ހުޅުމާލެ ބޭރުގައި އަޅާފައި އޮތް ސަފާރީއެއްގައި ވަރަށް ބޮޑަށް އަލިފާން ރޯވެގެން އަލިފާން ނިއްވުމަށް އެމްއެންޑީއެފްއިން ހަރަކާތްތެރިވާން ފަށައިފި އެވެ.
އަލިފާން ރޯވީ “އެމްޕެރާ އެކްސްޕްލޯރާ” ނަމަކަށް ކިޔާ ސަފާރީއެއްގަ އެވެ. އެމްއެންޑީއެފްގެ ފަޔާ އެންޑް ރެސްކިއު އާއި ފުލުހުން އަންނަނީ އަލިފާން ނިއްވާލުމަށް މަސައްކަތް ކުރަމުންނެެވެ.
ވީޑިއޯތަކުން ފެންނަ ގޮތުގައި އެ ސަފާރީގެ ބޮޑު ބައެއްގައި އަލިފާންގަނޑު ހިފައި އަންަނަނީ ފެތުރެމުންނެވެ. ފަޅުވެރިން މޫދާ ފުންމާލާ މަންޒަރު ވެސް ވީޑިއޯތަކުން ފެނެ އެވެ.
މި ހާދިސާގައި ދުމުގެ އަސަރު ކުރުމުގެ ސަބަބުން ސަފާރީގެ ދެ ފަޅުވެރިޔަކު ހޮސްޕިޓަލަށް ގެންގޮސް ފަރުވާ ދޭން ފަށާފައިވާ ކަމަށް ފުލުހުން ބުނެ އެވެ.
ޖުމުލަ 13 ކޮޓަރި ހުންނަ މި ސަފާރީ ފަރުމާކޮށްފައި ވަނީ އެއް ފަހަރާ 26 ގެސްޓުންނަށް ހިދުމަތް ދެވޭ ގޮތަށެވެ. މި އުޅަނދަކީ 42 މީޓަރު ދިގުމިނުގައި ހުންނަ އުޅަނދެކެވެ.
މި ސަފާރީގެ ދަތުރުތަކަކީ ޑައިވިންއަށް ހާއްސަކޮށް ކުރާ ދަތުރުތަކެކެވެ. ޑައިވިން ކުރުމަށް ބޭނުންކުރާ ދޯންޏެއް ވެސް ސަފާރީއާއެކު ދަތުރުކުރެ އެެވެ.
