ފާއިތުވީ 1443 ވަނަ އަހަރުގެ ހައްޖުގެ އަޅުކަމަށް ދިޔަ ދިވެހި ހައްޖާޖީންނަށް ޕެނަޑޯލް ވިއްކާފައިވާ ކަމަށާއި އެހެންނަމަވެސް އެކަމާ ގުޅިގެން އެއްވެސް ހައްޖާޖީއަކު ޝަކުވާކޮށްފައި ނުވާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހައްޖުވެރިންނަށް ޕެނަޑޯލާއި ކޮފީ ވިއްކާފައިވޭތޯ ލިޔުމުން ސުވާލުކުރައްވާފައިވަނީ މާފަންނު މެދު ދާއިރާގެ މެންބަރު އިބްރާހިމް ރަޝީދެވެ. އަދި އެކަމާ ގުޅިގެން ޝަކުވާ ލިބުނުތޯއާއި ޝަކުވާ ހައްލުކުރުމަށް މަސައްކަތް ކުރެއްވިތޯ ސުވާލުކުރައްވާފައިވެ އެވެ.
"ހައްޖު ކޯޕަރޭޝަންގެ ފަރާތުން 1443 ވަނަ އަހަރުގެ ހައްޖުގައި ހައްޖުވެރިންނަށް ޕެނެޑޯލް ގުޅަ ވިއްކާފައިވާކަމުގެ ޝަކުވާ މިނިސްޓްރީއަށް ލިބިފައިނުވެ އެވެ،" މިނިސްޓަރުގެ ޖަވާބުގައި ވިދާޅުވި އެވެ.
އެހެންނަމަވެސް މެންބަރު އެކަމާ ގުޅިގެން ސުވާލުކުރުމުން މައުލޫމާތު ސާފުކުރުމުން، ޕެނެޑޯލް ބޭނުންވި ހައްޖާޖީންނަށް ވިއްކާފައިވާ ކަމަށް އެ ކޯޕަރޭޝަނުން ބުނެފައިވާ ކަމަށް ވެސް މިނިސްޓަރު ވިދާޅުވި އެވެ.
މެންބަރު އިބްރާހިމް ރަޝީދުގެ ސުވާލުގައިވާ ގޮތުން ހައްޖާޖީންނަށް ޕެނަޑޯލް ގުޅައެއް ވިއްކާފައިވަނީ 2 ސައުދީ ރިޔާލަށެވެ. އެއީ ދިވެހި ރުފިޔާ އިން ބަލާނަމަ ގުޅައަކަށް 8.23 ރުފިޔާ އެވެ.
ކޮފީ ވިއްކި މައްސަލައާ ގުޅިގެން މިނިސްޓަރު ވިދާޅުވީ އެކަން ކޮށްފައިވަނީ އުސޫލުގެ ތެރެއިން ކަމަށެވެ.
"މުޅި ހައްޖު ދަތުރުގައި ހައްޖާޖީންނަށް ދެވޭ ތިން އިރުގެ ކެއުމާއި ހަވީރު ސައިގެ އިތުރުން އެހެނިހެން ވަގުތުތަކުގައި އިތުރު ހިދުމަތެއްގެ ގޮތުގައި ހޮޓަލުގެ ލޮބީގައި ކޮފީ ޝޮޕެއް ހުޅުވައި ކޮފީ ގަންނަން ބޭނުންވި ފަރާތްކަށް އެ ހިދުމަތް ފޯރުކޮށްދިނުމަށް ޓަކައި ވަނީ ކޮފީ ޝޮޕްގައި ކޮފީ ވިއްކާފަ އެވެ." މިނިސްޓަރު ވިދާޅުވި އެވެ.
މި އަހަރަކީ މިއީ ދެ އަހަރުގެ މެދުކެނޑުމަކަށްފަހު ރާއްޖެއިން ހައްޖަށް ދިޔަ ފުރަތަމަ ފަހަރެވެ. ކޮވިޑުގެ ބަލިމަޑުކަމާ ގުޅިގެން 2020 ވަނަ އަހަރު އަދި މިދިޔަ އަހަރު ރާއްޖެއިން ހައްޖުގެ އަޅުކަމަށް ހައްޖުވެރިން ގޮސްފައި ނުވެ އެވެ.
މި އަހަރު ރާއްޖޭގެ އަމީރުލް ހައްޖަކީ އިސްލާމިކް މިނިސްޓަރު ޑރ. އަހުމަދު ޒާހިރު އަލީ އެވެ.
