ރާއްޖޭގެ ސިއްހީ ދާއިރާ ދިރާސާ ކުރުމަށް ފަންޑެއް ލިބިފައިވާ ކަމަށާއި ނަމަވެސް އެ ފަންޑުގެ ބޭނުން އެންމެ އެކަށީގެންވާ ގޮތުގައި ނުހިފާތީ އޭގެ ބޭނުން ހިފުމަށް ހެލްތް މިނިސްޓަރު އަހުމަދު ނަސީމް އެދިވަޑައިގެންފި އެވެ.
ރާއްޖޭގެ ސިއްހީ ދާއިރާއާ ގުޅުންހުރި މުހިންމު ދިރާސާތަކުގެ މައުލޫމާތު ހިމެނޭ ފޮތެއްކަމުގައިވާ "ކޮމްޕެންޑިއަމް އޮފް ހެލްތް ރިސާޗް އިން މޯލްޑިވްސް 2018-2021" މިއަދު ވަނީ އާންމު ކޮށްފަ އެވެ.
އެ ފޮތް އިފްތިތާހު ކުރުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ މިފަދަ ދިރާސާތައް ކުރުމަށް މިނިސްޓްރީން ކޮށްދޭން ޖެހޭ ކަމަކީ ފައިސާގެ ކަންކަން ހަމަޖެއްސުން ކަމަށެވެ. އެކަން މަގުފަހިވެފައި އޮތް ނަމަވެސް އެންމެ އެކަށީގެންވާ ގޮތުގައި އޭގެ ބޭނުން ނުހިފޭ ކަމަށް މިނިސްޓަރު ފާހަގަ ކުރެއްވި އެވެ.
"އަޅުގަނޑު ކޮށްދޭން ޖެހޭ ކަމަކީ ދިރާސާ ކުރުމަށް ބޭނުންވާ ފައިނޭންޝަލް އެހީ ދިނުން. ފަނޑެއްވެސް އެބަ އޮތް. އެ ފަންޑުން އެއްވެސް ބޭނުމެއް ނުކުރެވި އެ އޮންނަނީ. އޭގެ ބަދަލުގައި އެ ފަންޑުންވެސް ބޭނުން ހިފަންވީ. ދިރާސާ ކުރާ މީހުންނާ ދިރާސާ ކުރުމަށް މަސައްކަތް ކުރުމަށް މަގުފަހިކޮށްދޭ މީހުންނަށް އެހީވެސް އަޅުގަނޑުމެން ފޯރުކޮށްދޭނަން،" މިނިސްޓަރުގެ ވާހަކައިގައި ވިދާޅުވި އެވެ.
ދިރާސާ ކުރުމަށް ފަންޑުގެ ބޭނުން ހިފުމަށް މި އަހަރު މަސައްކަތްތަކެއް ފެށުމަށް ނިންމާފައިވާ ކަމަށް މިނިސްޓަރު ފާހަގަ ކުރެއްވި އެވެ.
"އަޅުގަނޑުމެން މި އަހަރު ނިމުމުގެ ކުރިން ގޮތެއް ރާވާފައި އެކަންތައް ކުރަން ފަށަން ޖެހޭނީ. އަޅުގަނޑުމެން އެދެނީ އަޅުގަނޑުމެން މިގޮތަށް ކުރާ ކޮންމެ ދިރާސާއެއް ރަނގަޅަށް ކޮށް އެއިން އިބުރަތް ހާސިލްކުރުން،" މިނިސްޓަރު ވިދާޅުވި އެވެ.
ހެލްތް މިނިސްޓްރީން މިއަދު ނެރުނު ފޮތުގައި 30 އަށް ވުރެ ގިނަ ސިއްހީ ދިރާސާތަކުގެ އެބްސްޓްރެކްޓް ހިމެނެ އެވެ. މީގެ ތެރޭގައި، ބަލިތަކުން ރައްކާތެރިވުމާއި، ބަލިތަކަށް ފަރުވާދިނުމާއި، ސިއްހީ ހިދުމަތްތައް ފަދަ މައުލޫތަކަށް ހެދިފައިވާ ދިރާސާތައް ހިމެނެ އެވެ. އަދި ކޮވިޑާ ގުޅޭގޮތުން ފާއިތުވި ދެ އަހަރުގެ ތެރޭގައި ހެދިފައިވާ ދިރާސާތައްވެސް މިފޮތުގައި ހިމަނާފައިވެ އެވެ.
