ޕާކިސްތާންގެ ލާހޯރުގައި ކުރިއަށްދިޔަ ސެންޓްރަލް އޭޝިއާ ވޮލީބޯލް ޗެމްޕިއަންޝިޕްގެ ފައިނަލް މެޗުގައި ރެފްރީކަން ކުރުމުގެ ފުރުސަތު ރާއްޖޭގެ ތަޖުރިބާކާރު ރެފްރީ، އަހުމަދު ނަޝީދު (ތުއްތުކޯ) އަށް ލިބިއްޖެ އެވެ.
ސެންޓްރަލް އޭޝިއާގެ ޗެމްޕިއަންކަން އިރާން ބަލިކޮށް ޕާކިސްތާނުން އިއްޔެ 3-1 އިން ހޯދި މެޗުގައި ފުރަތަމަ ރެފްރީކަން ކުރި ތުއްތުކޯ އަކީ މީގެ ކުރިން ވެސް ބައިނަލްއަގުވާމީ ގިނަ މުބާރާތްތަކެއްގައި ރެފްރީކަން ކޮށްފައިވާ ތަޖުރިބާކާރު ރެފްރީ އެކެވެ.
އޭޝިއާ ވޮލީބޯޅައިގެ ވަރުގަދަ ބާރެއް ކަމަށްވާ އިރާން އާއި ދެކުނު އޭޝިއާގެ ޗެމްޕިއަންގެ ގޮތުގައި ތަފާތު ދައްކަމުން އަންނަ ޕާކިސްތާންގެ ވަރުގަދަ ފައިނަލްގައި ތުއްތުކޯ އަށް ރެފްރީކަން ކުރުމުގެ ފުރުސަތު ލިބުމަކީ ރާއްޖެ އަށް ލިބުނު "ގޯލްޑް މެޑަލް" އެއްގެ ގޮތުގައި ރާއްޖޭގެ ވޮލީބޯޅައިގެ ފަރާތްތަކުން ވަނީ ފާހަގަކޮށްފަ އެވެ.
ވޮލީބޯލް އެސޯސިއޭޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން ވީއޭއެމްގެ ރެފްރީސް ކޮމިޝަން ޗެއާމަން ތުއްތުކޯ ވާހަކަ ދައްކަނީ.-- ފޮޓޯ: މުހައްމަދު ޝާބިން/ އަދަދު
ޕާކިސްތާންގައި ކުރިއަށްދިޔަ ސެންޓްރަލް ޒޯން މުބާރާތުގައި ޕާކިސްތާނާއި އިރާންގެ އިތުރުން ދެން ވާދަކުރީ ސްރީ ލަންކާ، ބަންގްލަދޭޝް އަދި އަފްގާނިސްތާން އެވެ. މި މުބާރާތުގެ އެހެން މެޗުތަކުގައި ވެސް ތުއްތުކޯ ވަނީ ރެފްރީކަން ކޮށްފަ އެވެ.
ވޮލީބޯލް އެސޯސިއޭޝަން އޮފް މޮލްޑިވްސް (ވީއޭއެމް)ގެ ރެފްރީސް ކޮމިޝަންގެ ޗެއާމަންކަން އެންމެ ފަހުން ދެ ދައުރުގައި ވެސް ފުރި ތުއްތުކޯ އަކީ ސަރަހައްދީ ލެވަލްގައި ނަން ހިނގާ ކުޅަދާނަ ރެފްރީ އެކެވެ.
ރާއްޖޭގެ ވޮލީބޯޅަ މުބާރާތްތަކުގެ އިސް ރެފްރީއެއްގެ ޒިންމާ އަދާކުރާ ތުއްތުކޯ ވަނީ މީގެ ކުރިން އޭޝިއާގެ އެކި ލެވަލްތަކުގެ މުބާރާތްތަކުގައި އިންސާފުކޮށްފަ އެވެ. އޭގެ ތެރޭގައި އޭޝިއާގެ ގަދަ ބާރުތައް ކުޅެފައިވާ މެޗުތައް ވެސް ހިމެނެ އެވެ.
ވިއްސަށް ވުރެ ގިނަ އަހަރު ވޮލީބޯޅައިގެ އެކި މަސައްކަތްތަކުގައި އުޅެމުން އަންނަ ތުއްތުކޯ އަންނަނީ ދިވެހި ވޮލީބޯޅަ ރެފްރީން ކުރިއަރުވަން ވެސް ގިނަ މަސައްކަތްތަކެއް ކުރަމުންނެވެ.
