19 ވަނަ މަޖިލީހުން ފަނޑިޔާރުން ވަކިކުރީ ފަޓާސްބަރިއެއްހެން ކަމަށް ވިދާޅުވެ ހުސްނީ މުބާރަކު ހެއްދެވީ ދޮގެއް!

ޖުޑީޝަރީ ކޮމިޓީގެ މުގައްރިރު، ހުސްނީ މުބާރަކު؛ ސުޕްރީމް ކޯޓުގެ ފަނޑިޔާރުންގެ މައްސަލައިގައި ޖުޑީޝަރީ ކޮމިޓީން އަމަލު ކުރި ގޮތުގެ ދިފާއުގައި ހުސްނީ މުބާރަކު ހެއްދެވީ އިތުރުފުޅެއް -- ފޮޓޯ: ރައްޔިތުންގެ މަޖިލިސް

ޖުޑީޝަރީ ކޮމިޓީގެ މުގައްރިރު، ހުސްނީ މުބާރަކު؛ ސުޕްރީމް ކޯޓުގެ ފަނޑިޔާރުންގެ މައްސަލައިގައި ޖުޑީޝަރީ ކޮމިޓީން އަމަލު ކުރި ގޮތުގެ ދިފާއުގައި ހުސްނީ މުބާރަކު ހެއްދެވީ އިތުރުފުޅެއް -- ފޮޓޯ: ރައްޔިތުންގެ މަޖިލިސް

ސުޕްރީމް ކޯޓުގެ ހަތަރު ފަނޑިޔާރުން 19 ވަނަ މަޖިލީހުން ވަކިކުރީ، އެ ފަނޑިޔާރުން ވަކިކުރަން މަޖިލީހަށް ހުށަހެޅި ދުވަހު ވަގުތުން ކޮމިޓީގެ މަސައްކަތް ވެސް ނިންމައި، އެ ދުވަހު ވޯޓަށް އަހައިގެން ކަމަށް ވިދާޅުވެ ޖުޑީޝަރީ ކޮމިޓީގެ މިހާރުގެ މުގައްރިރު، މަނަދޫ ދާއިރާގެ މެންބަރު ހުސްނީ މުބާރަކު ދޮގު ހައްދަވައިފި އެވެ.

ހުސްނީ މުބާރަކު އެކްސްގައި ކުރެއްވި ޕޯސްޓެއްގައި ވިދާޅުވީ ހަތަރު ފަނޑިޔާރުން ވަކިކުރަން 19 ވަނަ މަޖިލީހުން ފާސްކުރީ ފަނޑިޔާރުން ވަކިކުރަން ނިންމައި ޖުޑީޝަލް ސާވިސް ކޮމިޝަނުން ތައްޔާރުކުރި ރިޕޯޓު ކިޔާލަން ވެސް މެންބަރުންނަށް ފުރުސަތު ނުދީ ކަމަށެވެ.

"19 ވަނަ މަޖިލީހުން އުއްތަމަ ފަނޑިޔާރު ހިމެނޭހެން ސުޕްރީމް ކޯޓްގެ ހަތަރު ފަނޑިޔާރުން ވަކިކުރި، މަޖިލީހަށް ހުށަހެޅި ދުވަހު، ކޮމެޓީއަށް ފޮނުވައި، ހަމަ އެ ދުވަހު ކޮމެޓީން ގޮތް ނިންމި، ރިޕޯޓު ކިޔާލަން ވެސް ވަގުތު ނުދޭ، ހަވާ ފަޓާސް ބަރިއެއްހެން، އޭރު އޯކޭ،" ހުސްނީ މުބާރަކު ވިދާޅުވެފައިވެ އެވެ.

Advertisement

ހުސްނީ މުބާރަކު އެހެން ވިދާޅުވި ނަމަވެސް ރައްޔިތުންގެ މަޖިލީހުގެ ޔައުމިއްޔާތަކުންނާއި ނޫސްތަކުގައި އޭރު ލިޔެފައި ހުރި ހަބަރުތަކުން އެއީ ކަނޑައެޅިގެން ދޮގެއްކަން އެނގެ އެވެ.

ނަވާރަ ވަނަ މަޖިލީހުން ސުޕްރީމް ކޯޓުން ވަކިކުރީ އޭރުގެ އުއްތަމަ ފަނޑިޔާރު، އަހުމަދު އަބްދުالله ދީދީ އާއި ފަނޑިޔާރު އާދަމް މުހައްމަދު އާއި ފަނޑިޔާރު އަބްދުالله ދީދީ އަދި ފަނޑިޔާރު އަބްދުލްގަނީ އެވެ.

އޭގެ ތެރެއިން އޭރުގެ އުއްތަމަ ފަނޑިޔާރު، އަހުމަދު އަބްދުالله ދީދީ އާއި ފަނޑިޔާރު އާދަމް މުހައްމަދު ފަނޑިޔާރުކަމުން ވަކިކުރަން ނިންމައި ޖޭއެސްސީން މަޖިލީހަށް ފޮނުވީ ނޮވެމްބަރު 14، 2019، ގަ އެވެ. އެ ދުވަހުގެ ޔައުމިއްޔާއިން އެނގޭ ގޮތުގައި އެ ދުވަހު މަޖިލީހުގެ ތަޅުމުގައި އެކަމާ ގުޅޭ ގޮތުން ހަމައެކަނި ކުރި މަސައްކަތަކީ ފަނޑިޔާރުން ވަކިކުރުމުގެ މައްސަލަ ދިރާސާ ކުރަން ޖުޑީޝަރީ ކޮމިޓީއަށް ފޮނުވުމެވެ.

އުއްތަމަ ފަނޑިޔާރު، އަހުމަދު އަބްދުالله ދީދީ އާއި ފަނޑިޔާރު އާދަމް މުހައްމަދު ފަނޑިޔާރުކަމުން ވަކިކުރަން މަޖިލީހުން ފާސްކުރީ ނޮވެމްބަރު 18، 2019، ގަ އެވެ. އެ ދުވަހުގެ ޔައުމިއްޔާ ވެސް މަޖިލީހުގެ ވެބްސައިޓުން މިހާރު ވެސް ފެންނަން އެބަ އޮތެވެ.

ސުޕްރީމް ކޯޓުގެ ކުރީގެ ފަނޑިޔާރު އަބްދުالله ދީދީ ފަނޑިޔާރުކަމުން ވަކިކުރަން ނިންމައި ޖޭއެސްސީން މަޖިލީހަށް ފޮނުވީ އޯގަސްޓު 27، 2019، ގަ އެވެ. އެ ދުވަހުގެ ޔައުމިއްޔާއިން އެނގޭ ގޮތުގައި އެ ދުވަހު މަޖިލީހުގެ ތަޅުމުގައި އެކަމާ ގުޅޭ ގޮތުން ހަމައެކަނި ކުރި މަސައްކަތަކީ އެ މައްސަލަ ދިރާސާ ކުރަން ޖުޑީޝަރީ ކޮމިޓީއަށް ފޮނުވުމެވެ.

ފަނޑިޔާރު، އަބްދުالله ދީދީ ފަނޑިޔާރުކަމުން ވަކިކުރަން މަޖިލީހުން ފާސްކުރީ ނޮވެމްބަރު 28، 2019، ގަ އެވެ. އެ ދުވަހުގެ ޔައުމިއްޔާ ވެސް މަޖިލީހުގެ ވެބްސައިޓުން މިހާރު ވެސް ފެންނަން އެބަ އޮތެވެ.

ސުޕްރީމް ކޯޓުގެ ކުރީގެ ފަނޑިޔާރު، އަބްދުލްގަނީ މުހައްމަދު ފަނޑިޔާރުކަމުން ވަކިކުރަން ނިންމައި ޖޭއެސްސީން މަޖިލީހަށް ފޮނުވީ ނޮވެމްބަރު 27، 2019، ގަ އެވެ. އެ ދުވަހުގެ ޔައުމިއްޔާއިން އެނގޭ ގޮތުގައި އެ ދުވަހު މަޖިލީހުގެ ތަޅުމުގައި އެކަމާ ގުޅޭ ގޮތުން ހަމައެކަނި ކުރި މަސައްކަތަކީ އެ މައްސަލަ ދިރާސާ ކުރަން ޖުޑީޝަރީ ކޮމިޓީއަށް ފޮނުވުމެވެ.

ފަނޑިޔާރު އަބްދުލްގަނީ ފަނޑިޔާރުކަމުން ވަކިކުރަން މަޖިލީހުން ފާސްކުރީ ޑިސެމްބަރު 4، 2019، ގަ އެވެ. އެ ދުވަހުގެ ޔައުމިއްޔާ ވެސް މަޖިލީހުގެ ވެބްސައިޓުގައި މިހާރު ވެސް ފެންނާނެ އެބަ އޮތެވެ.

ކޮމެންޓް

ފަހުގެ ޚަބަރު

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

ހިދުމަތުގެ އެންމެ މަތީ ޝަރަފު މުހައްމަދު ރަޝީދާއި އައްބާސަށް

ދައުލަތަށް ހިދުމަތް ކުރުމުގެ އެންމެ މަތީ ޝަރަފު، މުހައްމަދު ރަޝީދު އިބްރާހީމާއި އައްބާސް އިބްރާހީމަށް ވަނީ އަރުވާފައި. މުހައްމަދު ރަޝީދަށް މި ޝަރަފު އެރުވީ ދީނީ ރޮނގުން ކުރެއްވި ހިދުމަތްތަކަށް ކަމަށްވާއިރު، އައްބާސް އިބްރާހީމަށް މި ޝަރަފު އެރުވީ ދިވެހިބަހާއި އަދަބިއްޔާތުގެ ދާއިރާއިން.

އާންމުންގެ ތަނަވަސްކަން ހުއްޓުވަނީ ރާއްޖެ ނިކަމެތިކުރުން: ނަޝީދު

ރަސްމާލެ މަޝްރޫއު އީގަލް ހިލްސް ކުންފުންޏާ ހަވާލުކުރުމާ ދެކޮޅަށް އެމްޑީޕީން ކުރާ މަސައްކަތަކީ އާންމު ރައްޔިތުންނަށް ލިބެން އޮތް ތަނަވަސްކަން ހުއްޓުވައި ރާއްޖެ ނިކަމެތިކުރުމަށް ޖަހާ މަޅިއެއް ކަމަށް ނަޝީދު ވިދާޅުވި.

ޖޭޕީ، އަދާލަތު، އެމްޑީއޭ އަދި އެމްއެންޕީން މެންބަރުން ވަކިވަނީ

އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި ޖޭޕީ، އެމްޑީއޭ، އަދާލަތު އަދި އެމްއެންޕީން ގިނަ އަދަދެއްގެ މެންބަރުން ވަނީ ވަކިވެފައި. މީގެ ބަދަލުގައި ސަރުކާރު ހިންގާ ޕީއެންސީއާއި އިދިކޮޅު އެމްޑީޕީގެ މެންބަރުންގެ އަދަދު ބޮޑުތަނުން އިތުރުވި. އެންމެ ގިނަ މެންބަރުން ވަކިވީ ޖޭޕީން ކަމަށްވާއިރު، އެންމެ ގިނަ މެންބަރުން އަލަށް ގުޅުނީ ޕީއެންސީއާ

އިސްތިއުނާފު ލަސްވާ މައްސަލައިގައި ޖޭއެސްސީ ހާޒިރުކުރަނީ

ޖަލު ހުކުމް ތަންފީޒުކޮށް ނިމޭއިރުވެސް އިސްތިއުނާފު މަރުހަލާ ނުނިމޭ މައްސަލައަށް ގާނޫނީ ހައްލެއް ހޯދުމަށް ޖޭއެސްސީ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރުމަށް ވަނީ ފާސްކޮށްފަ. އިސްތިއުނާފު މައްސަލަތައް ނިންމަންޖެހޭ ވަކި މުއްދަތެއް ގާނޫނުގައި ނެތުމުގެ ސަބަބުން ކުށްވެރިންގެ އަސާސީ ހައްގުތައް ގެއްލެމުންދާކަން މެންބަރުން ފާހަގަކުރެއްވި.

"ބިން ދީ ދީނާއި މިނިވަންކަން ގެއްލުވާ ވެރިޔަކު އަދި މި ނޫނީ ނާދޭ"

ބޭރު މީހުންނަށް ބިން މިލްކުކުރެވޭ ގޮތަށް ސަރުކާރުން ނިންމާފައިވާ ނިންމުމަކީ ރާއްޖޭގެ ދީނީ ވަހުދަތާއި މިނިވަންކަމަށް އޮތް ބޮޑު ނުރައްކަލެއް ކަމަށާއި މި ނިންމުމުގެ ސަބަބުން ރާއްޖޭގެ ބިންތަކުގެ މިލްކުވެރިކަން އެހެން ދީންތަކުގެ މީހުންނަށް ލިބިދާނެ ކަމުގެ ބިރު އޮތްކަން ފާހަގަކުރައްވައި، ގައުމު ދިފާއުކުރުމަށް ނުކުތުމަށް ޖަމީލު ގޮވާލައްވައިފިއެވެ.

ސުޕްރީމް ކޯޓުގެ ފަނޑިޔާރުންނަށް އޮނަރަބަލް ކިޔަން އަންގައިފި

ސުޕްރީމް ކޯޓުގެ ފަނޑިޔާރުންނާ މުހާތަބުކުރާއިރު "އޮނަރަބަލް" ކިޔުމަށް ޖޭއެސްސީން ރަސްމީކޮށް އަންގައި ސާކިއުލާއެއް ވަނީ ނެރެފައި. މި ބަދަލާއެކު ފަނޑިޔާރުންގެ ނަމުގެ ކުރިއަށް "އަލްއުސްތާޒް" ބޭނުންކުރުން ހުއްޓާލަން ޖެހޭއިރު، މިއީ މީގެ ކުރިން އަމަލުކުރަމުން އައި އުސޫލަށް ގެނައި ރަސްމީ ބަދަލެއް.

Newsletter

Get the latest news delivered straight to your inbox