ހޮންޑާ މެރިންގެ އިންޖީނުތައް ރާއްޖޭގެ ކަނޑުތަކާއި މާހައުލާ އެންމެ ގުޅޭ ގޮތަށް ފަރުމާކުރުމަށްޓަކައި، ކަސްޓަމަރުންގެ ހިޔާލާއި މަޝްވަރާ ހޯދުމަށް ޖަޕާނުގެ ހޮންޑާ މެރިންގެ ހާއްސަ ޓީމެއް ރާއްޖޭގެ އެކި ރަށްރަށަށް ޒިޔާރަތް ކުރަން ފަށައިފި އެވެ.
ހޮންޑާ މެރިން ޖަޕާނުގެ ސާވިސް ޑިޕާޓްމަންޓްގެ އެސިސްޓަންޓް ޗީފް އެޑްމިނިސްޓްރޭޓާ ޓަކަހީރޯ ސަސާކީ ވިދާޅުވީ، މި ދަތުރުގެ މައިގަނޑު ބޭނުމަކީ ހޮންޑާ މެރިންގެ އިންޖީނުތައް ރާއްޖޭގެ ކަނޑުތަކާ ގުޅޭގޮތަށް ފަރުމާކުރުމުގައި ކަސްޓަމަރުންގެ ލަފަޔާއި އިރުޝާދު ހޯދުން ކަމަށެވެ.
މިގޮތުން، ކަސްޓަމަރުންނަށް އެންމެ ފަސޭހައިން އަދި އެންމެ ހަރަދު ކުޑަކޮށް އިންޖީނު ބޭނުންކުރެވޭނެ ގޮތްތައް ދެނެގަތުމަށް މި ދަތުރުގެ ތެރެއިން ދިރާސާތަކެއް ކުރާނެ ކަމަށް އޭނާ ވިދާޅުވި އެވެ.
"މިއީ މުޅި ދުނިޔޭގައި ވެސް އަހަރުމެންނަށް އެންމެ މުހިންމު އެއް މާކެޓު ދެނެގަތުމަށް ލިބޭ ރަނގަޅު ފުރުސަތެއް. އަހަރުމެންގެ ކަސްޓަމަރުން ތިބީ ހިތްހަމަޖެހިފައިކަން ވާހަކަދައްކާލުމުން އެނގޭ. އެކަމަކު ރަނގަޅުކުރަންޖެހޭ ކަންކަން ދެނެގަނެ، އެކަންކަމަށް ކުރިއަށް އޮތްތަނުގައި ފިޔަވަޅުތަކެއް އެޅިގެންދާނެ،" ސަސާކީ ވިދާޅުވި އެވެ.
ފެބްރުއަރީ 2 ވަނަ ދުވަހުގެ ނިޔަލަށް ޖަޕާނުގެ ޓީމުން ކުރާ މި ދަތުރުގައި، ރާއްޖޭގެ އެކި ރަށްތަކަށް ހޮންޑާ މެރިންގެ އިންޖީނު އެޅި އުޅަނދުފަހަރުގައި ފަސިންޖަރުންނާއެކު ދަތުރުކޮށް އިންޖީނުގެ މަސައްކަތްތައް ގާތުން ބަލާނެ އެވެ.
މީގެ އިތުރުން، އިންޖީނުތަކުގެ ފެންވަރު ރަނގަޅުކުރުމަށްޓަކައި ބައެއް އިންޖީނުތަކުގައި ހާއްސަ ޑިވައިސްތައް ހަރުކޮށްގެން އިންވެސްޓިގޭޝަންތަކެއް ކުރިއަށް ގެންދިއުމަށް ވެސް ވަނީ ރޭވިފަ އެވެ. މި ދަތުރުގެ ތެރެއިން އެ ޓީމުން ރާއްޖޭގެ ބޯޓްބިލްޑަރުންނާއި ކަސްޓަމަރުންނާ ބައްދަލުކޮށް ޚިޔާލު ބަދަލުކުރާނެ އެވެ.
ހޮންޑާ މެރިން އިންޖީނަކީ ރާއްޖޭގައި މިވަގުތު ބޭނުންކުރަމުންދާ އެންމެ ތެޔޮ ހަރަދު ކުޑަ، ދުވެލި ބާރު އަދި މެއިންޓެނެންސް ހަރަދު ކުޑަ އެއް އިންޖީނެވެ.
މިއީ ލޮނުގެ އަސަރުން އިންޖީނުގެ ބައިތައް ގިރުމުން ރައްކާތެރިކޮށްދޭ ގޮތަށް ފަރުމާކޮށްފައިވާ އިންޖީނެކެވެ. ހޮންޑާ މެރިންގެ ރާއްޖޭގެ އޮފިޝަލް ޑިސްޓްރިބިއުޓަރަކީ މެރިން ވައިބެވެ. އެ ކުންފުނީގެ ޝޯރޫމް އޯކިޑް މަގުގައި ހުންނައިރު، ސާވިސް ސެންޓަރު ހުންނަނީ މުރަނގަ މަގުގަ އެވެ.
