ފޯޅަވަހީގެ މައްޗަށް ސިޔާދަތީ ބާރު ހޯދުމަށް މޮރިޝަސް އިން ގިނަ މަސައްކަތްތަކެއް ކުރަމުން އަންނަ ދަނޑިވަޅެއްގައި އެތަނަކީ ރާއްޖޭގެ ތަނެއް ނޫން ކަމަށް ބުނެވޭނެ ޖާގައެއް ނެތް ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަތަކަށް އިކޮނޮމިކް މިނިސްޓަރު ފައްޔާޒު އިސްމާއީލް ރައްދު ދެއްވައިފި އެވެ.
ކަނޑުތަކާ ބެހޭ ބައިނަލްއަގްވާމީ ޓްރައިބިއުނަލްގައި ކުރިއަށްދާ ރާއްދެ-މޮރިޝަސް ކަނޑުގެ އިން ވަކިކުރުމުގެ މައްސަލައިގެ އަޑުއެހުމެއްގެ ތެރެއިން ދިވެހި ސަރުކާރުން ވަނީ ފޯޅަވަހީގެ މައްޗަށް ސިޔާދަތީ ބާރު ހޯދުމަށް މޮރިޝަސްއިން ކުރަމުންދާ މަސައްކަތްތަކުގައި އެގައުމާ އެއްކޮޅަށް ވޯޓު ދޭނެކަން ހާމަކޮށްފަ އެވެ. އެއާއެކު، ރާއްޖޭގެ ސިޔާސީ މަސްރަހު ވަރަށް ބޮޑަށް ހޫނުވެފައިވާއިރު ބައެއް ފަރާތްތަކުން ދަނީ މި ނިންމުމާ އެކު ރާއްޖޭގެ ކަނޑުގެ ސަރަހައްދުން ބައެއް ގެއްލޭނެ ކަމަށް ބުނަމުންނެވެ.
ސަރުކާރުން އެކަން އެގޮތަށް ނުހިނގާނެ ކަމުގެ ޔަގީންކަން ދީފައިވާއިރު މިއަދު އެމްޑީޕީގެ ރައީސްކަން ވެސް ކުރައްވާ ނަޝީދު ވަނީ އެއީ ރާއްޖޭގެ ރާއްޖޭގެ ތަނެއް ނޫން ކަމަށް ބުނެވޭނެ ޖާގައެއް ނެތް ކަމަށާއި އެ ތަނަކީ މިވަގުތު ވަކި ގައުމެއްގެ ތަނެއް ނޫން ކަމަށް ވިދާޅުވެފަ އެވެ.
އެމަނިކުފާނަށް ރައްދު ދެއްވައި، އެ ޕާޓީގެ ޗެއާޕާސަންގެ މަގާމުގައި ހުންނެވި ފައްޔާޒު ވަނީ ނަޝީދު ވެރިކަމުގައި ހުންނެވިއިރު ފޯޅަވައްސަކީ ރާއްޖޭގެ ބައެއް ކަމަށް ދެކިލެއްވިނަމަ މޮރިޝަސްއާ އެކު އިން ވަކިކުރަން އެއްބަސްވީ ކީއްވެތޯ އައްސަވާފަ އެވެ.
މޮރިޝަސްއާ ގުޅިގެން އިނގިރޭސި ސަރުކާރާ މަޝްވަރާއެއް ކުރަން އެމަނިކުފާނުގެ ސަރުކާރުން 2011 ވަނަ އަހަރު އެއްބަސްވި ކަމަށް މީގެކުރިން ނަޝީދު ހާމަކުރައްވާފައިވެ އެވެ.
ދިވެހި ނެވިން ރާއްޖޭގެ ސަރަހައްދު ބަޔާން ކުރަނީ ފޯޅަވައްސާ އެކު ކަމަށާއި ފޯޅަވައްސަކީ ރާއްޖޭގެ ރަށެއް ކަމަށް ބުނުމަށް އެތަކެއް ތާރީހީ އަދި ސަގާފީ ގުޅުމުގެ ހެކި އެބެހުރި ކަމަށް ވެސް ނަޝީދު ވިދާޅުވެފައިވެ އެވެ.
ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުވި ކަމަށް ބުނެ ރައްޔިތުންގެ މަޖިލީހަށް ކުއްލި މައްސަލައެއް ހުށަހެޅުއްވި އާދަމް ޝަރީފުއަށް ރައްދު ދެއްވާ ފައްޔާޒު ވިދާޅުވެފައިވަނީ 2017 ވަނަ އައިސީޖޭ ގައި މޮރީޝަސް އަށް ފޯޅަވަހި ދިނުމަށް ނިންމި އިރު އެކަމާއި ދެކޮޅަށް އާދަމް ޝަރީފު ޑިފެންސް މިނިސްޓަރުކަން ކުރެއްވި ސަރުކާރުން ދައުވާ ނުކުރީ ކީއްވެކަމާއި މެދު ސުވާލު އުފައްދާފަ އެވެ. އަދި, މި މައްސަލައިގައި އޭރު އާދަމް ޝަރީފު ކުރެއްވީ ކޮން މަސައްކަތެއްތޯވެސް ފައްޔާޒު ވަނީ އައްސަވާފަ އެވެ.
މީގެ އިތުރުން ސަރުކާރުން ޗާގޮސް ގެ ސިޔާދަތީ ބާރު ހޯދުމުގެ މައްސަލައިގައި މޮރިޝަސް އަށް ތާއިދުކުރުމަށް ނިންމީ އިންޑިއާގެ ނުފޫޒުން ކަމަށް ވިދާޅުވެ ސަރުކާރަށް ފާޑު ވިދާޅުވި ކުރީގެ ބަންޑާރަ ނައިބު ޑރ. މުހައްމަދު މުނައްވަރަށްވެސް ފައްޔާޒު ވަނީ ރައްދު ދެއްވާފަ އެވެ. އެގޮތުން 1992 ވަނަ އަހަރު މުނައްވަރުގެ ބަންޑާރަނައިބު ކަމުގައި ރާއްޖެއާއި ފޯޅަވަހީގެ ބައުންޑަރީ ކަނޑަ އެޅުމަށް ވާހަކަދެކެވުނީ ކީއްވެތޯ ފައްޔާޒު ވަނީ ސުވާލު އުފައްދާފަ އެވެ.
މައްސަލައިގެ ފަސްފަހަތް
އިންޓަނޭޝަނަލް ކޯޓް އޮފް ޖަސްޓިސް ނިންމާފައި ވަނީ ޗާގޯސް އިސްތިއުމާރު ކޮށްފައިވާ ކުރުން ނިމުމަކަށް ގެނެސް ވީ އެންމެ އަވަހަކަށް މޮރިޝަސްއާ އެތަން ހަވާލުކުރުމަށެވެ. އެ ނިންމުމާ ހަ މަސް ދުވަހުގެ ތެރޭގައި ތަންފީޒުކޮށް ޗާގޯސް މޮރިޝްސްއާ ހަވާލުކުރަން، މެއި 22، 2019 އދ. އިން ފާސްކުރި ގަރާރަށް 116 ގައުމުން ތާއިދުކުރި އެވެ. ނަމަވެސް ރާއްޖޭން އޭރު އެ ގަރާރަށް ތާއިދެއް ނުކުރެ އެވެ.
އދ ގެ އާންމު މަޖިލީހުގައި އޮތް އެ ގަރާރުގެ މައްސަލައިގައި ރާއްޖެއިން މޮރިޝަސްއާ އެއްކޮޅަށް ވޯޓު ދޭން ނިންމާފައި އޮތަސް، ރާއްޖެއިން މޮރިޝަސްއާ ދެކޮޅަށް ޓްރައިބިއުނަލުގައި ވަކާލާތުކުރަމުން ގެންދާ މައްސަލަގައި ޖަވާބުދާރީވަމުން އައިސްފައިވާ އެއްވެސް ކަމަކަށް ނުވަތަ ސްޓޭންޑަށް އެއްވެސް ބަދަލެއް ނުގެންނާނެ ކަމަށް އެޓާނީ ޖެނެރަލް އޮފީހުގެ ބަޔާނުގައިވެ އެވެ.
އެ ބަޔާނުގައި ބުނެފައިވާ ގޮތުގައި ކުރިން ގަރާރަށް ތާއިދު ނުކުރީ، ދިވެހިރާއްޖޭގެ ކޮންޓިނެންޓަލް ޝެލްފް 200 ނޯޓިކަލް މޭލަށްވުރެ އިތުރުކުރުމަށް ދިވެހިރާއްޖެއިން ކޮމިޝަން އޮން ދަ ލިމިޓްސް އޮފް ދަ ކޮންޓިނެންޓަލް ޝެލްފް (ސީ.އެލް.ސީ.އެސް.) އަށް 2010 ގައި ހުށަހެޅި ހުށަހެޅުމަށް މޮރިޝަސްއިން އިއުތިރާޒުކޮށް 2011 ގައި "ފޯމަލް ޕްރޮޓެސްޓް" ހުށަހެޅުމުންނެވެ.
އެ ނިންމުން ބަދަލުކޮށް، މޮރިޝަސްއާ އެއްކޮށް ވޯޓުލާން ނިންމައި އެކަން ރައީސް އިބްރާހިމް މުހައްމަދު ސޯލިހު ސިޓީފުޅަކުން މޮރިޝަސްގެ ބޮޑުވަޒީރަށް އަންގަވާފައިވާކަން، ޓްރައިބިއުނަލްގައި ހިނގަމުންދާ އަޑުއެހުމުގައި އެޓާނީ ޖެނެރަލް އިބްރާހިމް ރިފްއަތު ވަނީ ފާހަގަ ކުރެއްވައިފަ އެވެ.
އެޓާނީ ޖެނެރަލް އޮފީހުގެ ބަޔާނުގައި ބުނެފައިވަނީ އދ. އާންމު މަޖިލީހުގައި ވަކި ގޮތަކަށް ވޯޓު ދިނުމަކީ ރާއްޖޭގެ ހާރިޖީ ސިޔާސަތާ ގުޅިފައިވާ ކަމެއް ކަމަށާއި ހާރިޖީ ސިޔާސަތު ކަނޑައެޅުމާއ، ހިންގުމާއި އެ ސިޔާސަތު ހިނގާ ނުހިނގާ ގޮތް ބަލައި، ބޭރު ގައުމުތަކާއި ބައިނަލްއަގުވާމީ ޖަމްއިއްޔާތަކާއެކު ގުޅުން ގާއިމުކޮށް ދެމެހެއްޓުމަކީ ރައީސުލްޖުމްހޫރިއްޔާއަށް ލިބިދޭ ބާރެއް ކަމަށެވެ.
ޗާގޯސްގެ މައްސަލައިގެ ގަރާރާ ގުޅޭ ގޮތުން މޮރިޝަސްއާ އެއްކޮޅަށް ވޯޓުލާން ރާއްޖޭން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު، ގައުމުތަކުގެ ސިޔާސަތީ ބާރު އޮތުމަށް ތާއިދުކުރާ ގައުމަކަށް ވާތީ، އަދި މޮރިޝަސް އާއި ރާއްޖެއާ ދެމެދު އޮތް ގުޅުން އިތުރަށް ބަދަހިވަމުން އަންނާތީ ކަމަށް އެޓާނީ ޖެނެރަލް އޮފީހުގެ ބަޔާނުގައިވެ އެވެ.
