ކެންސަރާއި ސްޓްރޯކާއި ހާޓްއެޓޭކް ފަދަ ބޮޑެތި ބަލިތައް ރާއްޖޭގައި ގިނަވެފައި ވަނީ ސީރިއަސް މިންވަރަކަށް ކަމަށާއި އޭގެ ސަބަބުތައް ދެނެގަންނަން ކުރާ ދިރާސާ ބާރަށް ކުރިއަށް އެބަދާ ކަަމަށް ހެލްތު މިނިސްޓަރު އަހުމަދު ނަސީމު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއް ލަތީފު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ ބޮޑެތި ބަލިތައް ގިނަވާ ސަބަބު ބަލަން ދިރާސާކުރަނީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ އެހީގައި ކަަމަށެވެ. އެ ދިރާސާއަށް ބޭނުންވާ މައުލޫމާތު ޑަބްލިއުއެޗްއޯގެ މާހިރުން މިހާރު އެއްކޮށްފައިވާ ކަމަށް ވެސް އޭނާ ވިދާޅުވި އެވެ.
"އެ ދިރާސާތައް ބާރަށް ކުރިއަށް އެބަދޭ، ޑަބްލިއުއެޗްއޯގެ އެހީގެ ދަށުން އަޅުގަނޑުމެން މިކަންތައް ކުރިއަށް މިގެންދަނީ. ޑަބްލިއުއެޗްއޯ ޓީމެއް އައިސް ހަމަ ތިޔަ ވިދާޅުވި ގޮތަށް، މިކަންތައް ހިނގާ ގޮތް ބަލަމުން އެބަ ގެންދޭ. މިތަނުން މައުލޫމާތުތަކާއި އެއްޗިހި ހިފައިގެން ގޮސް އެބޭފުޅުންވީ," މިނިސްޓަރު ވިދާޅުވި އެވެ.
އިތުރަށް މައުލޫމާތު އެއްކުރުމަށް ޓަކައި ޑަބްލިއުއެޗްއޯގެ މާހިރުން އަދިވެސް ރާއްޖެއަށް ޒިޔާރަތްކޮށްފާނެ ކަމަށް ވެސް އޭނާ ވިދާޅުވި އެވެ.
ނަސީމު ވިދާޅުވި ގޮތުގައި ރާއްޖޭގައި ބޮޑެތި ބަލިތައް މާބޮޑަށް އިތުރުވެފައިވާ ކަމަށް ތަފާސް ހިސާބުތަކަކުން އެކަމަކު ނުދައްކަ އެވެ. އެހެން ނަމަވެސް އެއީ ވަރަށް ބޮޑު އަދި ސީރިއަސް މައްސަލައެއް ކަަމަށާއި އެކަމުގެ ހަގީގަތް ބައްލަަވަން އެދިވަޑައިގަންނަވާ ކަމަށް ވެސް ވިދާޅުވި އެވެ.
"ސްޓެޓިސްޓިކްސްއަށް ބަލާއިރު މާބޮޑު ތަފާތުތަކެއް ނައިކަމުގައި ވީ ނަމަވެސް [މިއީ] އަޅުގަނޑުމެން ކޮންސާން ވާން ޖެހޭ ކަމެެއް ކަމަށް އަޅުގަނޑު އެބަ ދެކެން،" ނަސީމު ވިދާޅުވި އެވެ.
ބޮޑެތި ބަލިތަައް އިތުރުވާ ސަބަބުތައް ބަލަން ރާއްޖޭގައި ކުރާ ދިރާސާއާ ބެހޭ ގޮތުން މެމްބަރު ޔާސިރު ކުރެއްވި ސުވާލުގައި އެ އެއްސެވީ އެ ދިރާސާގެ ކަންތައް މިހާރު ގޮސްފައި ވަނީ ކިހާހިސާބަކަަށްތޯ އާއި ހޯދުނު ހޯދުމަކީ ކޮބައިތޯ އެވެ. އެހެން ނަަމަވެސް އެ ދިރާސާ ނިމޭނެ ތާރީހަކާ ބެހޭ ގޮތުން މިނިސްޓަރު މިއަދު އެއްޗެއް ވިދާޅެއް ނުވެ އެވެެ.
