ގޭންގުތަކާ ދެކޮޅަށް ކުރަމުން އަންނަ މަސައްކަތްތަކުގައި ފަހަތަށް ނުޖެހޭނެ ކަމަށާއި އެ މަސައްކަތުގެ ނަތީޖާ ފެންނާނެ ކަމުގެ ޔަގީންކަން ހޯމް މިނިސްޓަރު އިމްރާން އަބްދުﷲ ދެއްވައިފި އެވެ.
ފުލުހުން އެންމެ ފަހުން ބުނެފައިވާ ގޮތުގައި ރާއްޖޭގައި ގޭންގުތަކުގެ ހާލަތު ހުރީ ކަންބޮޑުވާން ޖެހޭ ފަދަ ހާލަތެއްގަ އެވެ. ގޭންގުތަކުގެ ނުފޫޒު ދައުލަތުގެ އެކި މުއައްސަސާތަކަށާއި ސިޔާސީ އިސް މީހުންނަށް ކޮށްފައިވާ ކަން ފާހަގަކޮށްފައިވެ އެވެ.
"ގޭންގުތަކުގެ ކުރިމަތީގައި އަޅުގަނޑު ކުޑަކޮށް ވެސް ކުޑަކަކޫ ނުޖަހާނަން، ތިރި ނުވާނަން އިނގޭތޯ،" ގޭންގުތަކުގެ އެއްވެސް ނުފޫޒެއް މިނިސްޓަރަށް ފޯރާފައިވޭތޯ "އަދަދު" އިން ސުވާލުކުރުމުން އިމްރާން ވިދާޅުވި އެވެ.
އިމްރާން ވިދާޅުވި ގޮތުގައި ގޭންގުތަކުގެ މައްސަލައަކީ އެ މަގާމާ ހަވާލުވީއްސުރެ އެންމެ އިސްކަމެއް ދީގެން ކުރަމުން އަންނަ މަސައްކަތެވެ. އެގޮތުން މިފަދަ ކަންކަން ހިނގަމުން އަންނާތީ، އެ މައްސަލަ ރައީސް އިބްރާހިމް މުހައްމަދު ސޯލިހަށް ހުށަހަޅައިގެން މަސައްކަތްތަކެއް ކުރެވިފައިވާ ކަމަށް އިމްރާން ވިދާޅުވި އެވެ.
"އަޅުގަނޑުމެން ދެންނެވިން ދައުލަތުގެ ހުރިހާ މުވައްސަސާތަކާއި އަދި ދައުލަތުގެ ނުފޫޒުގަދަ ފަރާތްތަކުން ދިމާވާ މިފަދަ ކަންކަން ހައްލު ކުރެވޭނެ ކަމަށް އަޅުގަނޑަށާއި ފުލުހުންނަށް ފެންނަނީ ހުދު ރައީސުލްޖުމްހޫރިއްޔާގެ ބެއްލެވުމުގެ ދަށުން ބައެއް ކަންކަން ކުރެވިގެން،" އިމްރާން ވިދާޅުވި އެވެ.
މި މައްސަލައަށް ހައްލެއް ގެނައުމުގެ ގޮތުން ގޭންގުތަކާ ދެކޮޅަށް މަސައްކަތް ކުރުމަށް ވެސް ރައީސްގެ ސީދާ ބެއްލެވުމުގެ ދަށުން ޓާސްކް ފޯސް އެއް އެކުލަވާލައި، ކުރު ރާސްތާ، މެދު ރާސްތާ އަދި ދިގު ރާސްތާގެ ޕްލޭނެއްގެ ދަށުން އެ މަސައްކަތްތައް ކުރެވެމުން އަންނަ ކަން އިމްރާން ފާހަގަކުރެއްވި އެވެ.
އިމްރާން ވިދާޅުވި ގޮތުގައި މިހާރު ކުރަމުން އަންނަނީ ކުރު ރާސްތާގައި ކުރަން ޖެހޭ މަސައްކަތްތަކެވެ؛ އެއީ ސިފައިންނާއި ފުލުހުން ގުޅިގެން އޮޕަރޭޝަން ހިންގައި، ކައިރިން ބަލައި، ދުވަހުން ދުވަހަށް ދިމާވާ ކަންކަން ކޮންޓްރޯލް ކުރުމަށް ޓަކައި ކުރާ ކަންކަމެވެ.
"އެހެންނަމަވެސް މުޅި މައްސަލައަށް ހައްލެއް ގެނައުމަށް ޓަކައި އަޅުގަނޑުމެން މެދު ރާސްތާގައި ރާވާފައި ހުރި ކަންކަން ކުރެވުނީމާ އެއީ ނަތީޖާ އަސްލުގައި ދުރުކޮށް ފެންނަން ފަށާނެ ހިސާބު، މިހާރު މިދަނީ ކިރިޔާ ހިފެހެއްޓެމުން ނުހިފެހެއްޓެމުން،" އިމްރާން ވިދާޅުވި އެވެ.
މެދު ރާސްތާގެ ޕްލޭންގެ ދަށުން ގާނޫނަށް ބަދަލު ގެނެސް، އުމްރާނީ ވަސީލަތްތަކަށް ވެސް ބަދަލުތަކެއް ގެންނަން ޖެހޭ ކަމަށާއި އަދި ގޭންގުތަކުގައި ބައިވެރިން ރިހެބިލިޓޭޓް ކުރުމަށް ޓަކައި ކުރަން ޖެހޭ މަސައްކަތްތަކެއް ވެސް ކުރުމަށް ތައްޔާރުވަމުން އަންނަ ކަމަށް އިމްރާން ވިދާޅުވި އެވެ.
