ގްރޭޓާ މާލެ ކަނެކްޓިވިޓީ ބްރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނީގެ މުވައްޒަފުން ތިބުމަށް ގުޅީފަޅުގައި ހަދާފައިވާ އެކަމޮޑޭޝަން ބްލޮކެއްގައި ހިނގި އަލިފާނުގެ ހާދިސާއާ ގުޅިގެން ބްރިޖް މަސައްކަތުގެ ޝެޑިއުލަށް އެއްވެސް އަސަރެއް ކުރާނެތޯ ބަލަމުންދާ ކަމަށް ޕްލޭނިން މިނިސްޓްރީން ބުނެފި އެވެ.
މިދިޔަ ބުރާސްފަތި ދުވަހުގެ ރޭ ދަންވަރު އަނދައި ހުލިވީ 465 މީހުން އުޅެމުން ދިޔަ އެކަމޮޑޭޝަން ބްލޮކެއްގަ އެވެ. އޭގެ ތެރެއިން 73 މީހަކަށް އަނިޔާވި އެވެ. 13 މީހަކު އައިޖީއެމް ހޮސްޕިޓަލަށް އަދި 60 މީހުން ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ގެންގޮސް ފަރުވާ ދެމުން އެބަ ދެ އެވެ.
އެ ހާދިސާއާ ގުޅިގެން ބްރިޖްގެ މަޝްރޫއަށް ކަނޑައަޅާފައިވާ ޝެޑިއުލަށް އެއްވެސް އަސަރެއްކުރާނެތޯ ސުވާލު ކުރުމުން ޕްލޭނިން މިނިސްޓްރީގެ ޕްރޮޖެކްޓް މެނޭޖިންގް ޑިޕާޓްމަންޓް ޔުނިޓުގެ މުހައްމަދު ޖިނާހު "އަދަދު" ނޫހަށް ވިދާޅުވީ އެ ކަމާ ގުޅިގެން މިނިސްޓްރީން އެސެސްމެންޓެއް ހަދަމުންދާ ކަމަށެވެ.
"މި ވަގުތަށް ބުނަން ވަރަށް އުނދަގޫ، އެއްވެސް އަސަރެއް ކުރާނެތޯ ނުވަތަ ނުކުރާނެތޯ ވެސް، މިނިސްޓްރީން އެ ކަން ބަލަމުން ދަނީ، ބެލުމަށް ފަހު އެ އެސެސްމެންޓްގެ ނަތީޖާއިން، ނިންމަން އެނގޭނީ ކުރާނެ އަސަރެއް ވެސް،" ޖިނާހް ވިދާޅުވި އެވެ.
ޖިނާހް އިތުރަށް ވިދާޅުވީ ހުޅުމާލެއާއި ގުޅީފަޅުގައި ހުރި އެފްކޮންސްގެ އިތުރު އެކަމޮޑޭޝަން ބްލޮކްތަކާއި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހަމަޖެއްސި އެކަމޮޑޭޝަންއާ އެކު، ހާދިސާ ހިނގި ބްލޮކްގައި ތިބި މުވައްޒަފުންނަށް މިހާރު ހިޔާވަހިކަމެއް ހަމަޖެއްސިފައިވާ ކަމަށެވެ.
އެފްކޮންސްއިން އިން އިއްޔެ ހެނދުނު ނެރުނު ބަޔާނެއްގައި ބުނެފައި ވަނީ "ހުރިހާ މަސައްކަތްތެރިން ސަލާމަތްކުރެވުނު،" ކަމަށާއި ހޮސްޕިޓަލްގައި ފަރުވާ ދެމުން އަންނަ މީހުންނަށް ލިބިފައިވަނީ ކުދިކުދި އަނިޔާ ކަމަށެވެ. އަދި އެ އެންމެންގެ ހާލު ރަނގަޅު ކަމަށް ވެސް އެ ކުންފުނިން ބުނެ އެވެ.
ޕްލޭނިން މިނިސްޓްރީން މީގެ ކުރިން ބުނެފައިވާ ގޮތުން މާލެއިން ތިލަފުއްޓާ ހަމައަށް އަޅާ ބްރިޖާއި ގުޅީފަޅުގައި ގާއިމްކުރާ ވިޔަފާރި ޕޯޓްގެ މަޝްރޫއު އެއްކޮށް ނިންމައިލެވޭނީ 2024 ވަނަ އަހަރަށެވެ. އެހެންވިޔަސް، އަންނަ އަހަރުގެ ނިޔަލަށް ގުޅީފަޅާ ހަމައަށް ބްރިޖް އެޅޭނެ ކަމަށެވެ.
