ލިޓަސް ނެޝަނަލް ބިލިއާޑް ޗެމްޕިއަންޝިޕް 2022، (ގައުމީ ބިލިއާޑް މުބާރާތު)ގެ ކުޅުން އިއްޔެ ފެށިއިރު، ދެ ވަނަ ޑިވިޝަނާއި އަންހެން އަދި ފިރިހެން ފުރަތަމަ ޑިވިޝަނުގެ ފޯރިގަދަ މެޗުތަކެއް ކުރިއަށް ގޮސްފި އެވެ.
މި ފަހަރުގެ މުބާރާތުގައި ވެސް ޖުމްލަ ހަ އިވެންޓަކުން މެޗުތައް ކުރިއަށްދާނެ އެވެ. އެއީ ރައީސުލްޖުމްހޫރިއްޔާގެ ވާދައިގެ ތަށްޓަށް ކުޅޭ ޓީމު އިވެންޓްގެ އިތުރުން ފިރިހެން ފުރަތަމަ ޑިވިޝަނާއި ދެ ވަނަ ޑިވިޝަނާއި އަންހެން ޑިވިޝަން އަދި ޑަބަލްސް އިވެންޓްގެ އިތުރުން މިކްސް ޑަބަލްސް އިވެންޓް އެވެ.
މުބާރާތުގެ މެޗުތައް އިއްޔެ ފަށާފައިވަނީ ދެ ވަނަ ޑިވިޝަނުގެ މެޗުތަކުންނެވެ. އެ ގޮތުން ދެ ވަނަ ޑިވިޝަނުގެ 73 މެޗެއް ވަނީ ކުޅެވިފަ އެވެ. އޭގެ އިތުރުން ފިރިހެން ފުރަތަމަ ޑިވިޝަނާއި އަންހެން ޑިވިޝަނުގެ މެޗުތަކެއް ވެސް ވަނީ ކުޅެވިފަ އެވެ.
ގައުމީ ބިލިއާޑް ސެންޓަރުގައި ކުރިއަށްދާ މި މުބާރާތުގައި އިއްޔެ ކުޅެވުނު ފިރިހެން ފުރަތަމަ ޑިވިޝަނުގެ މެޗުގައި ގައުމީ ރޭންކިން އެއް ވަނަ މުހައްމަދު ޝަރީފް އަތުން ރޭންކިން ފަސް ވަނައިގައި އޮތް މުހައްމަދު ސުވެއިދު ވަނީ މޮޅުވެފަ އެވެ. އެއީ 4-9 ފްރޭމުންނެވެ. އެންމެ ފަހުން ބޭއްވި ގައުމީ މުބާރާތުގެ ޗެމްޕިއަން، އަދި ރޭންކިން ދެ ވަނައިގައި އޮތް، ހުސެން ފަޔާޒް މޮޅަކާ އެކު ފެށީ ރޭންކިން ހަތަރު ވަނައިގައި އޮތް އިސްމާއިލް ޖީހާން އަތުން 9-1 އިން ކާމިޔާބު ކޮށްގެންނެވެ. އަދި ރޭންކިންގެ ތިން ވަނައިގައި އޮތް ހަސަން ޝާޒް މުހައްމަދު ވަނީ 9-0 އިން ގިޔާސް އަފްރާހު ބަލިކޮށްފަ އެވެ.
މި މަހު 18 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ފިރިހެން ފުރަތަމަ ޑިވިޝަނުން 32 ކުޅުންތެރިން ވާދަކުރެ އެވެ. ފިރިހެން ދެ ވަނަ ޑިވިޝަނުގައި 51 ކުޅުންތެރިން ވާދަކުރާއިރު، އަންހެން ޑިވިޝަނުގައި ތިބީ ހަ ކުޅުންތެރިންނެވެ. ޑަބަލްސް އިވެންޓްގައި 35 ޕެއާ ފެނިގެންދާއިރު، މިކްސް ޑަބަލްސް ބައިގައި 10 ޕެއާ ވާދަކުރާނެ އެވެ.
ޓީމު އިވެންޓްގައި ފެނިގެންދާނީ ފަސް ކްލަބެކެވެ. އެއީ އެންމެ ފަހުގެ ޗެމްޕިއަން، ކްލަބް އީގަލްސް އާއި ކަސްޓަމްސް ރެކްރިއޭޝަން ކްލަބް، އައިލެންޑާސް ހޯޕް ސްޕޯޓްސް ކްލަބް، މާޒިޔާ ސްޕޯޓްސް އެންޑް ރެކްރިއޭޝަން އަދި ދިވެހި ސިފައިންގެ ކްލަބް އެވެ.
