ނިމިދިޔަ އޮކްޓޯބަރު މަހު ފަތުރުވެރިން އައި އަދަދު ކޮވިޑުގެ ކުރިން ފަތުރުވެރިން އައި އަދަދަށްވުރެ އިތުރުވެއްޖެ އެވެ.
ޓޫރިޒަމް މިނިސްޓްރީން މިއަދު ބުނީ، މި އަހަރުގެ އޮކްޓޯބަރު މަހު ރިކޯޑް އަދަދަކަށް ފަތުރުވެރިން ޒިޔާރަތް ކޮށްފައިވާ ކަމަށެވެ. އެގޮތުން އޮކްޓޯބަރު މަހު 153،600 އައި ކަމަށް ޓޫރިޒަމް މިނިސްޓްރީން ބުނެ އެވެ.
އެ މިނިސްޓްރީން ބުނީ އެ އަދަދަކީ 2019 ވަނަ އަހަރުގެ އޮކްޓޯބަރު މަހު ފަތުރުވެރިން އައި އަދަދަށްވުރެ އަށް ޕަސަންޓު އިތުރު އަދަދެއް ކަމަށެވެ. 2019 ވަނަ އަހަރުގެ އޮކްޓޯބަރު މަހު ރާއްޖެ ޒިޔާރަތް ކުރީ 141،928 ފަތުރުވެރިންނެވެ.
ކޮވިޑް-19 އެންމެ ނާޒުކު ދުވަސްވަރު ރާއްޖޭގެ ބޯޑަރު ބަންދުކުރުމުގެ ސަބަބުން 2020 ވަނަ އަހަރު ރާއްޖެ އައިސްފައި ވަނީ 419,396 ފަތުރުވެރިންނެވެ. އެއީ 2019 ވަނަ އަހަރާ އަޅާބަލާއިރު 69 ޕަސެންޓުގެ ވެއްޓުމެވެ.
ބޯޑަރުތައް އަލުން ހުޅުވައި، އެހެން ގައުމުތަކުގެ ވެސް ހާލަތު ރަނގަޅުވަމުންދިޔައިރު، 2021 ވަނަ އަހަރު ރާއްޖެ އައީ 988,013 ފަތުރުވެރިންނެވެ. އެއީ ބަލިމަޑުކަމުގެ ކުރިން އައި އަދަދުތަކާ ބަލާއިރު 27 ޕަސެންޓުގެ ދަށްވުމެވެ. އެކަމަކު އެއީ 2020 ވަނަ އަހަރާ އަޅާބަލާއިރު 135 ޕަސެންޓުގެ ކުރިއެރުމެކެވެ.
މި އަހަރަށް ފާސްކުރި ބަޖެޓުގައި ޓޫރިސްޓުން ޒިޔާރަތްކުރާނެ އަދަދެއްގެ ގޮތުގައި ޖެހީ 1،632،432 ޓޫރިސްޓުންނެވެ. އެއީ "މޮޑަރޭޓް ކޭސް" ނުވަތަ ހާއްސަ ހާލަތެއް މެދުވެރިނުވާހާ ހިނދަކު އަންނާނެ ކަމަށް ލަފާކުރި އަދަދެވެ. އޭގެ ތެރެއިން އެއް މިލިއަން ފަތުރުވެރިން މިދިޔަ އޮގަސްޓު މަހާ ހަމައަށް އައިއިރު، އޮކްޓޯބަރު މަހުގެ ނިޔަލަށް މިވަނީ 1.3 މިލިއަން ފަތުރުވެރިން އައިސްފަ އެވެ.
މި އަހަރުގެ ޓާގެޓުގެ ގޮތުގައި އޮތް 1.6 މިލިއަން ފަތުރުވެރިންނާ ގާތަށް ރާއްޖެ ދާއިރު، އެ ޓާގެޓު ހާސިލު ކުރެވޭނެ ކަމަށް ޓޫރިޒަމް މިނިސްޓްރީން ލަފާ ކުރަނީ ނޮވެމްބަރު ނުވަތަ ޑިސެމްބަރު މަހުގެ ތެރޭގަ އެވެ.
