ފ. ފީއަލީ ތެޔޮ ޖެޓީގައި އަޅާފައި އޮތް ތެޔޮ ބޯޓެއްގައި ރޯވި އަލިފާންގަނޑު ފެތުރި އެ ރަށު ބަނދަރުގައި އަޅާފައި އޮތް އިތުރު ހަތަރު އުޅަނދެއްގެ އިތުރުން ބަނދަރު ސަރަހައްދުގައި ހުރި އައިސްޕްލާންޓްވެސް އެއްކޮށް އެނދި ހާދިސާގައި ފިހުނު ބިދޭސީ މިހާ މަރުވެއްޖެ އެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ ހޮސްޕިޓަލުގައި ފަރުވާ ދެމުން އަންނަނިކޮށް އެ މީހާ މަރުވީ މެއި ހަތަރެއްގައި ކަމަށެވެ. އަދި އިއްޔެގެ ވަގުތެއްގައި އެ މީހާގެ ހަށިގަނޑު އަނބުރާ ގައުމަށް ފޮނުވާލާފައިވާ ކަމަށް ފުލުހުން ބުނެ އެވެ.
އެއީ ބަންގަލަދޭޝްގެ ރައްޔިިތެކެވެ. އެ ހާދިސާގައި ދިވެެއްސަކަށް ވެސް އަނިޔާ ލިބުނެވެ. އޭގެ ތެރެއިން ބަންގްލަދޭޝް މީހާ ހަމަ އެ ދުވަހު ސީ އެެމްބިއުލާންސްގައި މާލެ ގެނަ އެވެ.
އެޕްރީލް ނުވައެއެއްގައި ހިނގި ހާދިސާއާ ގުޅިގެން އެ ދުވަހު ފީއަލީ ކައުންސިލް މެންބަރު އަހްޒަމް އަބްދުﷲ އަދަދު އަށް ވިދާޅުވީ އަލިފާނުގެ ހާދިސާގައި ތެޔޮ ބޯޓާއެކު ފާނަމަސްވެރިކަންކުރާ ބޮޑު ދެ ދޯންނާއި ކުޑަ ދޯންޏެއް ވެސް އަނދައި ހުލިވިއިރު، އއައިސްޕްލާންޓްވެސް އަނދައި ހުލުވީ އެތަނުގައި ހުރި ސާމާނާކާ އެކު ކަމަށެވެ.
"އައިސް ޕްލާންޓް ނެތް ބޭނުންކުރެވެން. އައިސްޕްލާންޓް ދެން ޖެހޭނީ އާ ޕްލާންޓެއް ބަހައްޓަން. ހުރިހާ އެއްޗެއް އަނދައި ހުލިވެފައި. ރަށުގައި މަސްވެރިކަން ކުރާ ދެ އޮޑި ހަމަ އެއްކޮށް އަނދާ ހުލުވީ ގާތްގަނޑަކަށް. ބޭނުން ނުކުރެވޭ ވަރަށް،" އޭނާ ވިދާޅުވި އެވެ.
މީގެއިތުރުން އަލިފާނުގެ ހާދިސާއާ ގުޅިގެން ކަންނެލި އޮޑިއަކަށް ވެސް އެކި ވަރުގެ ގެއްލުންތައް ލިބުނުކަން އޭނާ ފާހަގަކުރެއްވި އެވެ.
