މެމްބަރުން ހަމަނުވެގެން ދިވެހި ރައްޔިތުންގެ ޕާޓީ އުވާލުމަށް އިލެކްޝަންސް ކޮމިޝަނުން ނިންމާފައިވާތީ ކޯޓަށް ދިޔުމަށް ނިންމާފައިވާ ކަމަށާއި ޖޭޑީޕީގެ ނަމުގައި ސިޔާސީ ޕާޓީއެއް އުފެއްދުމުގެ ވިސްނުން ގެންގުޅޭ ކަމަށް އެ ޕާޓީން އިއްޔެ ބުނެފި އެވެ.
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުފ ޖާބިރު ލީޑަރަކަށް ހުންނަވާ ޑީއާރްޕީން ނެރުނު ބަޔާނެއްގައި ބުނެފައި ވަނީ ކޮމިޝަނުން ދިން މުއްދަތުގައި މެމްބަރުން ހަމަނުވީ ކޮވިޑް އަދި ކުރިން ޕާޓީ ހިންގި ފަރާތްތަކުން ކޮށްފައިވާ ކަންކަން އިސްލާހު ކުރަން ހަދައިގެން ކަމަށެވެ.
"ޑީއާރްޕީގެ ލީޑާޝިޕުން ޕާޓީއާ ހަވާލުވުމާއެކު އެއިރު ޕާޓީ ހިންގުމުގައި ވެރިންގެ ގޮތުގައި ތިއްބެވި ބޭފުޅުން ހިންގަވާފައިވާ އެކިއެކި ކަންކަމާއި ގުޅިގެން އެކި ތަންތަނަށް ދައްކަންޖެހިފައިވާ ދަރަނީގެ މައްސަލަތައް ހައްލު ކުރުމަށާއި ޕާޓީގެ އިދާރީ ކަންކަން ހަރުދަނާ ކުރަން މަސައްކަތް ފެށިތަނާހެން ކޮވިޑްގެ އާލަމީ ވަބާއާ ކުރިމަތިލާންޖެހި ގިނަ ދުވަސްތަކެއް ވަންދެން އެ ހާލަތުން އަރައިނުވަގެނ ތިބެންޖެހުން،" އެ ބަޔާނުގައިވެ އެވެ.
ކޯޓަށް ގޮސްގެން ޑީއާރްޕީ އުވާލުން ކެންސަލް ނުކުރެވިއްޖެ ނަމަ ޖޭޑީޕީގެ ނަމުގައި ޕާޓީއެއް އުފައްދާނެ ކަމަށް ވެސް އެ ޕާޓީން ބުންޏެވެ.
އެ ޕާޓީން ބުނީ ޕާޓީގެ ހާލަތު ރަނގަޅަށް ކޮމިޝަނަށް އަންގަމުން ގޮސްފައި އޮއްވައި، ޕާޓީ އުވާލަން ނިންމުމަކީ ދިވެހިރާއްޖޭގެ "ޑިމޮކްރަސީ ފުނޑާލުމަށް އިލެކްޝަންސް އިން ފެށި މަސައްކަތެއް" ކަމަށެވެ. އަދި އެ ޕާޓީގެ ޓިކެޓުގައި ޖާބިރު ރިޔާސީ އިންތިހާބުގައި ވާދަ ކުރައްވަން ނިންމަވާފައިވައިރު ޕާޓީ އުވާލުން ބަލައިނުގަނެވޭނެ ކަމަށް ވެސް ބަޔާނުގައިވެ އެވެ.
ޑީއާރްޕީ އުވާލާތީ ފައިސާގެ އެއްވެސް މުއާމަލާތެއް ނުކުރުމަށް އިލެކްޝަންސް އިން އަންގާފައިވާތީ އެ ޕާޓީން ބުނެފައި ވަނީ ދަރަނީގެ ކަންކަމުގައި ގުޅާ ފަރާތްތަކުން އިލެކްޝަންސްއާ ގުޅުމަށެވެ.
