ދޯހާ، ގަތަރު (ޑިސެމްބަރު 3) - ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ބުރުގައި ކުޅުނު ފުރަތަމަ މެޗުގައި މިރޭ އެމެރިކާ އަތުން 3-1 އިން މޮޅުވެ، ނެދަލެންޑްސް އިން ކުއާޓާ ފައިނަލުން ފުރުސަތު ހޯދައިފި އެވެ.
ނެދަލެންޑްސް އިން ކުއާޓާ ފައިނަލުގައި ކުޅޭނީ މިރޭ އޮސްޓްރޭލިއާ އާއި އާޖެންޓީނާ ކުޅޭ މެޗުން މޮޅުވާ ޓީމަކާ އެވެ.
މިރޭގެ މެޗު ފަށައިގެން އެމެރިކާ އަށް ލީޑުނަގައިދޭން ކްރިސްޓިއަން ޕުލިސިޗް އަށް ލިބުނު ފުރުސަތުން ޖެހި ބޯޅަ ނެދަލެންޑްސްގެ ކީޕަރު އަންދްރެއަސް ނޮޕާޓް ވަނީ މަތަކޮށްފަ އެވެ. އޭގެ ފަހުން މެޗުގެ 10 ވަނަ މިނިޓްގައި މެމްފިސް ޑިޕާއި ވަނީ ނެދަލެންޑްސް އަށް ލީޑުނަގައިދީފަ އެވެ. މިއީ ކައުންޓަ އެޓޭކުގައި ޑަމްފްރީސް ދިން ބޯޅައަކުން ޑިޕާއި ޖެހި ގޯލެކެވެ. އެމެރިކާ އަށް އެއްވަރުކޮށްދޭން ޓިމޮތީ ވެއާ ޖެހި ބޯޅަ ކީޕަރު ނޮޕާޓް ވަނީ މަތަކޮށްފަ އެވެ.
ފުރަތަމަ ހާފުގެ އިތުރު ވަގުތުގައި ނެދަލެންޑްސް އިން ލީޑުފުޅާކުރި އެވެ. މި ލަނޑު ޖެހީ ޑަމްފްރީސް ނެގި ހުރަހަކަށް ހުސްކޮށް އަރައި، ޑޭލީ ބްލިންޑް އެވެ. ބްލިންޑް ފޮނުވާލި ބޯޅަ ވަނީ ގޯލުގެ ކަނަށެވެ.
ބަދަލުތަކެއް ގެނެސްގެން އެމެރިކާ އިން ލަނޑެއް ޖެހޭތޯ ކުރި މަސައްކަތް މެޗުގެ 76 ވަނަ މިނިޓްގައި ކާމިޔާބުކުރި އެވެ. މި ލަނޑު ޖެހީ ޕުލިސިކް ނެގި ހުރަހަކުން ހާޖީ ރައިޓް އެވެ. އޭގެ ފަހުން ނަތީޖާ ހަމަހަމަކުރަން ރައިޓަށް ލިބުނު ފުރުސަތުގައި އޭނާ އަށް ބޯޅަ ލިބުމުގެ ކުރިން ކީޕަރު ނޮޕާޓް ވަނީ އެޓޭކް ހުއްޓުވައިފަ އެވެ. އޭގެ ކުރިން ޑިޕާއި ފަހަތަށް ދިން ބޯޅައެއް ހޯދައި، ރައިޓް ޖެހި ބޯޅައެއް ގޯލު ރޮނގުމަތިން ސަލާމަތްކުރީ ޑަމްފްރީސް އެވެ.
ނެދަލެންޑްސް އަށް އޮތް ޕްރެޝަރު ކަނޑުވާލައި، ތިން ވަނަ ލަނޑު ޖަހައިިދިނީ މެޗުގެ މޮޅު ކުޅުންތެރިޔާ ޑަމްފްރީސް އެވެ. މެޗުގެ 81 ވަނަ މިނިޓްގައި ބްލިންޑް ނެގި ހުރަހަކަށް އަަރައި، ޑަމްފްރީސް ވަނީ ގޯލުގެ ތިރީ ކަނަށް ބޯޅަ އަމާޒުކޮށްލައިފަ އެވެ.
މި މޮޅާ އެކު ނެދަލެންޑްސް ވަނީ ފުރަތަމަ ފަހަރަށް، އެ ޓީމު ވާދަކުރި ތިން ވޯލްޑް ކަޕްގައި ޖެހިޖެހިގެން ތިން ވަނަ ފަހަރަށް ކުއާޓާ ފައިނަލުން ފުރުސަތު ހޯދައިފަ އެވެ. އެއީ 2010 ވަނަަ އަހަރާއި 2014 ވަނަ އަހަރުގެ އިތުރުން މި ފަހަރު އެވެ. ނެދަލެންޑްސް 2018 ވަނަ އަހަރުގެ ވޯލްޑް ކަޕަށް ކޮލިފައިނުވެ އެވެ.
އަނެއްކޮޅުން، ނެދަލެންޑްސްގެ ކޯޗު ލުއީ ވެން ހާލް މި ވަނީ ރެކޯޑަކާ ހަމަކޮށްފަ އެވެ. އެ ގޮތުން (ޕެނަލްޓީ ނުހިމެނޭ ގޮތަށް) ވެން ހާލް ނެދަލެންޑްސް އަށް ވޯލްޑް ކަޕްގައި ކޯޗުކޮށްދިން 11 މެޗުން ވެސް އެ ޓީމު ބަލިވެފައިނުވެ އެވެ. ކުރިން މި ރެކޯޑް އޮތީ ބްރެޒިލަށް ވޯލްޑް ކަޕް ކާމިޔާބު ކޮށްދިން ދެ ކޯޗުން ކަމަށްވާ ލުއިޒް ފިލިޕޭ ސްކޮލާރީ އާއި މާރިއޯ ޒަގާލޯ އެވެ.
