މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމް ކޮށްގެން ބޭއްވި 10 ބޯލް ޗެމްޕިއަންޝިޕުގެ ފިރިހެން ބައިގެ ޗެމްޕިއަންކަން މުހައްމަދު ޝަރީފް ހޯދިއިރު، އަންހެން ބައިގެ ޗެމްޕިއަންކަން އާމިނަތު ފާތީ ހޯދައިފި އެވެ.
ފޯރިގަދަކޮށް ކުރިއަށްދިޔަ 10 ބޯލް ޗެމްޕިއަންޝިޕުގެ ތަށި ޝަރީފް ހޯދީ ފައިނަލުގައި ހުސައިން ފަޔާޒު ބަލިކޮށްގެންނެވެ. މުބާރާތުގެ އެއްވެސް މެޗަކުން ބަލިނުވެ ފައިނަލާއި ހަމައަށްގޮސް ފަޔާޒު ފައިނަލް ކާމިޔާބުކުރީ 9-6 ފްރޭމުންނެވެ.
އަންހެން ބައިގެ ފައިނަލް ފާތީ ކާމިޔާބުކުރީ އާމިނަތު އަޒުރާ އާއި ވާދަކޮށް 7-4 ފްރޭމުންނެވެ. ފައިނަލުގެ ކުރިން ފުރަތަމަ ބުރުގައި ފާތީ ވަނީ އަޒުރާ އަތުން ބަލިވެފަ އެވެ. ނަމަވެސް ޑަބަލް އެލިމިނޭޝަން އުސޫލުން ކުޅޭ މުބާރާތަކަށް ވުމުން ފާތީ ވަނީ ބަލި ފަޅީގައި ކުޅުނު ހުރިހާ މެޗެއް ކާމިޔާބުކޮށް ފައިނަލާއި ހަމައަށް އައިސް އަޒުރާ އަތުން ބަދަލު ހިފައިފަ އެވެ.
މުބާރާތުގެ އަންހެން ބައިގެ ތިން ވަނަ އާމިނަތު ހަލީމް ހޯދިއިރު، ހަތަރު ވަނަ ހޯދީ ދީނާ އަހުމަދު އެވެ. ފިރިހެން ބައިގެ ތިން ވަނަ ހޯދީ އަހުސަން ހާޝިމް އެވެ. ހަތަރު ވަނަ އަށް ދިޔައީ އިސްމާއިލް ޖީހާން އެވެ.
އެމްޕީބީއޭ އިން 10 ބޯލް ޗެމްޕިއަންޝިޕަށް ފަހު ދެން އޮޮތީ އަންނަ ހޯމަ ދުވަހު ފަށާ އެސޯސިއޭޝަން ކަޕެވެ. އޭގެ ފަހުން މި މަހުގެ ފަހުކޮޅު 9 ބޯލް ޗެމްޕިއަންޝިޕް އޮންނާނެ އެވެ. އަހަރުގެ އެންމެ ބޮޑު މުބާރާތްކަމަށްވާ ގައުމީ ބިލިއާޑު މުބާރާތް އޮންނާނީ 25 އޮކްޓޫބަރުގަ އެވެ.
