އޮސްޓްރޭލިއާގެ އެންމެ ބޮޑު ހެލްތު އިންޝުއަރާ މެޑިބޭންކުން ރައްކާކޮށްފައި ހުރި ގިނަ ބަޔެއްގެ ޒާތީ މައުލޫމާތު ވަގށް ނެގުމަށް ފަހު އޮންލައިންކޮށް ޕޯސްޓުކޮށްފި އެވެ.
އާއްމުކުރި ބައެއް ޑޭޓާގައި ހިމެނެނީ މީހުން ހަދާފައިވާ ސިއްހީ ޕްރޮޖީތަކާއި ނަމާއި އެޑްރެސްތަކާއި އުފަން ތާރީހު އަދި އައިޑީ ނަންބަރުތަކެވެ.
ބޮޑު ވަޒީރު އެންތަނީ އަލްބަނީޒް ވިދާޅުވީ އެމަނިކުފާނަކީ ވެސް މެޑިބޭންކްގެ ކަސްޓަމަރެއް ކަމަށާއި އެމަނިކުފާނުގެ ޒާތީ މައުލޫމާތު އާއްމުވުމުގެ ކަންބޮޑުވުން އެބަ އޮތް ކަމަށެވެ.
"މިއީ ހުރިހާ ރައްޔިތުންނަށް ވެސް އުނދަގޫ ވަގުތެއް،" އަލްބަނީޒް ވިދާޅުވި އެވެ.
މެޑިބޭންކްގެ 9.7 މިލިއަން ކަސްޓަމަރުން ޒާތީ މައުލޫމާތު ވަގަށް ނެގީ އޮކްޓޯބަރު މަހު އެވެ. އެ މައުލޫމާތުތައް އާއްމު ނުކުރާނީ ފައިސާ ދިނުމުން ކަމަށް، ވައްކަން ކުރި ފަރާތުން ބުންޏެވެ.
އެހެން ނަމަވެސް، މެޑިބޭންކުން ފައިސާ ދޭން ދެކޮޅު ހެދުމުން ބުދަ ދުވަހު އާއްމު ކުރީ ޑޭޓާގެ ކުޑަ މިންވަރެކެވެ. ފުލުހުން ބުނީ ވައްކަން ކުރި ފަރާތުން އެކި މީހުންނަށް އަމާޒުކޮށް ބްލެކްމެއިލް ކުރުމުގެ އަމަލު ހިންގުމުގެ ފުރުސަތު ވެސް އެބަ އޮތް ކަމަށެވެ.
"އޮންލައިންކޮށް، ފޯނުން ނުވަތަ އެސްއެމްއެސް މެދުވެރިކޮށް އެއްވެސް ފަރާތަކުން މުއާމަލާތްކޮށް، ފައިސާ ނުދޭ ނަމަ ޒާތީ މައުލޫމާތު އާއްމު ކުރަން ބިރު ދައްކާ ނަމަ އަވަހަށް ލަސްނުކޮށް ފުލުހަށް ރިޕޯޓުކުރޭ،" ފުލުހުން އެދުނެވެ.
މެޑިބޭންކުން މައާފަށް އެދި ބުނީ އާއްމުކުރި ޑޭޓާއާ ގުޅުން ހުރި ކަސްޓަމަރުންނަށް އެކަން ރަސްމީކޮށް އަންގާނެ ކަމަށެވެ. ޑޭޓާ އާއްމުކުރީ ރަޝިއާގެ ރޭންސަމްވެއާ ގްރޫޕް ރީވިލްއާ ގުޅުން ހުރި ބްލޮގެއްގަ އެވެ.
