މިހާރު ކުރިއަށްދާ "ލިޓަސް ނޭޝަނަލް ބިލިއާޑް ޗެމްޕިއަންޝިޕް 2022" ގެ ފުރަތަމަ ޑިވިޝަނުގެ ފިރިހެން ސިންގަލްސް ޗެމްޕިއަންކަން މުހައްމަދު ސާހިލް ހަމީދު ހޯދައިފި އެވެ.
ނޭޝަނަލް ބިލިއާޑް ސެންޓަރުގައި މިހާރު ކުރިޔަށްދާ މުބާރާތުގެ އެއް ވަނަ ޑިވިޝަން، ސިންގަލްސް ބައިގެ ފައިނަލުގައި ރޭ ހަސަން ޝާޒް މުހައްމަދުއާ ބައްދަލުކޮށް ސާހިލް މޮޅުވީ 11-06 އިންނެވެ. ދެ ވަނަ ޑިވިޝަނުގެ ފައިނަލުގައި އިސްމާއިލް ޝިޔާމް ކާމިޔާބު ހޯދީ ފައިނަލުގައި ހަސަން ރާޖޭޝް މޫސާގެ މައްޗަށް 9-4 އިން ކުރިހޯދައިގެންނެވެ.
މުބާރާތުގެ އަންހެން ޑިވިޝަނުގެ ފައިނަލް ވެސް ރޭ ކުޅެވުނެވެ. އަންހެން ޑިވިޝަން ގެ ފައިނަލުގައި ބައްދަލުކުރީ އާއިޝަތު އަލީ އާއި އާމިނަތު ހަލީމް އެވެ. އެ މެޗު 7-3 ފްރޭމުން ކާމިޔާބުކޮށް އަންހެން ޑިވިޝަނުގެ ތަށި ހާސިލްކުރީ އާއިޝަތު އަލީ އެވެ.
ގައުމީ ބިލިއާޑް މުބާރާތުގައި ދެން އޮތީ ޑަބަލްސް އިވެންޓް އެވެ. ޑަބަލްސް އިވެންޓްގައި 35 ޕެއާ ފެނިގެންދާއިރު، މިކްސް ޑަބަލްސް ބައިގައި 10 ޕެއާ ވާދަކުރާނެ އެވެ.
މި މަހު 18 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ފިރިހެން ފުރަތަމަ ޑިވިޝަނުން 32 ކުޅުންތެރިން ވާދަކުރި އެވެ. ފިރިހެން ދެ ވަނަ ޑިވިޝަނުގައި 51 ކުޅުންތެރިން ވާދަކުރިއިރު، އަންހެން ޑިވިޝަނުގައި ފެނުނީ ހަ ކުޅުންތެރިންގެ މެޗުތަކެކެވެ.
މުބާރާތުގެ ޓީމު އިވެންޓްގައި ފެނިގެންދާނީ ފަސް ކްލަބެކެވެ. އެއީ އެންމެ ފަހުގެ ޗެމްޕިއަން، ކްލަބް އީގަލްސް އާއި ކަސްޓަމްސް ރެކްރިއޭޝަން ކްލަބް، އައިލެންޑާސް ހޯޕް ސްޕޯޓްސް ކްލަބް، މާޒިޔާ ސްޕޯޓްސް އެންޑް ރެކްރިއޭޝަން އަދި ދިވެހި ސިފައިންގެ ކްލަބް އެވެ.
