އެއްވެ އުޅުމުގެ ގާނޫނުގެ ތެރެއިން މާލެ ސަރަހައްދުގައި އެއްވެ އުޅުން މަނާކުރާ މާއްދާ ހޯމް މިނިސްޓަރު އިމްރާން އަބްދުﷲ ދިފާއުކުރައްވައިފި އެވެ.
ކުރިން ހުއްދަ ހޯދުމަކައި ނުލައި އެއްވުން މަނާ ކުރާ މާއްދާއާ ގުޅޭ ގޮތުން "އަދަދު" އިން ކުރި ސުވާލަށް ޖަވާބުދެއްވަމުން މިނިސްޓަރު އިމްރާން ވިދާޅުވީ ގާނޫނުގެ ތެރެއިން އޮތް މިންވަރަށް އެއްވެ އުޅުމުގެ މިނިވަންކަން އޮންނާނެ ކަމަށެވެ. އަދި ވިދާޅުވީ ކުރީ ސަރުކާރަށްވުރެ ބޮޑަށް މި ސަރުކާރުން އެއްވުމުގެ މިނިވަންކަން ދެމުންދާ ކަމަށެވެ.
"ސިޔާސީ ގޮތުން އަޅުގަނޑުމެން އެއްވުމަކަށް ވަކިގޮތަކަށް އަމަލުކުރާކަށް ނުފޫޒެއް ނުފޯރުވާނަން،" މިނިސްޓަރު އިމްރާން
އެ ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް މުހައްމަދު ހަމީދު އިއްޔެ ވިދާޅުވީ ފުލުހުން މާލެ ސަރަހައްދުގައި ވެސް ދަނީ ވަރަށް ފުޅާ ދާއިރާއެއްގައި އެއްވެ އުޅުމަށް މިނިވަންކަން ދެމުން ކަމަށެވެ.
ނަމަވެސް އެއްވުންތައް އެއްވާ މީހުން ދައްކާ ވާހަކަތަކާއި ހާސިލްކުރަން ބޭނުންވާ ކަންކަމަށް ބަލާ އާންމުގެ މަސްލަހަތަށް ބެލުމަށްފަހު ގާނޫނުތަކުން ހުއްދަނުކުރެވޭ ގޮތަށް އެއްވާ އެއްވުންތައް ފުލުހުން ރޫޅާލާނެ ކަމަށް ވެސް ހަމީދު ވިދާޅުވި އެވެ.
މާލޭގައި އެއްވުން މަނާކޮށް ފާސް ކުރި އިސްލާހު ގާނޫނު އަސާސީއާ ހިލާފް ކަމަށާއި ވެރިކަމަށް ވަޑައިގެން އެ އިސްލާހު އުވާލައްވާނެ ކަމަށް ރައީސް އިބްރާހިމް މުހައްމަދު ސޯލިހު އޮތީ ވިދާޅުވެފަ އެވެ. ނަމަވެސް މިހާތަނަށް ވެސް ސަރުކާރުން ދަނީ އެ މާއްދާ ތަންފީޒު ކުރުމަށް މަސައްކަތް ކުރަމުންނެވެ.
މި މައްސަލައިގައި ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު މިއުވާން މުހައްމަދާ "އަދަދު" އިން ސުވާލުކުރުމުން ވިދާޅުވީ ސަރުކާރުން އެކަމަށް މަސައްކަތް ކުރަމުންދާ ކަމަށާއި އެއްވެ އުޅުމާއި ހިޔާލު ފާޅުކުރުމުގެ މިނިވަންކަމަށް ސަރުކާރުން ފުރިހަމައަށް ތާއީދުކުރާ ކަމަށެވެ.
