވެ. އޭގެތެރެއިން 32 މީހަކު ފަރުވާ ދިނުމަށް އެނދުމަތި ކުރެވުނުއިރު، މިހާރު ފަރުވާދެމުން އަންނަނީ ހަތަރު މީހަކަށެވެ.
