ލިޓަސް ގައުމީ ބިލިއާޑް މުބާރާތުގެ މިކްސް ޑަބަލްސް އިވެންޓުގެ ޗެމްޕިއަންކަން ދީނާ އަހުމަދާއި އަލީ ފަޔާޒްގެ ޕެއާ އިން ރޭ ހޯދައިފި އެވެ.
ނެޝަނަލް ބިލިއާޑް ސެންޓަރުގައި ރޭ ކުޅުނު މެޗުތަކުގެ ތެރެއިން ފައިނަލުގައި ދީނާ އާއި އަލީ ފަޔާޒްގެ ޕެއާ ވަނީ 7-6 އިން ހުސެއިން ފަޔާޒް އާއި އައިމިނަތު ފާތީގެ ޕެއާ ބަލިކޮށްފަ އެވެ. ސެމީ ފައިނަލުގައި މި ދެ ޕެއާގެ ކުރިމަތިލުމުގައި ދީނާ އާއި އަލީ ފަޔާޒް މޮޅުވީ 4-5 އިންނެވެ.
ފައިނަލުގެ ޖާގަ ހޯދަން ކުޅުނު ސެމީ ފަހު މެޗުގައި ފާތީ އާއި ހުސެއިން ފަޔާޒް މޮޅުވީ ހަސަން ޝާޒް މުހައްމަދާއި އައިމިނަތު އަޒްރާގެ ޕެއާ އަތުންނެވެ. މި މެޗު ދިޔައީ 5-4 އިންނެވެ.
ގައުމީ ބިލިއާޑް މުބާރާތުގެ ޑަބަލްސް އިވެންޓުގެ ޗެމްޕިއަންކަން ހޯދީ ޝާޒް އާއި އަހުމަދު އިޔާދު ސައީދުގެ ޕެއާ އިންނެވެ. ފުރަތަމަ ޑިވިޝަނުގެ ފިރިހެން ސިންގަލްސް ޗެމްޕިއަންކަން ހޯދީ މުހައްމަދު ސާހިލް ހަމީދު އެވެ. އަންހެން ޑިވިޝަނުގެ ތަށި ހާސިލްކުރީ އާއިޝަތު އަލީ އެވެ. އަދި ދެ ވަނަ ޑިވިޝަނުގެ އިސްމާއިލް ޝިޔާމް ވަނީ ތަށި އުފުލާލައިފަ އެވެ.
ގައުމީ ބިލިއާޑް މުބާރާތުގައި ކުރިޔަށް ދެން އޮތީ ރައީސުލްޖުމްހޫރިއްޔާގެ ވާދައިގެ ތައްޓައް ކުޅެވޭ ޓީމު އިވެންޓް ބައެވެ. ލީގު އުސޫލުން ކުޅޭ ޓީމު އިވެންޓް ބައިގައި ފަސް ޓީމެއް ވާދަކުރެ އެވެ. އެއީ މިދިޔަ އަހަރުގެ ޓީމު އިވެންޓް ޗެމްޕިއަން ކަމަށްވާ ކްލަބް އީގަލްސްގެ އިތުރުން ކަސްޓަމްސް ރެކްރިއޭޝަން ކްލަބާއި އައިލޭންޑާސް ހޯޕް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން އަދި ދިވެހި ސިފައިންގެ ކްލަބް އެވެ.
ޓީމު އިވެންޓް ބައިގައި މިއަދު ހަވީރު ކުޅޭނީ ދެ މެޗެވެ. އެއީ އީގަލްސް އާއި ކަސްޓަމްސް ބައްދަލުކުރާ މެޗާއި އައިލެންޑާސްއާ ދެކޮޅަށް މާޒިޔާ ނުކުންނަ މެޗެވެ. މިރޭ މާޒިޔާ އާއި ކަސްޓަމްސް ބައްދަލުކުރާ މެޗުގެ އިތުރުން ދެން އޮތީ އީގަލްސް އާއި ސިފައިންގެ ކުރިމަތިލުމެވެ.
