ބޮޑު ހާދިސާއެއް ހިނގައިގެން އުޅޭކަން ބައެއް މީހުންނަށް އެނގުނީ ފުލުހުން އެ ގެއަށް ވަދެ ގޮވުމުންނެވެ. އެއިރު މ. ނިރުފެހި ގޭގައި ހުރީ ރަނގަޅަށް ހުޅުގަނޑު ހިފައިފަ އެވެ. އެޑްވިން ޖެނިލް، 42، އާއި އޭނާގެ އަނބިމީހާ ސުންދާރީ، 47، ހިމެނުނީ ގެއިން ނުކުތް ފުރަތަމަ މީހުންގެ ތެރޭގަ އެވެ.
ފުރަތަމަ ރޯވީ ތިން ބުރީގެ އިމާރާތުގެ އެންމެ ތިރީ ބައިގަ އެވެ. މަތީ ދެ ބުރިއަކީ ބިދޭސީ މަސައްކަތު މީހުން ދިރިއުޅުމަށް ހަދާފައި ހުރި ދެ ބުރި އެވެ. ގާތްގަނޑަކަށް 10 ކޮޓަރީގައި 40 އާ ގާތްކުރާ އަދަދަކަށް މީހުން އުޅުނެވެ.
ފުލުހުން އައިސް ގޮވުމުން، ޖެނިލް އާއި ސުންދާރީ އަލިފާނާއި ދުމުގެ ތެރެއިން ގެއިން ނުކުތީ އެމީހުންގެ މުދާތައް ވެސް ދޫކޮށްލައިފަ އެވެ. ދެމަފިރިންގެ މާލީ ތަނަވަސްކަމުގެ ވަރަށް ބޮޑު ބަޔަކީ ރަނާއި ގަހަނާ އެވެ. ބޭރަށް ނުކުތުމަށްފަހު، ހިނދުކޮޅެއްގެ ފިކުރަކަށްފަހު ދެމަފިރިން ނިންމީ މުދާކޮޅު ސަލާމަތް ކުރަން އަލުން ގެއަށް ވަނުމަށެވެ.
"ޖެނިލް އާއި ސުންދާރީ އެއީ އެތަނުން ސަލާމަތްވެގެން ނުކުމެވުނު ދެ މީހުން. އެކަމަކު އެ ދެމަފިރިން ނިންމީ އަލުން ގެއަށް ވަދެ، ބައެއް ތަކެތި ސަލާމަތް ކުރެވޭތޯ ބަލަން،" ހާދިސާ ހިނގި ވަގުތު އެތަނުގައި ހުރި ބިދޭސީއަކު މި ނޫހާ ވާހަކަ ދައްކަމުން ބުންޏެވެ.
ރޭގެ އަލިފާނުގެ ހާދިސާގައި މަރުވި ދެމަފިރިން: މަރުވި އެންމެންގެ ހަށިގަނޑު އަދި ދަނެގަނެވިފައެއް ނުވޭ -- ފޮޓޯ: އަދަދު
ރޭގެ އަލިފާނުގެ ހާދިސާގައި ޖުމްލަ 10 މީހަކު މަރުވެފައިވާކަން އެނގޭއިރު އޭގެ ތެރެއިން އަށް މީހުންނަކީ އިންޑިއާ މީހުންނެވެ. އެކަކީ ބަންގްލަދޭޝްގެ ރައްޔިތެކެވެ. އެކަކުގެ ހަށިގަނޑު އަދިވެސް ކާކުކަން ދަނެގަނެވޭވަރު ނުވެ އެވެ.
މި ނޫހުން އެއްކުރި މައުލޫމާތުތަކަށް ބަލާއިރު މަރުވި މީހުންގެ ތެރޭގައި ތިން އަންހެނަކު ހިމެނެ އެވެ. އަދި އެމީހުންގެ ތެރޭގައި ޒުވާނުންނާއި އުމުރުން ދުވަސްވީ މީހުން ވެސް ހިމެނޭކަން އެނގިފައިވެ އެވެ. މަރުވި އިންޑިއާ މީހުންގެ ތެރޭގައި ޖެނިލް އާއި ސުންދާރީގެ އިތުރުން ވެންކަޓަ ސަޓިޔަނަރަޔަނަ، 48، އާއި ޕަޑަލަ އެޑުކޮންޑަލު، 43، އާއި މައްލޫލާ ނަނީ ޕަންޑޫ، 25، އާއި ސުޖާތާ (އުމުރު ނޭނގޭ) އާއި ތެންމޮޒީ (އުމުރު ނޭނގޭ) ހިމެނެ އެވެ.
މަރުވި މީހުން އަދި އެތަނުން ސަލާމަތްވި މީހުންނަށް މިހާރު ސަރުކާރާއި ޖަމިއްޔާތަކުން އެހީ ފޯރުކޮށްދެމުންދާއިރު، އެމީހުން ދަންނަ އަދި ގާތް ބައެއް މީހުން ބުނީ އަލިފާނުގެ އަސަރު ކުރި މީހުން ތިބީ ޝޮކެއްގައި ކަމަށެވެ. ބައެއް މީހުންނަށް އަދިވެސް ހާދިސާ އާއި މަންޒަރު ސިފަކޮށްދޭން ނޭނގޭ ކަމަށް މި ނޫހާ ވާހަކަ ދެއްކި މީހުން ބުންޏެވެ.
"އޭގެ ތެރޭގައި އެއްބައި މީހުންނަކީ ގާތް، އެއްކޮށް އުޅުނު މީހުން. އެމީހުން އަލިފާނުގެ ތެރެއަށް ގެއްލިގެން މި އުޅެނީ. ބައެއް މީހުންނަށް ރަނގަޅަށް ވާހަކަ ވެސް ނުދެއްކޭ. ބައެއް މީހުންނަށް ނޭނގޭ ހާދިސާ ކިޔައިދޭކަށް، ކަން ހިނގި ގޮތް ބުނެދޭކަށް،" ސަލާމަތްވި މީހުންނަށް އެހީ ފޯރުކޮށްދިނުމަށް މަސައްކަތް ކުރާ މީހަކު މި ނޫހާ ވާހަކަ ދައްކަމުން ބުންޏެވެ.
ރާއްޖޭގައި ތިން ލައްކައާ ގާތްކުރާ އަދަދަކަށް ބިދޭސީން ދިރިއުޅޭ ކަމަށް ބެލެވޭއިރު އޭގެ ތެރެއިން ވަރަށް ގިނަ ބަޔަކު އުޅެނީ ދިރިއުޅުމަށް އެކަށީގެންވާ ތަންތަނަކު ނޫނެވެ. އަދި އެތައް ސަތޭކަ ބަޔަކު ކުދި ތަންތަންކޮޅުގައި ވެސް ދިރިއުޅެ އެވެ.
"ދިވެހިރާއްޖެއަށް މަސައްކަތު މީހާ އަންނަ ތަނުން އޭނާގެ ޕާސްޕޯޓު އަތުލައި ބޮޑު ރެކްރޫޓްމަންޓު ފީއެއް ނަގާ. އޭގެ ފަހުން އޭނާއަށް ގިނަ ފަހަރު މުސާރަ ވެސް ނުދޭ. އަދި މިފަދަ މީހުން ދިރިއުޅެން މަޖުބޫރު ކުރާ ތަންތަން ސިފަ ކުރެވޭނީ އަނިޔާވެރި، ލާއިންސާނީ އަދި ކަރާމާތެއް ތަންތަން ގޮތުގައި،" އދ. ގެ ޓޯޗާއާ ދެކޮޅަށް މަސައްކަތް ކުރާ ހާއްސަ މަންދޫބު 2019 ވަނަ އަހަރު ރާއްޖެ އައިސް ވިދާޅުވެފައިވެ އެވެ.
މި ނޫހާ ވާހަކަ ދައްކަމުން ބައެއް ތަޖުރިބާކާރުން ބުނީ، އަލިފާނުގެ ހާދިސާގެ ސަބަބުން ބިދޭސީން ދިރިއުޅެމުންދާ ހާލަތާއި އެމީހުންގެ ހައްގުތައް ނެތް މިންވަރު ހާމަވެފައިވާ ކަމަށެވެ. އަދި ބުނެފައި ވަނީ އެ އަލިފާނުގެ ހާދިސާގައި އިހުމާލު އޮތް ކަމަށް ބެލެވޭ ކަމަށެވެ.
