މިހާރު ކުރިއަށްދާ ގައުމީ ބިލިއާޑް މުބާރާތުގެ ޑަބަލްސް އިވެންޓުގެ މެޗުތައް ފަށައިފި އެވެ.
މޯލްޑިވްސް ޕޫލް ބިލިއާޑް އެސޯސިއޭޝަންގެ އިންޑޯ ހޯލުގައި ކުރިއަށްދާ މުބާރާތުގެ ޑަބަލްސް އިވެންޓުގައި 35 ޕެއާ އެއް ވާދަކުރެ އެވެ. އޭގެ ތެރޭގައި ހިމެނެނީ 34 ފިރިހެން ޕެއާ އާއި އަންހެން އެއް ޕެއާއެކެވެ . މުބާރާތުގައި ވާދަކުރާ ހަމައެކަނި އަންހެން ޕެއާ އަކީ އާމިނަތު އަޒްރާ އާއި އާމިނަތު ފާތީގެ ޕެއާ އެވެ.
ގައުމީ މުބާރާތުގެ މި އަހަރުގެ ސިންގަލްސް ޗެމްޕިއަން ސާހިލް ހަމީދުގެ ޕާޓްނަރަކީ ޝިފާއު އަބްދުﷲ އެވެ. ފުރަތަމަ މެޗުގައި އަހުމަދު ނަފީލް އާއި އަބްދުލް ހަމީދު އަލީ އަތުން މޮޅުވިއިރު، ދެ ވަނަ މެޗުގައި އަހުސަން ހާޝިމް އާއި މޫސާ ސާމިއު އަތުން ބަލިވެ، ވަނީ ލޫޒާސް ބްރެކެޓަށް ގޮއްސަ އެވެ. ލޫޒާސް ބްރެކެޓުގައި ސާހިލް އާއި ޝިފާއު ވާދަކުރާނީ އަހުމަދު ނިހާދު އާއި އިބްރާހިމް ރިޔާޒުގެ ޕެއާއާ ދެކޮޅަށެވެ.
ގައުމީ ޓީމްގެ ހަސަން ޝާޒު އާއި އަހުމަދު އިޔާދުގެ ޕެއާ ވެސް ވަނީ ރަނގަޅު ކުޅުމެއް ދައްކައި ވިނާސް ބްރެކެޓުގައި ކުރިއަށް ޖެހިލާފަ އެވެ. ފުރަތަމަ މެޗުގައި އަޒްރާ އާއި ފާތީ އަތުން ފަސޭހައިން މޮޅުވިއިރު، ދެވަނަ މެޗުގައި މުހައްމަދު ޝަރީފް އާއި މުހައްމަދު ނަސީމްގެ ޕެއާ ބަލިކޮށް ވަނީ ވިނާސް ބްރެކެޓްގެ ގަދަ އަށަކުން ޖާގަ ޔަގީންކޮށްފަ އެވެ.
މިދިޔަ އަހަރުގެ މުބާރާތުގެ ޗެމްޕިއަން ޕެއާ ކަމަށްވާ ހުސައިން ފަޔާޒު އާއި އަލީ ޝާވިން މި ފަހަރު ޖެހުނީ ޕެއާ ބަދަލުކުރާށެވެ. ސަބަބަކީ ދެ ކުޅުންތެރިންނަކީ ވެސް މިހާރު ފުރަތަމަ ޑިވިޝަންގައި ކުޅޭ ދެ ކުޅުންތެރިންނަށް ވުމެވެ. މުބާރާތުގައި ބައިވެރިވާ ޕެއާގައި ހިމެނޭނީ ފުރަތަމަ ޑިވިޝަންގެ އެއް ކުޅުންތެރިއަކަށެވެ.
ފަޔާޒު މިފަހަރު ކުޅޭނީ ޝަޒީން އަބްދުއްސަމަދު އާއިއެކުގަ އެވެ. މި ދެ ކުޅުންތެރިން ކުޅުނު ފުރަތަމަ މެޗުގައި ވަނީ 7-4 އިން ނިހާދު އާއި ރިޔާޒުގެ ޕެއާ ބަލިކޮށްފަ އެވެ. އޭގެ ފަހުން ޖިނާހު އަހުމަދު ނަޖީބު އާއި އިބްރާހިމް ދައުސްގެ މައްޗަށްވެސް 7-3 އިން ކުރި ހޯދި އެވެ.
ރޭ ކުޅުނު އެހެން މެޗުތަކަށް ފަހު އަލީ ފާޔާޒު އާއި މުހައްމަދު ފަރީމްގެ ވަރުގަދަ ޕެއާ ބަލިކޮށް ގަދަ އަށަކުން ޖާގަ ހޯދީ ސަމާހް ރަޝީދު އަދި އަލީ މިމްހާދުގެ ޕެއާ އެވެ. ޑަބަލް އެލިމިނޭޝަން އުސޫލުން ކުޅޭތީ ފަޔާޒު އާއި ފަރީމް އަށް އަދި ފުރުސަތެއް ނުގެއްލެ އެވެ.
ޑަބަލްސް އިވެންޓުގެ މެޗުތައް މިއަދުވެސް ކުރިއަށްދާނެ އެވެ. ކުރިއަށް އޮތް ތިން ދުވަހު ޑަބަލްސް އިވެންޓުގެ މެޗުތައް ކުޅުމަށްފަހު ދެން ފަށާނީ މިކްސް ޑަބަލްސް އިވެންޓެވެ. މިކްސް ޑަބަލްސްގައި ވާދަކުރަނީ 10 ޕެއާ އެކެވެ.
އެންމެ ފަހުން ކުރިއަށްދާނީ އެންމެ ފޯރިގަދަވާނެކަމަށް ބެލެވޭ ޓީމް އިވެންޓެވެ. ޓީމް އިވެންޓުގައި ފަސް ކުލަބަކުން ވާދަ ކުރެ އެވެ. އެއީ އެންމެ ފަހުގެ ޗެމްޕިއަން ކުލަބު އީގަލްސް، ކަސްޓަމްސް ރެކްރިއޭޝަން ކުލަބް، އައިލެންޑާސް ހޯޕް ސްޕޯޓްސް ކުލަބް، މާޒިޔާ ސްޕޯޓްސް އެންޑް ރެކްރިއޭޝަންގެ އިތުރުން ދިވެހި ސިފައިންގެ ކުލަބެވެ.
