ޖަޕާނުގެ ފުރަތަމަ އަންހެން ބޮޑުވަޒީރަކަށް ސަނޭ ޓަކައިޗީ އެގައުމުގެ ގާނުނު ހަދާ މަޖިލީހުން އިންތިހާބު ކޮށްފި އެވެ.
މިއީ އެގައުމަށް ތާރީހީ ވަގުތުކޮޅެކެވެ. ލިބަރަލް ޑިމޮކްރެޓިކް ޕާޓީ (އެލްޑީޕީ) އިން އެ ގައުމުގެ އިންތިހާބު ކާމިޔާބުކުރުމަށްފަހު، 64 އަހަރުގެ އަންހެން ލީޑަރު އިއްޔެ ވަނީ މަގާމާ ހަވާލުވެވަޑައިގެންނަވައިފަ އެވެ. އޭނާ ބޮޑުވަޒީރުކަމަށް އައުމަކީ އަންހެނުންނަށް އިސް މަގާމުތަކަށް އައުމަށް ގިނަ ހުރަސްތަކެއް ކުރިމަތިވަފައިވާ ޖަޕާނުގެ ސިޔާސީ މައިދާނަށް އައި ބޮޑު ބަދަލެކެވެ.
ބޮޑުވަޒީރު ޓަކައިޗީ ވަނީ ގޮންޖެހުންތަކާއި ކުރިމަތިލާން ޖެހިފައިވާ ޖަޕާނުގެ އިގްތިސާދު ވަރުގަދަކުރުމަށް ވައުދުވެވަޑައިގެންފަ އެވެ. އޭނާގެ ސަރުކާރުން އެ ގައުމުގެ އާއިލާތަކަށް އެހީތެރިވެ، ކުދި ވިޔަފާރިތަކަށް އެހީތެރިވެ، އަދި ޒުވާނުން ވަޒީފާގެ މައިދާނަށް ނުކުތުމަށް ހިތްވަރުދޭނެ ކަމަށް ވިދާޅުވެފައިވެ އެވެ.
އޭގެ އިތުރުން އޭނާ ވަނީ ޖަޕާނުގެ ދިފާއީ ބަޖެޓު އިތުރުކުރައްވާ، ސަރަހައްދީ ސަލާމަތްތެރިކަން ކަށަވަރުކުރުމަށް އެމެރިކާ ފަދަ ގައުމުތަކާއި ގާތުން މަސައްކަތްކުރައްވާނެ ކަމަށްވެސް ވިދާޅުވެފަ އެވެ.
އެހެން ނަމަވެސް، އޭނާގެ އާ ސަރުކާރު ދަނީ ގޮންޖެހުންތަކާ ކުރިމަތިލައްވަމުންނެވެ. ފަހުގެ އިންތިހާބުތަކުގައި އޭނާގެ ޕާޓީގެ މެޖޯރިޓީ ކުޑަވެފައިވުމާ އެކު، ގާނޫނުތައް ފާސްކުރުމަށް އެހެން ސިޔާސީ ޕާޓީތަކާ އެކު މަސައްކަތްކުރައްވަން އޭނާ އަށް ޖެހިވަޑައިގަންނަވާނެ އެވެ.
ދިފާއީ އަދި ގައުމީ ކަންކަމާއި ގުޅޭގޮތުން އޭނާގެ ވަރުގަދަ ވިސްނުންފުޅުތަކުގެ ސަބަބުން ޗައިނާ އަދި ދެކުނު ކޮރެއާ ފަދަ އަވައްޓެރި ގައުމުތަކާއެކު އޮތް ގުޅުން ގޯސްވެދާނެކަމަށް ސިޔާސީ ކަންކަން ދިރާސާ ކުރާ ފަރާތްތަކުން ބުނެ އެވެ.
ގޮންޖެހުންތައް ހުރި ނަމަވެސް، ޖަޕާނުގެ ގިނަ ބަޔަކު މިއީ ކުރިއެރުމެއްގެ ގޮތުގައި ދެކެ އެވެ. ސަނާއޭ ޓަކައިޗީގެ މި ކާމިޔާބީ އަކީ އިތުރު އަންހެނުން ސިޔާސީ މައިދާނަށާއި ލީޑަރޝިޕް މަގާމުތަކަށް ނުކުތުމަށް ހިތްވަރު ލިބިގެންދާނެ ކަމެއްކަމަށް އޭނާ އަށް ތާއީދުކުރާ ފަރާތްތަކުން ބުނެ އެވެ.
