ދޯހާ، ގަތަރު (ޑިސެމްބަރު 5) - ފީފާ ވޯލްޑް ކަޕްގެ ގަދަ 16 ބުރުގައި މިރޭ ޕެނަލްޓީ ޖަހައިގެން 3-1 އިން ޖަޕާން ބަލިކޮށް، އެންމެ ފަހުގެ ރަނަރަޕް ކްރޮއޭޝިއާ އިން މި ފަހަރުގެ މުބާރާތުގެ ކުއާޓާ ފައިނަލުން ފުރުސަތު ހޯދައިފި އެވެ.
މިރޭގެ މެޗުގެ ފުރިިހަމަ ވަގުތާއި އިތުރު ވަގުތުގެ ދެ ހާފު ނިމުނުއިރު، މެޗު އޮތީ 1-1 އިން އެއްވަރުވެފަ އެވެ. ނަތީޖާ ނެރެން ޕެނަލްޓީ ޖެހިއިރު، މިއީ މި ފަހަރުގެ ވޯލްޑް ކަޕްގައި ޕެނަލްޓީ ޖަހައިގެން ނަތީޖާ ނެރުނު ފުރަތަމަ މެޗެވެ.
އަލް ޖަނޫބް ސްޓޭޑިއަމްގައި މިރޭ ކުޅުނު މެޗުގައި ލީޑުނެގީ ޖަޕާނުންނެވެ ޖަޕާނުން ލަނޑު ޖެހީ 43 ވަަނަ މިނިޓްގައި ޑައިޒެން މައީޑާ އެވެ. މިއީ ރިޓްސޫ ޑޯއާން ނަގައިދިން ހުރަހަކުން އޭރިއާތެރެއިން، ޖަޕާންގެ ކެޕްޓަން، މާޔާ ޔޮޝީޑާ ފައިން ޖައްސާލި ބޯޅަ ގޯލަށް ވައްދާލައިގެން މައީޑާ ޖެހި ގޯލެކެވެ.
މި ލަނޑު ޖެހުމުގެ ކުރިން ޖަޕާނުގެ ޑައީޗީ ކަމާޑާ އަށް ލަނޑެއް ޖަަހަން ރަނގަޅު ފުރުސަތެއް ލިބި ބޭނުމެއް ނުކުރެވުނެވެ.
ދެ ވަނަ ހާފްގެ ކުޅުން ފަށައިގެން ކްރޮއޭޝިއާ އިން ގޯލެއް ޖެހޭތޯ ކުރި މަސައްކަތް ކާމިޔާބުވީ 55 ވަނަ މިނިޓްގަ އެވެ. އޭރިއާތެެރެއަށް ކްރޮއޭޝިއާގެ ޑިފެންޑަރު ޑޭޔާން ލޮވްރެން ނެގި ހުރަހަކަށް ފުންމައިގެންއަރައި، އިވާން ޕެރިސިޗް ވަނީ ބޮލުން ގޯލުގެ ތިރީ ކަނަށް ބޯޅަ ފޮނުވާލައިފަ އެވެ. އެ ބޯޅަ ހުއްޓުވަން ޖަޕާނުގެ ކީޕަރު ޝުއީޗީ ގޮންޑާ އަށް މާ ބޮޑު ކަމެއް ނުކުރެވުނުއިރު، މިއީ ބޮޑެތި މުބާރާތްތަކުގައި ކްރޮއޭޝިއާ އަށް ޕެރިސިޗް ޖަހައިދިން ފުރަތަމަ ލަނޑެވެ.
ލަނޑު ޖެހުމަށް ފަހު ކްރޮއޭޝިއާގެ ޕެރިސިޗް އެ ޓީމުގެ އެހެން ކުޅުންތެރިންނާ އެކު އުފާފާޅުކުރަނީ.
ޕެރިސިޗްގެ މި ގޯލާ އެކު އޭނާ ވަނީ ކްރޮއޭޝިއާގެ ލެޖެންޑަރީ ފޯވާޑް، ޑާވޯ ސުކާގެ ރެކޯޑް މުގުރާލައިފަ އެވެ. ބޮޑެތި މުބާރާތްތަކުގައި (ވޯލްޑް ކަޕާއި ޔޫރޯ) ކްރޮއޭޝިއާ އަށް އެންމެ ގިނަ ގޯލު ޖަހައިދިން ކުޅުންތެރިއެއްގެ ގޮތުގައި ކުރިން އޮތީ ސުކާ އެވެ. ޕެރިސިޗް މިރޭ ޖެހީ ބޮޑެތި މުބާރާތްތަކުގައި ކާމިޔާބުކުރި 10 ވަނަ ލަނޑު ކަމަށްވާއިރު، ސުކާ ނުވަ ގޯލު ޖަހައިގެން ހަދާފައި އޮތް ރެކޯޑަށް ނިމުން އައީ އެވެ.
ދެ ވަނަ ހާފުގައި ކްރޮއޭޝިއާގެ ކެޕްޓަން ލޫކަ މޮޑްރިޗް ޖެހި ވޮލީއެއް ޖަޕާން ކީޕަރު ގޮންޑާ ވަނީ މަތަކޮށްފަ އެވެ.
މެޗުގެ ފުރިހަމަ ވަގުތު ހަމަވިއިރު، ދެ ޓީމު ވަނީ 1-1 އިން އެއްވަރުވެފަ އެވެ. އެހެންވެ، ނަތީޖާ ނެރެން ކުުޅުނީ އިތުރު ވަގުތުގެ ދެ ހާފް އެވެ. އޭގެ ފުރަތަމަ ހާފުގައި ޖަޕާންގެ ކައޯރޫ މިޓޯމާ ޖެހި ބޯޅަ ކްރޮއޭޝިއާގެ ކީޕަރު ޑޮމިނިކް ލިވާކޮވިޗް ވަނީ މަތަކޮށްފަ އެވެ.
އިތުރު ވަގުތުގެ ދެ ވަނަ ހާފްގައި މާ ނުރައްކާތެރި ހަމަލާތަކެއް ފޮނުވާލެވޭ ގޮތެއްނުވި އެވެ. ނަތީޖާ ނެރެން ޖެހުނީ ޕެނަލްޓީ ޖަހާށެވެ. ޕެނަލްޓީގައި ތަރި އަކީ ކްރޮއޭޝިއާގެ ކީޕަރު ލިވާކޮވިޗް އެވެ. ލިވަކޮވިޗް ވަނީ ޖަޕާނުން ޖެހި ހަތަރު ޕެނަލްޓީގެ ތެރެއިން ތިން ޕެނަލްޓީ މަތަކޮށްފަ އެވެ.
ޕެނަލްޓީގައި ޖަޕާންގެ ފުރަތަމަ ޕެނަލްޓީ ޓަކޫމީ މިނަމީނޯ ފޮނުވާލުމުން، ކްރޮއޭޝިއާ ކީޕަރު ލިވާކޮވިޗް ވަނީ މަަތަކޮށްފަ އެވެ. ކްރޮއޭޝިއާ އިން ފުރަތަމަ ޕެނަލްޓީ ފޮނުވާލި ނިކޮލަ ވްލާސިޗް ވަނީ ކާމިޔާބުކޮށްފަ އެވެ. ޖަޕާނުގެ ދެ ވަނަ ޕެނަލްޓީ މިނޯމާ ފޮނުވާލުމުން ވެސް ކީޕަރު ލިވާކޮވިޗް ވަނީ ހުއްޓުވައިފަ އެވެ. ކްރޮއޭޝިއާގެ ދެ ވަނަ ޕެނަލްޓީ ކާމިޔާބުކޮށް، މާސެލޯ ބްރޮޒޮވިޗް ވަނީ ކްރޮއޭޝިއާ އަށް ޕެނަލްޓީގައި ލީޑެއް ނަގައިދީފަ އެވެ. ޖަޕާނުގެ ތިން ވަނަ ޕެނަލްޓީ ޓަކޫމާ އަސާނޯ ވަނީ ކާމިޔާބުކޮށްފަ އެވެ.
ކްރޮއޭޝިއާގެ ތިން ވަނަ ޕެނަލްޓީ ފޮނުވާލި މާކޯ ލިވާޔާ ޖެހި ބޯޅަ ބޭރުވީ ދަނޑީގައި ޖެހިފަ އެވެ. ޖަޕާނަށް ކުޑަ އުންމީދެއް ހޯދައިދޭން ގޮސް އެ ޓީމުގެ ކެޕްޓަން، ޔޮޝީޑާ ފޮނުވާލި ޕެނަލްޓީ ވެސް ކީޕަރު ލިވާކޮވިޗް ވަނީ މަތަކޮށްފަ އެވެ. އެއާ އެކު ކްރޮއޭޝިއާގެ ހަތަރު ވަނަ ޕެނަލްޓީ ޖަހަންދިޔަ މާރިއޯ ޕަސާލިޗް އެ ޕެނަލްޓީ ކާމިޔާބުކޮށް، ކްރޮއޭޝިއާ އަށް ކުއާޓާ ފައިނަލުން ފުރުސަތު ހޯދައިދިނެވެ.
ޖަޕާނުން ފުރަތަމަ ފަހަރަށް ކުއާޓާ ފައިނަލަށް ދިއުމަށް ކުރި ދަތުރު މި ފަހަރު ވެސް މި ނިމުނީ ގަދަ 16 ބުރާ ހަމައިންނެވެ. މީގެ ކުރިން ވެސް ޖަޕާން ވަނީ ތިން ފަހަރު ގަދަ 16 ބުރުގައި ކުޅެފަ އެވެ. އެއީ 2002، 2010 އަދި 2018 ވަނަ އަހަރު އެވެ.
ކުއާޓާ ފައިނަލުގައި ކްރޮއޭޝިއާ އިން ކުޅޭނީ މިރޭ ގަދަ 16 ބުރުގައި ބްރެޒިލާއި ދެކުނު ކޮރެއާ ކުޅޭ މެޗުން މޮޅުވާ ޓީމަކާ އެވެ.
