މިދިޔަ އަހަރާ އަޅާބަލާއިރު، މިއަހަރު މިހާތަނަށް ރާއްޖޭގެ ފަތުރުވެރިކަމަށް 34.1 ޕަސަންޓުގެ ކުރިއެރުމެއް އައިސްފި އެވެ.
ޓޫރިޒަމް މިނިސްޓްރީން އާންމުކުރި ތަފާސްހިސާބުތަކުން ދައްކާގޮތުގައި، މިއަހަރުގެ މިހާތަނަށް ރާއްޖެ އައިސްފައި ވަނީ 1.2 މިލިއަން ފަތުރުވެރިންނެވެ. އަދި މިދިޔަ އަހަރުގެ އެ މުއްދަތުގައި އައީ 953،000 ފަތުރުވެރިންނެވެ.
މި މަހުގެ ފުރަތަމަ 19 ދުވަހު 88،000 ފަތުރުވެރިން ރާއްޖެ އައިއިރު، މިދިޔަ އަހަރު އެ މުއްދަތުގައި ރާއްޖެ އައީ 82،000 ފަތުރުވެރިންނެވެ.
މިއަހަރު ދުވާލަކަށް އެވްރެޖުކޮށް 4،381 ފަތުރުވެރިން ރާއްޖެ އަންނައިރު، އެ ފަތުރުވެރިން ރާއްޖޭގައި މަޑުކުރަނީ އެވްރެޖުކޮށް އަށް ދުވަހަށެވެ.
މިއަހަރު ރާއްޖޭގެ އެންމެ ބޮޑު ފަތުރުވެރިކަމުގެ މާކެޓުތަކަކަކީ އިންޑިއާ، ރަޝިޔާ އަދި އިނގިރޭސިވިލާތާއި ޖަރުމަނެވެ. އެ ހަތަރު ގައުމުން އެކަނި ރާއްޖޭގެ މާކެޓުގެ 45.3 ޕަސަންޓު ހިއްސާ ކުރެ އެވެ. އެގޮތުން އަހަރުގެ މިހާތަނަށް އިންޑިއާއިން 180،255 ފަތުރުވެރިން، ރަޝިޔާއިން 155،490 ފަތުރުވެރިން، ޔޫކޭއިން 139،788 ފަތުރުވެރިން, ޖަރުމަނުން 103،828 ފަތުރުވެރިން ރާއްޖެ އައިސްފައި ވެއެވެ.
އޭގެ އިތުރަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރަމުން ދަނީ އިޓަލީ އާއި އެމެރިކާ އާއި ފްރާންސްގެ އިތުރުން ސްޕެއިނާއި ސައުދީ އަރަބިއްޔާ އަދި ސްވިޒަލެންޑުންނެވެ.
މި އަހަރަށް ފާސްކުރި ބަޖެޓުގައި ޓޫރިސްޓުން ޒިޔާރަތްކުރާނެ އަދަދެއްގެ ގޮތުގައި ޖެހީ 1،632،432 ޓޫރިސްޓުންނެވެ. އެއީ "މޮޑަރޭޓް ކޭސް" ނުވަތަ ހާއްސަ ހާލަތެއް މެދުވެރިނުވާހާ ހިނދަކު އަންނާނެ ކަމަށް ލަފާކުރި އަދަދެވެ. އޭގެ ތެރެއިން އެއް މިލިއަން ފަތުރުވެރިން މިދިޔަ އޮގަސްޓުމަހާ ހަމައަށް އައިއިރު، އޮކްޓޯބަރު މަހާ ހަމައަށް މިވަނީ 1.2 މިލިއަން ފަތުރުވެރިން އައިސްފަ އެވެ.
މިއަހަރުގެ ޓާގެޓުގެ ގޮތުގައި އޮތް 1.6 މިލިއަން ފަތުރުވެރިންނާ ގާތަށް ރާއްޖެ ދާއިރު، އެ ޓާގެޓު ހާސިލު ކުރެވޭނެ ކަމަށް ޓޫރިޒަމް މިނިސްޓްރީން ލަފާ ކުރަނީ ނޮވެމްބަރު ނުވަތަ ޑިސެމްބަރު މަހުގެ ތެރޭގަ އެވެ.
ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިސްތިހާރު ކުރުމަށް ގިނަ ހަރަކާތްތަކެއް ރާއްޖެ އާއި ރާއްޖޭން ބޭރުގައި އަންނަނީ ހިންގަމުންނެވެ. ވަކިން ހާއްސަކޮށް މިއަހަރަކީ ރާއްޖޭގައި ފަތުރުވެރިކަން ފެށިތާ 50 އަހަރު ފުރޭ ރަންޔޫބީލް އަހަރަށްވުމާ އެކު ޓޫރިޒަމް މިނިސްޓްރީ އިސްވެ އަންނަނީ ކުލަގަދަ ގޮތެއްގައި އެކަން މުޅި އަހަރު ތެރެއަށް ބަހާލައިގެން ފާހަގަކުރަމުންނެވެ.
