އޮލިމްޕަސް ޒަމާނީ ފެންވަރަށް ތަރައްގީކުރުމަށް ކުރަމުން އަންނަ މަސައްކަތްތައް ނިންމައި ސެޕްޓެމްބަރު މަހު ހުޅުވޭނެ ކަމަށް ކުރިން ބުނި ނަމަވެސް، އެ މަސައްކަތް ނިމޭނެ ކަމަށް މިހާރު ލަފާކުރަނީ އަންނަ މަހުގެ ނިޔަލަށް ކަމަށް އާޓްސް މިނިސްޓްރީން ބުނެފި އެވެ.
މީގެ ކުރިން މިނިސްޓްރީގެ ދަށުން ހިންގާ ނެޝަނަލް ސެންޓާ ފޮ ދަ އާޓްސް (އެންސީއޭ) އިން ވަނީ އެ މަސައްކަތް ޖޫން މަހުގެ ފަހުކޮޅަށް ނިމި، އޮލިމްޕަސް އަލުން ހުޅުވާލެވޭނެ ކަމަށް ބުނެފަ އެވެ.
ނަމަވެސް އެ މަސައްކަތް ނުނިމި، ފަހުން ވަނީ ސެޕްޓެމްބަރު މަހުގައި ނިމޭނެ ކަމަށް ބުނެ އާ ތާރީހެއް ދީފަ އެވެ.
މި މަސައްކަތުގެ އަޕްޑޭޓެއް ލިޔުމުން ހޯދުމަށް މަޑަވެލި ދާއިރާގެ އެމްޑީޕީ މެންބަރު ހުސައިން ފިރުޝާން ވަނީ މިނިސްޓަރު ޔުމްނާ މައުމޫނާ ސުވާލުކުރައްވާފަ އެވެ.
އަންނަ މަހުގެ ނިޔަލަށް ނިމޭނެ ކަމަށް ލަފާކުރާ ކަމަށް މިނިސްޓަރު ވިދާޅުވިނަމަވެސް ލަސްވާ ސަބަބެއް ހާމަކުރައްވާފައެއް ނުވެ އެވެ.
މިނިސްޓަރު ވިދާޅުވި ގޮތުގައި އޮލިމްޕަހުގައި ހިންގާ ހަރަކާތްތައް އިޝްތިހާރު ކުރުމަށް، އެ ތަނުގެ މައި ގޭޓް މަތީގައި ލެޑް ޕެނަލެއް ހަރުކޮށް، އޭގެ ވަށައިގެން ޖަހާ ކްލެޑިންގެ މަސައްކަތް ކުރެވެމުން އަންނަ ކަމަށާއި ޑާންސް ޕްރެކްޓިސް ރޫމްތަކުގައި ރިހި ބިއްލޫރި ޖެހުމުގެ މަސައްކަތް ވެސް މިހާރު ކުރެވެމުން އަންނަ ކަމަށެވެ.
މީގެ އިތުރުން ވެސް ބައެއް މަސައްކަތްތައް ކުރިއަށްދާ ކަން ފާހަގަކުރައްވައި ސައުންޑާއި ލައިޓް ހޯދުމަށް މަޝްވަރާކޮށް، ކޯޓޭޝަންތައް ބިޑް ކޮމިޓީއަށް ފޮނުވުމުގެ މަސައްކަތް ވެސް ކުރިއަށް ދާ ކަމަށް ވިދާޅުވި އެވެ.
އޮލިމްޕަސް މަރާމާތުކުރުމުގެ މަސައްކަތަކީ އިންޑިއާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަސައްކަތެކެވެ. އޮލިމްޕަސް ބަންދުކޮށްފައިވަނީ ކޮވިޑާ ގުޅިގެން 2020 ވަނަ އަހަރުގެ ތެރޭގަ އެވެ.
