ބެންކޮކް، ތައިލޭންޑް (ޑިސެމްބަރު 10) - ކޮވިޑް ބަލިމަޑުކަމަށް ފަހު ފަތުރުވެރިކަމުގެ ސިނާއަތް ރަނގަޅު ވާން ފަށައި މި އަހަރުގެ ތެރޭގައި 10 މިލިއަން މީހުން ތައިލޭންޑަށް ދަތުރުކޮށްފައިވާ ކަމަށް އެ ގައުމުން ބުނެފި އެވެ.
ކޮވިޑްގެ ކުރިން 2019 ވަނަ އަހަރު 40 މިލިއަން މީހުން ތައިލޭންޑަށް ދަތުރުކުރި އެވެ. އޭގެ ފަހުން ފާއިތުވި ދެ އަހަރުގެ ތެރޭގައި ކޮވިޑް ފެތުރުން ކޮންޓްރޯލް ކުރަން ބޯޑަރު ބަންދުކޮށް ހަރުކަށި ފިޔަވަޅުތައް ތައިލޭންޑުގައި ވެސް އެޅި އެވެ.
ގިނަ ގައުމުތަކުން ފިޔަވަޅުތައް އުވާލައި ބޮޑެތި ލުއިތައް ދޭން ފެށުމުން، ތައިލޭންޑުން ވެސް ވަނީ އަލުން ބޯޑަރު ހުޅުވާލައި ފަތުރުވެރިންނަށް މަރުހަބާ ކިޔަން ފަށައިފަ އެވެ. އެ ގައުމުގެ އުއްމީދަކީ މި އަހަރު ފަތުރުވެރިކަމުން 16 ބިލިއަން ޑޮލަރުގެ އާމްދަނީއެއް ހޯދުމެވެ.
ހޮނިހިރު ދުވަހު 10 މިލިއަން ވަނަ ފަތުރުވެރިޔާ ތައިލޭންޑަށް ދިޔުމާ އެކު މަރުހަބާ ކިޔުމުގެ ގޮތުން ބެންކޮކްގެ ސުވަރްނަބޫމީ އިންޓަނޭޝަނަލް އެއާޕޯޓުގައި ސަގާފީ ނެށުންތެރިންނާއި ބެރު ޖެހުންތެރިންގެ ހުށަހެޅުންތައް ބޭއްވި އެވެ.
"ތައިލޭންޑަކީ އަދިވެސް ދުނިޔޭގެ އެންމެ މަގްބޫލް އެއް ފަތުރުވެރި މަންޒިލްގެ ގޮތުގައި އޮތްކަން ދުނިޔެއަށް ހާމަކުރަން އަޅުގަނޑުމެން ބޭނުން،" އެއާޕޯޓުގައި އޮތް ހަފުލާގައި ބޮޑު ވަޒީރު ޕްރަޔޫތް ޗަން އޮޗާ ވިދާޅުވި އެވެ.
ސަރުކާރުން އަންދާޒާ ކުރާ ގޮތުގައި އަންނަ އަހަރު 23 މިލިއަން ފަތުރުވެރިން ތައިލޭންޑަށް ދާނެ އެވެ. ބައެއް އެނެލިސްޓުން ދެކޭ ގޮތުގައި ކޮވިޑްގެ ކުރިން ފަތުރުވެރިކަން އޮތް ހާލަތަށް އަނބުރާ ދާނެ ކަމަށް ބެލެވެނީ 2024 ގަ އެވެ.
