ފާއިތުވީ އަހަރުގެ ހައްޖުގެ އަޅުކަމަށް ހައްޖު ކޯޕަރޭޝަންގެ އެހީތެރިންގެ ގޮތުގައި ގެންދާނެ މީހުން ހޮވާފައިވާނީ މިނިސްޓްރީގެ ސިޔާސަތުތަކާ އެއްގޮތަށް ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު މިއަދު ވިދާޅުވެއްޖެ އެވެ.
ހައްޖަށް އެހީތެރިން ގެންދިއުމުގައި ނުފޫޒު ބޭނުން ކޮށްފައިވާ ކަމުގެ ތުހުމަތުތަކާއެކު އެ ކަން ސާފުކުރުމަށް މިނިސްޓަރާ ސުވާލުކުރުމަށް ހުށަހެޅުއްވީ މާފަންނު މެދު ދާއިރާގެ މެންބަރު އިބްރާހިމް ރަޝީދެވެ.
"އެއްވެސް ގޮތަކަށް ސައޫދީ އަރަބިއްޔާއަށް ދަތުރުކުރައްވާފައިނުވާ އަދާލަތު ޕާޓީގެ މެންބަރުންނާއި މިނިސްޓްރީ އޮފް އިސްލާމިކް އެފެއާޒްގެ މުވައްޒަފުންގެ ތެރެއިން ވަކި ބަޔަކަށް ފުރުސަތު ދީގެން ހައްޖު ކޯޕަރޭޝަންގެ އެހީތެރިންގެ ގޮތުގައި މީހުން ހައްޖަށް ގެންގޮސްފައިވާނެތޯ،" މެންބަރު ކުރެއްވި ސުވާލުގައި ވިދާޅުވެފައިވެ އެވެ.
މި ސުވާލަށް ލިޔުމުން ޖަވާބު ދެއްވަމުން މިނިސްޓަރު ވިދާޅުވީ ހައްޖު އެހީތެރިން ހޮވާފައިވާނީ އާންމު އުސޫލުގެ ދަށުން އެ ކަމަށް އިއުލާނުކޮށް، ކުރިމަތިލީ ފަރާތްތައް އިންޓަވިއުކޮށްގެން އެންމެ މަތީ މާކްސް ހޯދި މީހުނަށް އިސްކަން ދީގެން ކަމަށެވެ.
މީގެ އިތުރުން، މިނިސްޓްރީގެ އެދުމުގެ މަތީން އެހީތެރިންގެ ގޮތުގައި މިނިސްޓްރީގެ މުވައްޒަފަކު ވެސް ބައިވެރިވެފައިވާ ކަން ޖަވާބުގައި ފާހަގަކުރައްވާފައިވެ އެވެ.
މިއަދުގެ ޖަލްސާގައި މެންބަރު ރަޝީދު ވަނީ ސަރުކާރުން ހޮސްޕިޓަލުތަކުގެ ބަދަލުގައި ހައްޖު ކޯޕަރޭޝަނުން އެއްވެސް އަމިއްލަ ކްލިނިކަކަށް ފައިސާ ދައްކައިގެން ހައްޖަށް ގެންދިޔަ މީހުން ކޮވިޑަށް ޓެސްޓު ކޮށްފައިވޭތޯ ވެސް ސުވާލުކުރައްވާފަ އެވެ.
މި ސުވާލަށް ޖަވާބު ދެއްވަމުން މިނިސްޓަރު ވަނީ އެކަމަށް އިއުލާނު ކުރުމުން އެންމެ ހެޔޮ އަގެއް ހުށަހަޅާފައިވާނީ މެޑިފްލެކްސް ލެބޯރޭޓަރީން ކަމަށާއި އެ ހިދުމަތް ހަވާލުކުރީ އެ ފަރާތާ ކަމަށް ވިދާޅުވެފަ އެވެ.
"އެ ކުންފުނީގެ ފަރާތުން 1443 ވަނަ އަހަރު ހައްޖުވެރިންގެ ޕީސީއާރު ޓެސްޓު ހަދާފައިވަނީ މެޑިފްލެކްސް މެދުވެރިކޮށް ބޮލަކަށް 200 ރުފިޔާގެ ރޭޓުންނެވެ." މިނިސްޓަރު ވިދާޅުވެފައިވެ އެވެ.
މިނިސްޓަރުގެ ޖަވާބުގައި ވަނީ އައިޖީއެމްއެޗުން އެ ހިދުމަތް އެ ހައްޖު ކޯޕަރޭޝަނަށް ފޯރުކޮށްދެމުން ދިޔައީ ބޮލަކަށް 700 ރުފިޔާއަށް ކަމަށް ވެސް ވިދާޅުވެފަ އެވެ.
