އަދާލަތު ޕާޓީން ކުރަމުންދާ މަސައްކަތަކީ "ސިޔާސީ ގޭސް" އެނބުރުން ކަމަށް ވިދާޅުވެ އެ ޕާޓީއަށް ޕީޕީއެމްގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީން ވަރަށް ބޮޑަށް ރޭ ފާޑު ވިދާޅުވެއްޖެ އެވެ.
އަދާލަތު ޕާޓީއާމެދު ކުރިން ގަބޫލުކުރެވުނު ގޮތްތައް މިހާރު ބަދަލުވެގެން ދިޔައީ އެ ޕާޓީގައި ތިއްބެވި ބައެއް އިލްމުވެރިން ސިޔާސީ ގޮތުން ވާހަކަ ދައްކަވާ ގޮތާއި އަމަލު ކުރައްވާ ގޮތުން ކަމަށް ހއ. އިހަވަންދޫގައި ބޭއްވި ޕީޕީއެމްގެ ޖަލްސާގައި ޔާމީން ވިދާޅުވި އެވެ.
ކީއްވެގެންތޯ އަދާލަތު ޕާޓީއެއް އުފެދުނީ. އަޅުގަނޑުމެންނަށް އޭރު ހީވި އަދާލަތު ޕާޓީއަށް ވަދެގެން ނޫނިއްޔާ ﷲ ގެ ދިންނެވުމާއި ފުއްސެވުން ނުލިބޭނެ ކަމަށް. މިއަދު އެކަމަކު އަޅުގަނޑަށް ހީވަނީ އޭގެ އަނެއް ކޮޅަށް. ﷲގެ ދިންނެވުމާއި ފުއްސެވުން ނުލިބޭނީ އަދާލަތު ޕާޓީއަށް ވަދެއްޖިއްޔާ. އެހާވަރަށް ގޭސް އަނބުރައިގެން ސިޔާސީ ކަންތައްތައް ކުރަނީ،" ޔާމީން ވިދާޅުވި އެވެ.
ކުރިއަށް އޮތް ރިޔާސީ އިންތިހާބަށް އިޝާރަތް ކުރައްވައި ޔާމީން ވިދާޅުވީ ރާއްޖެއަށް ފަސް އަހަރުން އެއް އަހަރު އަންނަ ބޮޑު އިރުވައި މޫސުން މިއޮތީ އައިސްފައި ކަމަށާއި، މިފަހަރު ފަގުޑި އަޅައިގެން ޝެއިޚުން އަންނާނެ ކަމަށެވެ. އެ ބޭފުޅުން އާޔަތާއި ހަދީސް ކިޔުއްވާނެ ކަމަށާއި އެ އާޔަތާއި ހަދީސް ކިޔުއްވާނީ ބޭނުންވާ މާނައެއް ނެރޭ ގޮތަށް ކަމަށް އެ މަނިކުފާނު ވިދާޅުވި އެވެ.
"އެ މީހުން ބޭނުން ވެއްޓަކަށް، ބޭނުންވާ ހާލަތަކަށް ފައްތަން [އާޔަތާއި ހަދީސް] ކިޔާނީ. އެ ދައްކާއިރު ނުދައްކާ ވާހަކައެއް ވެސް ނޯންނާނެ،" ޔާމީން ވިދާޅުވި އެވެ.
އިހަވަންދޫގައި ރޭ ބޭއްވި ޕީޕީއެމްގެ ޖަލްސާގައި އެ ޕާޓީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން ވާހަކަ ދައްކަވަނީ. -- ފޮޓޯ: ޕީޕީއެމް
ގައުމުގައި ފާހިޝް ކަންކަން ގިނަވެގެން ދާއިރު ބައެެއް ދީނީ އިލްވެރިން ސަރުކާރަށް އެއް ފަހަރު ފާޑުކިޔައިފި ނަމަ ފަސް ފަހަރު ތައުރީފު ކުރައްވާ ކަމަށާއި އެކަމުން ނަގައިދޭ ފިލާވަޅަކީ އެފަދަ އިލްމުވެރިންގެ މަގުސަދަކީ ދުނިޔޭގެ އިއްޒަތާއި ލައްޒަތުކަން އެނގިގެންދާ ކަމަށް ޔާމީން ވިދާޅުވި އެވެ.
"މިގޮތަށް ކަންތައް ކުރެއްވީމާ ދެން އަޅުގަނޑުމެން ކިހިނެއްތޯ އެ ބޭފުޅުން ދީނީ ފަތުވާއެއް ދެއްވިޔަސް އެ ވާހަކައެއް ގަބޫލު ކުރައްވާނީ. އުނދަގޫވާނެ ދެއްތޯ ގަބޫލުކުރަން،" ޔާމީން ވިދާޅުވި އެވެ.
ސަރުކާރުން ގޯސް ކަމެއް ކުރި ނަމަވެސް އަދާލަތު ޕާޓީގެ ދެ ވަޒީރުންނަށް އެކަން ފެނިވަޑައިނުގަންނަވާ ކަމަށާއި ޔޯގާގެ މައްސަލަ ވެސް ނިމިގެން ދިޔައީ ޓެރަރިޒަމްގެ ދައުވާ ކޮށްގެން ކަމަށް ޔާމީން ވިދާޅުވި އެވެ. އަދި އިސްލާމީ މަރުކަޒަކަށް ބޮޑުކަމު ހާޖަތަށް ދިޔަ މީހަކީ މޮޔައެެއް ކަމަށް ބުނެ ދޫކޮށް ނުލެވޭނެ ކަމަށް ވެސް ޔާމީން ވިދާޅުވި އެވެ.
މި ސަރުކާރުގައި އަދާލަތު ޕާޓީއަށް ނިސްބަތްވާ ދެ ވަޒީރުންނަކީ ހޯމް މިނިސްޓަރު ޝެއިޚް އިމްރާން އަބްދުﷲ އާއި އިސްލާމިކް މިނިސްޓަރު ޑރ. އަހުމަދު ޒާހިރެވެ.
