އެފްއޭއެމް އިން އިއްޔެ ފެށި 14 އަހަރުން ދަށުގެ ޔޫތު ލީގުގެ ފުރަތަމަ މެޗުތަކުން މޯލްޑިވްސް ސޮކަ މޭޓްސް (އެމްއެސް މޭޓްސް)، މާޒިޔާ ސްޕޯޓްސް އެންޑް ރެކްރިއޭޝަން، އެޑްވެންޗާސް ފުޓްބޯލް އެކެޑަމީ އަދި ސުޕަ ޔުނައިޓެޑް ސްޕޯޓްސް (ސަސް) މޮޅުވެއްޖެ އެވެ.
އިއްޔެ ހަވީރު މުބާރާތް ފެއްޓުމުގެ ރަސްމިއްޔާތު ޝަރަފްވެރިކޮށްދިނީ ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) އާއި ސަތާރަ އަހަރު ވަންދެން ރާއްޖޭގެ ގޯލު ބެލެހެއްޓި ހުނަރުވެރި ކީޕަރު އިމްރާން މުހައްމަދު އެވެ.
މުބާރާތުގެ ފުރަތަމަ މެޗުގައި އިއްޔެ ހަވީރު އެމްއެސް މޭޓްސް އިން ވަނީ 3-2 އިން ހުޅުމާލެ ޔޫތު އެންޑް ސްޕޯޓްސްގެ މައްޗަށް ކުރިހޯދައިފަ އެވެ. ހަވީރު ކުޅުނު ދެ ވަނަ މެޗުގައި މާޒިޔާ އިން 6-0 އިން ބީޖީ ސްޕޯޓްސް ކްލަބް ބަލިކުރި އެވެ.
14 އަހަރުން ދަށުގެ ޔޫތު ލީގު ފެށުމުގެ ގޮތުން ދަގަނޑޭ (ވ) އާއި އިމްރާން ކިކޮފް ކުރަނީ.
މުބާރާތުގައި ދެ މެޗެއް ރޭ ވެސް ކުޅެވުނެވެ. އެ ގޮތުން ރޭ އެޑްވެންޗާސް ފުޓްބޯލް އެކެޑަމީން ވަނީ 3-0 އިން ފްރެންޑްސް އެންޑް ފެމިލީ ފުޓްބޯލް އެެކެޑަމީ ބަލިކޮށްފަ އެވެ. އަދި ދަ ގްރާންޑޭ ސްޕޯޓްސް ކްލަބް އަތުން ސަސް މޮޅުވީ 11-0 އިންނެވެ.
އަންނަ މަހުގެ ތިން ވަނަ ދުވަހުގެ ނިޔަލަށް ކުރިއަށްގެންދާ ޔޫތު ލީގުގައި ޖުމްލަ އެކު ނުވަ ޓީމެއް ބައިވެރިވެފަ އެވެ. އެއީ އެމްއެސް މޭޓްސް، މާޒިޔާ، ސަސް، އެޑްވެންޗާސް ފުޓްބޯލް އެކެޑަމީ، ހުޅުމާލެ ޔޫތު އެންޑް ސްޕޯޓްސް، ދަ ގްރާންޑޭ ސްޕޯޓްސް ކްލަބް، ކްލަބް ވެލެންސިއާ އެކެޑަމީ އަދި ބީޖީ އެކެޑަމީ އެވެ.
މިއީ އެފްއޭއެމުން މި އަހަރު ބާއްވާ ޔޫތު ފުޓްބޯޅައިގެ ތިން ވަނަ މުބާރާތެވެ. އެ ގޮތުން 19 އަހަރުން ދަށުގެ ޔޫތު މުބާރާތުގެ ޗެމްޕިއަަނަކީ އީގަލްސް އެވެ. އަދި 16 އަހަރުން ދަށުގެ ޔޫތު މުބާރާތް ކާމިޔާބުކުރީ ވެލެންސިއާ އިންނެވެ.
