ކުރީގެ އޯޑިއޯން ހުރި ބިމުގައި ޓާޓާ ހައުސިންގެ ސަބްސިޑަރީ އެޕެކްސް ރިއަލްޓީން ތަރައްގީކުރަމުން އަންނަ "ލަގްޒަވަން" އެޕާޓްމަންޓްތައް ވިއްކަން ފަށާ އަގުތައް އާންމުކޮށް، އެޕާޓްމަންޓް ގަންނަން ބޭނުންވާ މީހުނަށް ބުކިންއަށް ހުޅުވާލައިފި އެވެ.
ލަގްޒަރީ ހިދުމަތްތަކާއި ވަސީލަތްތައް ހިމަނައިގެން "ސްޓޭޓް-އޮފް-ދި-އާޓް" ފެންވަރަށް ތަރައްގީކުރާ 12 ފަންގިފިލާގެ ލަގްޒަވަންގައި ހުންނަނީ އެއް ކޮޓަރީގެ އެޕާޓްމަންޓާއި ތިން ކޮޓަރި އެޕާޓްމަންޓާއި ތިން ކޮޓަރި އާއި މެއިޑް ރޫމް ހިމެނޭ އެޕާޓްމަންޓުތަކެވެ.
މީގެ ތެރެއިން އެއް ކޮޓަރި އެޕާޓްމަންޓެއް ވިއްކަން ފަށާ އަގަކީ 2.03 މިލިއަން ރުފިޔާ އެވެ. ތިން ކޮޓަރި އެޕާޓްމަންޓެއް ވިއްކަން ފަށާ އަގަކީ 4.5 މިލިއަން ރުފިޔާ އެވެ. އަދި މެއިޑް ރޫމާއެކީ ހުންނަ އެޕާޓްމަންޓުތަކުގެ އަގު އުޅެނީ ފަސް މިލިއަން ރުފިޔާއިން މަތީގަ އެވެ.
އޯޑިއޯން ބިމަކީ ރައީސް މުހައްމަދު ނަޝީދުގެ ސަރުކާރުގައި ސޯޝަލް ހައުސިން ތަރައްގީކުރަން ޓާޓާއެކީ ވެވުނު އެއްބަސްވުމެއްގެ ތެރެއިން އެ ކުންފުންޏާ ހަވާލުކުރެވުނު މަޝްރޫއެކެވެ. އޭރު މި ޕްރޮޖެކްޓު ކުރިޔަށް ނުދާތީ ރައީސް އަބްދުﷲ ޔާމީންގެ ސަރުކާރުން ވަނީ އެއްބަސްވުން ބާތިލުކޮށްފަ އެވެ.
މި ޕްރޮޖެކްޓު އަލުން ފެށީ އެއްބަސްވުން ބާތިލުކުރި މައްސަލައިގައި 200 މިލިއަން ޑޮލަރު ހޯދަން ޓާޓާއިން އިންޑިއާގެ އާބިޓްރޭޝަނަށް ހުށަހެޅި މައްސަލަ ދޫކޮށްލާ ގޮތަށް އެއްބަސްވެ، މި ސަރުކާރުން ޓާޓާއާ އެކީ ސެޓްލްމަންޓް އެއްބަސްވުމެއްގައި ސޮއިކުރި ފަހުންނެވެ.
ޓާޓާއިން ބުނެފައިވާ ގޮތުގައި މި އެޕާޓްމަންޓުތަކުގެ މަސައްކަތް 2025 ގައި ނިންމާލައި، އެ އަހަރުގެ މާޗު މަހު މީހުނަށް ދިރިއުޅެވޭނެ އެވެ. ލަގްޒަވަންގެ އިތުރުން ނާދީ ބިމުގައި ތަރައްގީކުރާ 12 ފަންގިފިލާގެ ޓަވަރުތަކުގެ މަސައްކަތް ވެސް ކުރަމުންނެވެ.
