މިހާރު ކުރިއަށްދާ ގައުމީ ބިލިއާޑް މުބާރާތް، ލިޓަސް ނެޝަނަލް ބިލިއާޑް ޗެމްޕިއަންޝިޕްގެ ފައިނަލުގައި އެންމެ ފަހުގެ ޗެމްޕިއަން ކްލަބް އީގަލްސް އާއި ދިވެހި ސިފައިންގެ ކްލަބް ބައްދަލުކުރަން ޖެހިއްޖެ އެވެ.
ނޭޝަނަލް ބިލިއާޑް ސެންޓަރުގައި މިހާރު ކުރިޔަށްދާ ޓީމު އިވެންޓްގައި އިއްޔެ ފުރަތަމަ ކުޅެވުނު ސެމީ ފައިނަލް މެޗްގައި ބައްދަލުކުރީ ސިފައިން އާއި އީގަލްސް އެވެ. މި މެޗު 3-0 އިން ކާމިޔާބުކުރީ ދިވެހި ސިފައިންގެ ޓީމުންނެވެ.
އެ ގޮތުން، ސިންގަލްސްގައި ސިފައިންގެ ވަލަރިއާނޯ ވަނީ އީގަލްސްގެ މިގުއެލް 7-3 އިން ބަލިކޮށްފަ އެވެ. އީގަލްސްގެ ހަސަން ޝާޒް މުހައްމަދު އަތުން ސިފައިންގެ ހުސެއިން ފަޔާޒް މޮޅުވީ 7-4 އިންނެވެ. އަދި ސިފައިންގެ އަފީފް އާއި ދުންޏާޒްގެ ޕެއާ އިން ވަނީ 7-4 އިން އީގަލްސްގެ އަހުސަން އާއި އައްބާސްގެ ޕެއާ ބަލިކޮށްފަ އެވެ.
ދެ ވަނަ ސެމީގައި މާޒިޔާ ސްޕޯޓްސް އެންޑް ރެކްރިއޭޝަން އަތުން ކަސްޓަމްސް ރެކްރިއޭޝަން ކްލަބް މޮޅުވީ ފޯރިގަދަ ކުޅުމަކަށް ފަހު 3-2 އިންނެވެ.
ސިންގަލްސްގައި މާޒިޔާގެ އަލީ ފަޔާޒް ވަނީ 7-4 އިން ކަސްޓަމްސްގެ އަހްމަދު ރަމްޒީ ބަލިކޮށްފަ އެވެ. ދެ ސިންގަލްސްގައި މާޒިޔާގެ މަލާޔަން ވަނީ 7-1 އިން ކަސްޓަމްސްގެ ހުސެއިން ސައްމާން އަތުން މޮޅުވެފަ އެވެ. ޑަބަލްސްގައި މާޒިޔާގެ ސަނީފް އާއި އިބްރާހިމް ޝަރީފް އަތުން ކަސްޓަމްސްގެ އަކްސަމް އާއި ނަފީލް ވަނީ 6-7 އިން ކުރިހޯދައިފަ އެވެ. މާޒިޔާގެ އަސްލަމް އާއި ރާޖޭޝް އަތުން ކަސްޓަމްސްގެ ޖީހާން އާއި ހިޝާމް ވަނީ 6-7 އިން ކުރިހޯދައިފަ އެވެ. އަދި މާޒިޔާގެ ޝަރީފް އާއި ސާމިއު ކުޅުނު މެޗުން ކަސްޓަމްސްގެ އުޝްވަތުﷲ އާއި ޒުބައިރާ ވަނީ އެއްވަރުވެފަ އެވެ.
ފައިނަލުގެ ފަހު ޖާގަ އަށް އީގަލްސް އާއި ކަސްޓަމްސް ބައްދަލުކުރި މެޗުން އީގަލްސް ވަނީ ފަސޭހަކަމާ އެކު 3-0 އިން މޮޅުވެފަ އެވެ. ކަސްޓަމްސްގެ ރަމްޒީ އަތުން އީގަލްސްގެ މިގުއެލް 4-7 އިން މޮޅުވިއިރު، ކަސްޓަމްސްގެ ސައްމާން އަތުން އީގަލްސްގެ ޝާޒް މޮޅުވީ ވެސް 4-7 އިންނެވެ. އަދި ކަސްޓަމްސްގެ ޖީހާން އާއި ހިޝާމް އަތުން އީގަލްސްގެ ސާހިލް އާއި އާފީ މޮޅުވީ 5-7 އިންނެވެ.
ގައުމީ ބިލިއާޑް މުބާރާތުގައި މިހާތަނަށް ސިންގަލްސް، ޑަބަލްސް އަދި މިކްސް ޑަބަލްސް އިވެންޓުތައް ވަނީ ނިމިފަ އެވެ. ޝާޒް ބަލިކޮށް ފިރިހެން ސިންގަލްސް ޗެމްޕިއަންކަން ހޯދީ ސާހިލް ހަމީދު އެވެ. އާމިނަތު ހަލީމް (ދިލް) ބަލިކޮށް އަންހެން ސިންގަލްސް ޗެމްޕިއަންކަން ހޯދީ އައިޝަތު އަލީ އެވެ.
ޑަބަލްސް އަށް ބަލާއިރު، އިސްމާއިލް ރަޒީން އާއި ހަސަން ޝަފްރާޒް ބަލިކޮށް ޗެމްޕިއަންކަން ހޯދީ ހަސަން ޝާޒް މުހައްމަދު އާއި އަހުމަދު އިޔާދު ސައީދުގެ ޕެއާ އެވެ. މިކްސް ޑަބަލްސް ފައިނަލުގައި ހުސެއިން ފަޔާޒް އާއި އައިމިނަތު ފާތީ ބަލިކޮށް ޗެމްޕިއަންކަން ހޯދީ ދީނާ އަހުމަދާއި އަލީ ފަޔާޒްގެ ޕެއާ އެވެ.
މި މަހު ތިން ވަނަ ދުވަހުން ފެށިގެން ކުރިއަށްދާ ގައުމީ ބިލިއާޑް މުބާރާތް ނިމޭނީ މާދަމާރޭ އީގަލްސް އާއި ސިފައިން ބައްދަލުކުރާ ޓީމު އިވެންޓް ފައިނަލް މެޗުންނެވެ.
