ޗައިނާގެ ރައީސް ޝީ ޖިންޕިން ސައުދީ އަރަބިއްޔާއަށް ކުރައްވަމުން ގެންދަވާ ދަަތުރުފުޅުގެ ތެރެއިން ބުރާސްފަތި ދުވަހު ރިޔާދްގައި ފަލަސްތީނުގެ ރައީސް މަހްމޫދް އައްބާސްއާ ބައްދަލުކުރައްވައިފި އެވެ.
ބައްދަލުވުމުގައި ޝީ ވިދާޅުވީ ޗައިނާ އާއި ފަލަސްތީނުގެ ގުޅުމަކީ ބޮޑު އިސްކަމެއް ދެއްވާ ގުޅުމެއް ކަމަށާއި ފާއިތުވި 50 އަހަރުގެ ތެރޭގައި އެއް ގައުމު އަނެއް ގައުމަށް އެއްބާރުލުންދީފައިވާ ކަމަށެވެ.
ބައިނަލްއަގްވާމީ އަދި ސަރަހަައްދީ ބަދަލުތަކަށް ބެލުމެއް ނެތި ޗައިނާއިން އަބަދުވެސް ފަލަސްތީނަށް ތާއީދު ކުރާނެ ކަމަށާއި ފަލަސްތީނުގެ ހައްގުތައް އަނބުރާ ހޯދުމަށް ބާރު އަޅުއްވާނެ ކަމަށް ޝީ ވިދާޅުވި އެވެ.
ޝީ އިތުރަށް ވިދާޅުވީ ބައިނަލްއަގްވާމީ އެޖެންޑާގައި ފަލަސްތީނުގެ މައްސަލައަށް އިސްކަން ދޭން ޖެހޭނެ ކަމަށާއި ދެ ދައުލަތުގެ ހައްލު ގެނައުމަށް މަޝްވަރާގެ މިސްރާބު ބަހައްޓަން ޖެހޭ ކަމަށެވެ.
އެ ބައްދަލުވުމުގައި ޗައިނާ އާއި ފަލަސްތީނާ ދެމެދު ފަތުރުވެރިކަމުގައި އެއްބާރުލުން ދިނުމުގެ އެއްބަަސްވުމެއްގައި ސޮއިކުރި އެވެ. އަދި ދެ ގައުމުގެ މެދުގައި މިނިވަން ވިޔަފާރީގެ އެއްބަސްވުމެއް ގާއިމް ކުރަން މަޝްވަރާތައް ކުރިއަަށް ގެންދިޔަ އެވެ.
ފަލަސްތީނުގެ ރައީސް މަހްމޫދް އައްބާސް ވިދާޅުވީ ޗައިނާއާ އެކު އޮތް އެކުވެރިކަމުގެ ގުޅުމާ މެދު ފަލަސްތީން ރައްޔިތުން ފަހުރުވެރިވާ ކަމަށާއި ޗައިނައަކީ އިތުބާރު ކުރެވޭ އެކުވެރިއެއް ކަމަށެވެ.
އޭގެ އިތުރުން ފަލަސްތީނުގެ މައްސަލައިގައި އެއްވެސް ޝަރުތެއް ނެތި ސިޔާސީ، އިގްތިސާދީ، އިޖުތިމާއީ އަދި އެ ނޫން ގޮތްގޮތުން ވެސް ޗައިނާގެ ސަޕޯޓް އަބަދުވެސް ލިބެމުން ދާތީ ޝުކުރު އަދާކުރެއްވި އެވެ.
ފަލަސްތީނުން ގަބޫލު ކުރަނީ "ވަން ޗައިނާ" އުސޫލް ކަމަށާއި ޓައިވާން، ހޮންކޮން އަަދި ޝިންޖިއާންގެ މައްސަަލައިގައި ޗައިނާ ސަރުކާރުގެ ވިސްނުމަށް ތާއީދު ކުރާ ކަމަށް މަހްމޫދް އައްބާސް ވިދާޅުވި އެވެ.
