ނުފޫޒު ބޭނުންކޮށްގެން ސްޓެލްކޯގެ މުވައްޒަފުން ވެރިކަންކުރާ ޕީއެންސީއަށް ވައްދަމުންދާކަން، ރާއްޖެ ޓީވީ ލައިވްގައި ފަޅާއަރުވާލައިފި އެވެ.
ރާއްޖެ ޓީވީން ގެނެސްދިން ފަށާއިރު ޕްރޮގްރާމުގައި އެކަން ފަޅާ އަރުވައިލީ އެ ޗެނެލްގެ ހެޑް އޮފް ޕްރޮގްރާމްސް އެންޑް ކޯޑިނޭޝަން، އާމިރު ސަލީމް އެވެ.
މިއަދު ހެނދުނު ލައިވްކޮށް ގެނެސްދިން އެ ޕްރޮގްރާމުގައި ސްޓެލްކޯގެ ހިއުމަން ރިސޯސަސް ޑިޕާޓުމެންޓުގެ ލޭންޑް ލައިނަށް ގުޅައި، ޕީއެންސީއަށް ސޮއި ކުރުމަށްފަހު، އެ ސްކްރީންޝޮޓު ފޮނުވަންވީ ކޮން ނަންބަރަކަށްތޯ އާމިރު ސުވާލުކުރި އެވެ.
ނުފޫޒު ބޭނުންކޮށްގެން ސްޓެލްކޯގެ މުވައްޒަފުން ޕީއެންސީއަށް ވައްދަމުންދާކަން ފަޅާއެރީ އާމިރުގެ ސުވާލަށް ސްޓެލްކޯގެ އެޗްއާރުން ދިން ޖަވާބުންނެވެ.
"ހަމަ ސްޓެލްކޯ އެޗްއާރު ނަންބަރަށް، ކުރިން އިންނާނެ ދޯ ތިކޮޅަށް މެސެޖުކޮށްލާފައި،" ސްޓެލްކޯގެ އެޗްއާރުން ވާހަކަދެއްކި މީހާ ބުންޏެވެ.
ސްޓެލްކޯގެ އެޗްއާރުން އެހެން ބުނުމުން، އެކަން އިތުރަށް ސާފުކުރުމުގެ ގޮތުން އާމިރު ވަނީ ސްޓެލްކޯގެ އެޗްއާރު ނަންބަރަށް ފޮނުވަންޖެހެނީ ޕީއެންސީއަށް ސޮއިކުރުމަށްފަހު، އެ ޕާޓީއަށް ވަދެވިއްޖެކަން ކަށަވަރުކޮށްދީ އިލެކްޝަނުން ފޮނުވާ މެސެޖުގެ ސްކްރީންޝޮޓެއްތޯ ސުވާލުކޮށްފަ އެވެ. އެ ސުވާލުގެ ޖަވާބުގައި ވެސް ސްޓެލްކޯގެ އެޗްއާރުން ބުނީ އާނ އެކޭ ކަމަށެވެ.
ސްޓެލްކޯގެ އިތުރުން ވެސް ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ދަނީ ޕީއެންސީއަށް ވަނުމަށް މަޖުބޫރުކޮށް ވަޒީފާގެ ބިރުދައްކަމުންނެވެ.
އެކަމާ ގުޅޭގޮތުން މި ނޫހަށް މައުލޫމާތު ދިން އެސްއޯއީއެއްގެ މުވައްޒަފަކު ބުނީ އޭނާއަށް ގުޅި ކުންފުނީގެ މެނޭޖަރު ބުނީ ޕީއެންސީއަށް ވީހާވެސް އަވަހަށް ވަނުމަށް ކަމަށެވެ. އެގޮތުން ޕީއެންސީއަށް ނުވަދެއްޖެނަމަ އެ މުވައްޒަފެއްގެ ވަޒީފާ ގެއްލޭނެ ކަމަށްވެސް މެނޭޖަރު ބުނި ކަމަށް އޭނާ ބުންޏެވެ.
"މެނޭޖަރު ގުޅީ. ގުޅާފައި ބުނީ ޕީއެންސީއަށް ވަންނަން. ހުރިހާ މުވައްޒަފުންނަށް ދަނީ ގުޅަމުން. ޕާޓީއަށް ނުވަދެއްޖެއްޔާ ވަޒީފާ ގެއްލޭނެ ކަމަށްވެސް ދަނީ ބުނަމުން،" އޭނާ ބުންޏެވެ.
ޕީއެންސީއަށް ސޮއިނުކުރާނަމަ އެސްއޯއީތަކުގެ ވަޒީފާއިން ކަނޑާލާނެ ކަމަށް ބުނެ ބިރު ދައްކަނީ
ސަރުކާރު ހިންގާ ޕީއެންސީއަށް މެންބަރުން އިތުރުކުރުމަށްޓަކައި، ސަރުކާރު ކުންފުނިތަކުގެ މުވައްޒަފުން އެ ޕާޓީއަށް ސޮއިނުކޮށްފިނަމަ ވަޒީފާ ގެއްލޭނެ ކަމުގެ ބިރުދައްކަމުންދާ ކަމުގެ ޝަކުވާތައް ވަނީ ބޮޑުވެފައި. އެސްއޯއީތަކުން ގިނަ އަދަދެއްގެ މުވައްޒަފުން ވަކިކުރަމުންދާއިރު، އޭގެ ތެރޭގައި ގިނައީ އެމްޑީޕީއަށް ނިސްބަތްނުވާ މީހުންކަން ފާހަގަކުރެވޭ.
އެ މުވައްޒަފު މި ނޫހަށް ބުނީ އޭނާ އެއްވެސް ސިޔާސީ ޕާޓީއެއްގައި އުޅެން ބޭނުން ނުވާ ކަމަށާއި ޕާޓީއަށް ވަންނަން މަޖުބޫރުކުރުމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ.
ޕީއެންސީއަށް ގިނަ އަދަދެއްގެ މެންބަރުން ވެއްދުމަށް އެ ޕާޓީން ދަނީ މަސައްކަތް ކުރަމުންނެވެ. އެގޮތުން ދައުލަތުގެ ވަސީލަތްތައް ބޭނުންކޮށްގެން ގިނަ އަދަދެއްގެ މީހުން ވަގަށް އެ ޕާޓީއަށް ވެއްދި މައްސަލައެއްވެސް ފެންމަތިވެފައިވެ އެވެ.
ޕީއެންސީގެ އަމާޒަކީ އެއްލައްކަ މެންބަރުން އެ ޕާޓީއަށް ވެއްދުން ކަމަށްވާއިރު، އެ އަމާޒަށް މިހާތަނަށް ވާސިލުވެވިފައެއް ނުވެ އެވެ. ޖޫން 30، ގެ ނިޔަލަށް އެ ޕާޓީގެ ދަފްތަރުގައި ތިބީ 67،579 މެންބަރުންނެވެ. އެ މުއްދަތާ ހަމައަށް އިދިކޮޅު އެމްޑީޕީގައި ތިބީ 55،399 މެންބަރުންނެވެ.
އެސްއޯއީތަކުން ގިނަ އަދަދެއްގެ މުވައްޒަފުން ދަނީ ވަކިކުރަމުންނެވެ. އޭގެ ތެރޭގައި ގިނައީ ޕީއެންސީއަށް ނިސްބަަތްނުވާ މުވައްޒަފުންކަން ފާހަގަކުރެވެ އެވެ. އެކަމާ ގުޅިގެން ރަށްރަށުގައި އިހުތިޖާޖުތައްވެސް ދަނީ ކުރިއަށް ގެންދަމުންނެވެ.
