ސްޓެލްކޯގެ މުވައްޒަފުންނަށް އެމީހުންގެ ކުދިން މަސައްކަތު ގަޑީގައި ބޭތިއްބޭނެ ރައްކާތެރި، އިތުބާރުކުރެވޭ މާހައުލެއް ހޯދައިދިނުމުގެ ގޮތުން އެ ކުންފުނިން ގާއިމުކުރި ސްޓެލްކޯ ޗައިލްޑު ކެއާ ސެންޓަރު މިއަދު ހުޅުވައިފި އެވެ.
އެކަމަށް ހާއްސަކޮށް މިއަދު ބޭއްވި ހަފްލާގައި އެ ސެންޓަރު ހުޅުވައިދެއްވީ އެ ކުންފުނީގެ ޗެއާމަން، ބްރިގޭޑިއާ ޖެނެރަލް، ރިޓަޔަޑް އިބްރާހީމް މުހައްމަދު ދީދީ އެވެ.
އެ ސެންޓަރު ހުޅުވައިދެއްވުމަށް ފަހު އެ ކުންފުނީގެ ޗެއާމަންއާއި އެމްޑީ އެތަނުގައި ތިބި ކުދިންނާ ބައްދަލު ކުރައްވަނީ -- ފޮޓޯ:އިޔާން/އަދަދު
ޗައިލްޑް ކެއާ ސެންޓަރު ހުޅުވުމަށްފަހު ވާހަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވީ އެ ސެންޓަރަކީ ސަރުކާރުން މުވައްޒަފުންނަށް ދެއްވި ހަދިޔާއެއް ކަމަށާއި އެހަދިޔާ ބަލައިގަންނަކަން މުވައްޒަފުން ދައްކަންވާނީ ކުންފުނިން ރައްޔިތުންނަށް ފޯރުކޮށްދޭ ހިދުމަތުން ކަމަށެވެ.
އެގޮތުން، ރައްޔިތުންނަށް މިހާރަށްވުރެ ފުރިހަމަ ހިދުމަތެއް ދިނުމަށް މަސައްކަތް ކޮށްދެއްވުމަށް މުވައްޒަފުންގެ ކިބައިން ޝަރީފް އެދިލެއްވި އެވެ.
އެ ސެންޓަރުން ހިދުމަތް ހޯދާ ކުދިން ބެލެހެއްޓުމަށް ތިބޭނީ ކަމަށް ގާބިލު އަދި ކުދިން ގެންގުޅުމުގެ ހުނަރު ހުރި މުވައްޒަފުން ކަމަށް ސްޓެލްކޯއިން ބުންޏެވެ. އެގޮތުން، ކުދިންގެ އުމުރާ ގުޅޭ ތަފާތު ގިނަ މަޖާ ހަރަކާތްތަކާއި ކުޅިވަރުގެ ތެރެއިން އުނގެނުމަށްވެސް އެތަނުގައި އިސްކަންދޭނެ އެވެ.
މިއަދު ހުޅުވި އެ ސެންޓަރުގައި ކުޑަކުދިން ކުޅޭ އެކި ވައްތަރުގެ ސާމާނާއި، ކިޔެވުމާއި، ކުރަހައި ކުލަ ޖެއްސުމަށް ބޭނުން ކުރާ ސާމާނުގެ އިތުރުން ފޮތް ހަރުގަނޑެއް ވެސް ހުންނާނެ އެވެ.
އެ ސެންޓަރުގައި ބެހެއްޓިފައި ހުރި ފޮތް ހަރުގަނޑު -- ފޮޓޯ: އިޔާން/އަދަދު
ޗައިލްޑް ކެއާ ސެންޓަރުގައި ހިދުމަތްދޭ އުމުރުފުރާ އަކީ ފަސް އަހަރާއި 10 އަހަރާ ދެމެދު ގެ ކުދިންނެވެ. އެތަން ހުޅުވާފައި ހުންނާނީ ރަސްމީ ދުވަސްތަކުގެ ހެނދުނު 8:15 އިން ހަވީރު 4:00 އަށެވެ.
ސްޓެލްކޯގެ ޗައިލްޑް ކެއާ ސެންޓަރަކީ ރައީސް އިބްރާހިމް މުހައްމަދު ސޯލިހުގެ ދުރު ވިސްނުންފުޅާއި، އިސްނެންގެވުމާއި އެއްގޮތަށް ސްޓެލްކޯގެ މެނޭޖްމަންޓުން ގާއިމުކޮށްދިން ތަނެއް ކަމަށް ސްޓެލްކޯއިން ބުންޏެވެ.
