މޯލްޑިވްސް އިސްލާމިކް ބޭންކުގެ ޗެއާމަންގެ މަގާމަށް މިއަދު ބޭފުޅަކު އައްޔަންކޮށްފި އެވެ.
އެ ބޭންކުގެ ޑިރެކްޓަރުންގެ ބޯޑުން މިއަދު އެ މަގާމަށް އައްޔަންކޮށްފައި ވަނީ މިދިޔަ އަހަރު އޮކްޓޫބަރު މަހުން ފެށިގެން އެ ބޭންކުގެ ބޯޑު މެންބަރެއްގެ ގޮތުގައި މަސައްކަތް ކުރައްވަމުން ގެންދަވާ ކާޒީ އަބޫ މުހައްމަދު މަޖެދުރު ރަހްމާން އެވެ.
އިސްލާމިކް ބޭންކުގެ ޗެއާމަންގެ މަގާމަށް ބޭފުޅަކު އައްޔަން މިކުރީ 2012 ވަނަ އަހަރަށް ފަހު ފުރަތަމަ ފަހަރަށެވެ. އެ މަގާމު މީގެ ކުރިން ފުރުއްވަމުން ގެންދެވީ ނަޖްމުލް ހަސަން އެވެ.
އިސްލާމިކް ބޭންކުގެ ޗެއާމަންގެ މަގާމަށް މިއަދު އައްޔަން ކުރެވުނު މަޖެދުރު ރަހްމާން އަކީ މީގެ ކުރިން ބަންގުލަދޭޝްއާއި، މެދުއިރުމައްޗާއި، އެފްރިކާ އަދި އޮސްޓޭރިލިއާގައި ތަފާތު އެކި މަގާމުތައް ފުރުއްވާފައިވާ ބޭފުޅެކެވެ.
އެގޮތުން އޭނާ ވަނީ ޑާކާ ސްޓޮކް އެކްސްޗޭންޖު ލިމިޓެޑުގެ މެނޭޖިން ޑިރެކްޓަރު ކަމާއި، ބަންގުލަދޭޝްގެ ޕްރިމިއާ ބޭންކު ލިމިޓެޑުގެ މެނޭޖިން ޑިރެކްޓަރު ކަމާއި ސީއީއޯގެ މަގާމުގެ އިތުރުން ބޭންކް އަލް-ފަލާހުގެ ކަންޓުރީ ހެޑްގެ މަގާމާއި، އޭބީ ބޭންކު ލިމިޓެޑުގެ ޗީފް ރިސްކު އޮފިސާ އެންޑު އެޑިޝަނަލް މެނޭޖިން ޑިރެކްޓަރުގެ މަގާމު ފުރުއްވާފަ އެވެ.
މީގެ އިތުރުން ވެސް ތަފާތު އެކި ބޭންކު ތަކުގެ މުހިއްމު މަގާމުތައް އޭނާ ފުރުއްވާފައި ވެއެވެ. މިވަގުތު އޭނާ ހުންނެވީ އޭކޭ ޚާން އެންޑު ކޮންޕެނީ ލިމިޓެޑުގެ ގުރޫޕް ޗީފް އެގްޒެކެޓިވް އޮފިސަރެއްގެ މަގާމުގަ އެވެ.
މަޖެދުރު ރަހްމާން އަކީ ތަޖުރިބާކާރު ކެޕިޓަލް މާކެޓް ޕްރޮފެޝަނަލްއެއްގެ އިތުރުން ސީޒަންޑް ބޭންކަރެކެވެ.
އޭގެއިތުރުން މިއަދު ބޭއްވުނު އިސްލާމިކް ބޭންކުގެ ބޯޑު ބައްދަލުވުމުގައި އެ ބޭންކުގެ ޗީފް އެގްޒެކެޓިވް އޮފިސަރުގެ މަގާމަށް ވެސް ބޭފުޅަކު ވަނީ އައްޔަން ކޮށްފަ އެވެ. އެ މަގާމަށް އައްޔަން ކޮށްފައި ވަނީ ރީޓެއިލް ބޭންކިން އާއި ޕްރޮޑަކްޓު މެނޭޖުމަންޓުގެ ދާއިރާއިން 25 އަހަރުގެ ތަޖުރިބާ ލިބިފައިވާ މުފައްޛަލް އިދްރީސް ޚުމްރީ އެވެ.
މެނޭޖްމަންޓު ސްޓަޑީސްގެ ދާއިރާއިން މާސްޓާސް އަދި ކޮމާސްގެ ދާއިރާއިން އިން ބެޗްލާސް ހާސިލު ކުރައްވާފައިވާ މުފައްޛަލް ވަނީ މީގެ ކުރިން ސައުދީ ނެޝަނަލް ބެންކުގެ ހެޑް އޮފް ރީޓެއިލް އެސެޓްސްގެ މަގާމާއި ޔޫއޭއީގެ ނެޝަނަލް ބޭންކު ރަސް އަލް-ޚައިމަހް ގެ ޑިރެކްޓާ އޮފް ރީޓެއިލް ބޭންކިންގެ މަގާމު ފުރުއްވާފަ އެވެ.
އިސްލާމިކް ބޭންކުގެ މަގާމުތަކަށް ބޭފުޅުން އައްޔަންކޮށްފައި ވަނީ އެ ބޭންކުގެ އާޓިކަލް އޮފް އެސޯސިއޭޝަންގައިވާ އުސޫލުތަކުގެ ދަށުންނެވެ.
