މެޑްރިޑް، (ޑިސެމްބަރު 15) - މެންޗެސްޓާ ޔުނައިޓެޑާއެކު ހަދާފައިވާ ކޮންޓްރެކްޓް މި ދިޔަ މަހު އުވާލުމަށް ފަހު ކުލަބެއް ނެތިފައި ހުރި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ރެއާލް މެޑްރިޑްގެ ޓްރެއިނިން ސެންޓަރުގައި ތަމްރީންތައް ހަދަން ފަށައިފި އެވެ.
ޕޯޗުގަލްއާ އެކު ވޯލްޑް ކަޕްގެ ކުއާޓާ ފައިނަލުން ބަލިވުމަށް ފަހު ރޮނާލްޑޯ މި ވަގުތު ހުރީ ސްޕެއިންގަ އެވެ. ރޮނާލްޑޯ ކުޅުނު ކްލަބްތަކުގެ ތެރެއިން އޭނާ ދިރިއުޅުމަށް ގަނެފައިވާ އެންމެ އަގުބޮޑު ލަގްޒަރީ ވިލާ ހުންނަނީ މެޑްރިޑްގަ އެވެ.
ރޮނާލްޑޯ، 37، އޭނާ އެންމެ ފަހުން ކުޅުނު ޔުނައިޓެޑްގެ ކޮންޓްރެކްޓް އުވާލީ ވޯލްޑް ކަޕްގައި ޕޯޗުގަލް ކުޅުނު ފުރަތަމަ މެޗުގެ ކުރިންނެވެ. ރޮނާލްޑޯގެ ކޮންޓްރެކްޓް އުވާލަން ޔުނައިޓެޑުން ނިންމީ، މަޝްހޫރު ޓީވީ ހޯސްޓް، ޕިއާސް މޯގަން އަށް ދިން އިންޓަވިއުގައި ރޮނާލްޑޯ، ޔުނައިޓެޑްގެ ގިނަ ކަންކަމަށް ވަރަށް ބޮޑަށް ފާޑުކިޔާފައިވާތީ އެވެ.
ޔުނައިޓެޑުގެ ކޮންޓްރެކްޓް އުވާލުމުން އޭނާ ހޯދުމަށް މަސައްކަތްކުރި ކުލަބަކީ ސައުދީގެ އަލް ނަސްރް އިންނެވެ. މުސާރައިގެ ގޮތުން ބަލާއިރު، ރެކޯޑު ކޮންޓްރެކްޓެއް ސައުދީގެ ކުލަބުން ލިބުނު ނަމަވެސް އަދި ރޮނާލްޑޯ ހުރީ ކުރިމަގާ މެދު ގޮތެއް ނިންމުން މަޑުޖައްސާލައިގެންނެވެ.
ރިޕޯޓްތައް ބުނާގޮތުން އަންނަ ހަފްތާގައި ރޮނާލްޑޯ ދެން ކުޅޭނެ ކުލަބު އިއުލާންކުރާނެ އެވެ.
ރޮނާލްޑޯ މިވަގުތު ތަމްރީން ހަދަމުން އަންނަނީ އޭނާގެ ކެރިއަރުގައި އެންމެ ގިނަ ކާމިޔާބީތައް ހޯދި ރެއާލް މެޑްރިޑުގެ ވަލެޑެބާސް ބޭސް ތަމްރީން ފެސިލީޓީގަ އެވެ. އެހެންނަމަވެސް އަނބުރާ ރެއާލާ ރޮނާލްޑޯ ގުޅުމުގެ ފުރުސަތު ހަނިކަމަށް ބެލެވެ އެވެ. ރޮނާލްޑޯ މީގެ ކުރިން ވެސް ރެއާލްގެ ޓްރެއިނިން ފެސިލިޓީތައް ބޭނުންކޮށްފައިވެ އެވެ.
އިނގިރޭސި ކުލަބު ޔުނައިޓެޑުން 2009 ވަނަ ރޮނާލްޑޯ ރެއާލަށް ބަދަލުވީ އޭރުގެ ރެކޯޑު ފީއަކަށެވެ. އޭގެ ފަހުން ރެއާލްގައި ބޮޑެތި އެތައް ކާމިޔާބީތަކެއް ހޯދުމަށް ފަހު އެ ކުލަބު ދޫކޮށް ރޮނާލްޑޯ ދިޔައީ އިޓަލީގެ ޔުވެންޓަސް 2018 ވަނަ އަހަރު އެވެ. ޔުވެންޓަސް ދޫކޮށް މިދިޔަ އަހަރު އަލުން ޔުނައިޓެޑަށް ބަދަލުވުމަށް ފަހު ރޮނާލްޑޯގެ ކުޅުން ދަށްވެ، ކުލަބުން ބޭރުވާން ޖެހުނީ މިހާރުގެ ކޯޗު އެރިކް ޓެން ހާގާ މައްސަލަތައް ޖެހުނު ހިސާބުންނެވެ.
ޓެން ހާގުގެ ފުރަތަމަ އެގާރައިން ރޮނާލްޑޯ އަށް ޖާގަ ނުލިބި ބެންޗުގައި އިންނަން ޖެހުމުން ހިތްހަމަނުޖެހުން ފާޅުކޮށް ރޮނާލްޑޯ ވަނީ އެ ކުލަބުން އޭނާ އަށް އިހުތިރާމް ނުކުރާ ކަމަށް ބުނެފަ އެވެ.
މި ސީޒަން ފެށުމުގެ ކުރިން ރޮނާލްޑޯ ވިއްކާލުމަށް ޔުނައިޓެޑުން ގިނަ މަސައްކަތްތަކެއް ކުރި އެވެ. ޔޫރަޕްގެ ބައެއް ކުލަބުތަކުން ރޮނާލްޑޯ ގަތުމަށް ޝައުގުވެރިކަން ފާޅުކުރި ނަމަވެސް ރޮނާލްޑޯގެ މުސާރަ ބޮޑުވުމުގެ ސަބަބުން ކުލަބުތަކުން ޖެހުނީ އޭނާ އަށް ބިޑުނުކޮށް މަޑުކޮށްލާށެވެ.
އެހެން ނަމަވެސް، ސައުދީގެ އަލް ނަސްރް އިން ވޯލްޑް ކަޕްގެ ތެރޭގައި މިވަނީ ރޮނާލްޑޯ އަށް ތިން އަހަރުގެ ކޮންޓްރެކްޓެއް ހުށަހަޅާފަ އެވެ. ރޮނާލްޑޯގެ ސޮއި ހޯދަން ޗެލްސީން ވެސް ޝައުގުވެރިކަން ފާޅުކުރުމުގެ ފުރުސަތު އެބައޮތެވެ.
